Málkus 9
9
1La Yésus ɔ lága sīg-pɛ limut la ɓayége ɓɛ́ɛ́ nɛ́: «La mbálɛ, mag laga ɓɛ́nɛ nɛ́, jogo lí ɓot vá lí ŋgá kɛ ɓé lí wú jɔ́ ŋgí lí ɛ́n lí Líkanʼyɛ lí Ɔlolómɛ̄ líg suh la adit wɛ́ɛ́ ásɛ.»
Yésus ag veŋ á miíh mí ɓáyēge ɓɛ́ɛ́ bíŋháa
(Mat 17.1-13; Lúk 9.28-36; 2Pt 1.17-18)
2Ámbúh alɔ́ ásáama, Yésus ɔ nyɔ̄ŋ á elɔŋ yɛ́ɛ́ Pétlos, Yákop la Yohánɛs ɓɔ́-ntámɛ́ á mɓagɓanɛ́, ɔ ɓét la ɓɔ́ á ɔ́kolá vícɛ̄ŋ. Váŋ nɛ a véeŋ á miíh máɓá. 3Mbɔ́tí yɛ́ɛ́ yú páa, nyaa nyí ɛ lɛ nɛ́, mut tɔ wa á ŋkɔŋ-á-sí a ŋgí la ɓé yɔ́ li paɛ náŋ. 4Á ékūyá-kúyá, Elías la Móse bú pámlé ɓɔ́, bú ɓōtlé li kwɛl la Yésus. 5Pétlos ɔ lága hɔ́ Yésus nɛ́: «Lábi#9.5 Lábi, náŋ a lɛ nɛ́ Ŋ̀yéglɛ., ɛ́ lɛ́ nsɛ́ŋ nɛ́ bi tɔ́ɔ̄ yahá vá; bi óŋ biláá bíŋháa: yá ányúū yɔ́ɔ, yá ányúū Móse, yéŋé yá ki ányúū Elías.» 6Ah yíí ɓé pɛ yéé a lágá ányúū woŋ á ŋgandag. 7Mbaga yu sūh, yu bútyɛ́ ɓɔ́, váŋ nɛ́ cíŋ ya pámléné múŋ á nyíŋ mbaga, yu yó nɛ: «Nyɔ́ nɛ́ a lɛ édidíŋɛ yáma Mɔɔ́n, miní óglé nyɛ́!» 8Á ékūyá-kúyá, ɓáyēge bú légɓé á ŋgwáāg yaɓá, ɓáh ɛ́n ɓé pɛ tɔ mut amáh sig Yésus nyɛ́-ntámɛ́. 9Á mísuh máɓá mí ɔ́kolá, Yésus ɔ ɓéhyɛ́ ɓɔ nɛ́ bíh laglág ɓé tɔ mut yéé ɓá ɛ́n, nɛ́-tɛ́ɛ Mɔɔ́n Mut a pāhye átē a ɓá ɓá wū. 10Ɓayége bú náŋɛ̄ nyíŋ ndag, ndí bíg ɓatɓan yéé a ŋga somo ɓɔ́ li laga likɔlɓan la «lipahye átē a ɓá ɓá wū».
11Váŋ nɛ́ ɓá ɓāt Yésus nɛ́: «Ányúū yéé ɓayí-mbéndá bí ŋga lága nɛ́ Elías a nyɛ́ɛ yágá li sɔ́ é?» 12Ɔ pélē ɓɔ́ nɛ́: «Kɔɔ la mbálɛ, Elías a nyɛ́ɛ yágá li sɔ́ á li tɛ́ɛ́yɛ lí mam mísɛ; ɓaá yá ciiɓɛ hɔ́ ɓé nɛ Mɔɔ́n Mut a nyɛ́ɛ yágá li sɔghe taŋ-taŋ la nɛ́ bí yāŋa ki nyɛ́ é? 13Jɔ́ nɛ́, mi ŋga lága ɓɛ́nɛ nɛ́: Elías a sɔ́, ɓɔ́ bú ɓɔŋlé nyɛ kaa nsom wáɓá, likɔlɓan la yé yá ciiɓɛ́ ányúū yɛ́ɛ̄.»
Yésus ag pámɛ mɔɔ́n m̀búl m̀ɓé á nyúū
(Mat 17.14-21; Lúk 9.37-43)
14Eceg Yésus la ɓá ɓayége bíŋháa ɓá timán ápah ɓáŋá bí ɓɛ́ɛ́, bú ɛ́n limut licɛ́ŋ lú díí ɓɔ́, ɓayí-mbéndá bíg kála la ɓɔ́. 15Ɛnɛ́ ɓot ɓá ɛ́n Yésus, voóm asɛ̄ ɔ póghan, bí ŋgí loo yé epah la yéŋé á li somo nɛ́ bí tama nyɛ́. 16Yésus ɔ bíhī ɓáyēge ɓɛ́ɛ́ nɛ: «Yéé miní ŋga kála la ɓɔ́ é?» 17Mut wa átē a limut ɔ pélē nyɛ nɛ́: «Á Ŋ̀yéglɛ, ma sɔ́ la wa mɔɔ́n wama, a byɛ́ɛ́ m̀búl m̀ɓé nyú wá kuɛhɛ́ nyɛ mbúg. 18Tɔ véé wá byeé nyɛ, ág ɓɛ́h nyɛ á sí; livúh lá pám nyɛ á ányu, a ɓōtlé li dí lí mísoŋ, a ēh. Ma lága ɓáyēge ɓɔ́ɔ nɛ́ bí dúhū wɔ́, ndí ɓáh kuh ɓé ŋguu.» 19Yésus ɔ nyɔ̄ŋ mpɔ́t, aá la ɓɔ́ nɛ́: «Á nyɔŋɔn ŋgíla ŋyéɓé nyí! Tɛɛla ǹjén mi ŋga ɓɛ́ ɓɛ́ɓɛ la ɓɛ́nɛ é? Tɛɛla ǹjén mi ŋga kɛ́ ɓɛ́nɛ li ɔ́hánɛ é? Sɔ́án la ma nyɛ́ vá.» 20La ɓɔ́ bú sɔ́la nyɛ́ mɔɔ́n. Ɛnɛ́ m̀búl m̀ɓé wá ɛ́n Yésus, wú pógɛ́ mɔɔ́n la ŋguu, ɔ ɓɛ́hán á sí, ɔ ɓōtlé lí bíŋgle á sí, livúh lú pám nyɛ á ányu. 21Yésus ɔ ɓāt ɛ́sāŋɛ́ á mɔɔ́n nɛ́: «Li ɓotle ǹjén náŋ a ŋga ɓɔŋ nyɛ́ é?» Ɛsáŋɛ́ ɔ pélē nɛ: «Li ɓotle nyɛ́ mɔɔ́n ntɔ́ga. 22Biceg byá, nyúŋ m̀búl ág ɓɛ́h nyɛ́ á nzáan tɔ á míndīm nɛ́ a wú. Ndí wa, sóon kɔnlé ɓɛ́hɛ ŋgɔ́ɔ́, óŋgánɛ ɓɛ́hɛ kíyáɓɛ́nɛ ɔg la.» 23Yésus ɔ pélē nyɛ nɛ́: «Ɔ byɛ́ nɛ́ kíyáɓɛ́nɛ ɔg la é? Yí nɛ́ mam mísɛ míg ɓɔŋɓɛ la mut a byɛ́ɛ̄ ŋyéɓé.» 24Á ékūyá-kúyá, ɛsáŋɛ́ á mɔɔ́n ɔ tɛ́ɛ́ nlón nɛ: «Mag yéɓe! Sóon óŋgánɛ ma, tɔ la ŋgíla ŋyéɓé yáma!» 25Ɛnɛ́ Yésus a ɛ́n límut lú kóman, ɔ kímɛ nyúŋ m̀búl m̀ɓé, aá la wɔ́ nɛ́: «Á m̀búl á mbúg la ndɔ́g, mag pɔ́t, ɔg pám á nyúū nyɔ́ mɔɔ́n; ɔh timkágán ɓé pɛ á átē wɛ́ɛ̄!» 26M̀búl m̀ɓé wú pám ág tɛ́ɛ milón, wú kóndɛ́ mɔɔ́n; ɔ óŋg m̀bim, nyaa nyí lɛ nɛ́ ɓot bísɛ bú lága nɛ: «A wú.» 27Váŋ nɛ́ Yésus a byée nyɛ á wɔ, ɔ tɛ́ɛ́yɛ́ nyɛ́, mɔɔ́n ɔ tɛ́lɛ. 28Eceg Yésus a tímān á ndáá, ɓayége ɓɛ́ɛ́ bú bíhī nyɛ eceg ɓá yéglé ɓɔ́-ntámɛ́ nɛ: «Ndí ɓɛ́hɛ, ányúū yéé ɓāh la ɓé li duhu lí nyúŋ m̀búl m̀ɓé é?» 29La nyɛ́ ɔ pélē ɓɔ nɛ́: «Nyíŋ nyaa m̀búl m̀ɓé, amáh sig míkánɛ mɔ́-ntámɛ́ nɛ mí ŋga lá wɔ́ li pámɛ.»
Yésus ag lɛgɛ sīg-pɛ nyɛmb yɛɛ́ la lipahye jɛ́ɛ́
(Mat 17.22-23; Lúk 9.43-45)
30Ɛnɛ́ ɓá ɓógo váŋ, bú yáɓe Galiléa. Yésus a ŋgí somo ɓé nɛ ɓot bí yí náŋ; 31ányúū nɛ́ a ŋgí yéglɛ ɓayége ɓɛ́ɛ́ nɛ: «Mɔɔ́n Mut ag kɛ li nuŋlɛ á mɔ mí ɓot; bíg kɛ nyɛ li ól, ndí eceg a ŋga kɛ li wú, ag kɛ li pahye á ɔlɔ́ vá yáhɛ áŋháa.» 32Ndí ɓayége ɓɛ́ɛ́ bíh sɔ́ŋtánɛɛ ɓé bíŋ biɓaŋgá, la ki nɛ́ bí ŋgí kɔn woŋ li bihi lí nyɛ.
Nzáá a lóohán li ɓɛ́ lí ǹcɛ́ŋ é?
(Mat 18.1-5; Lúk 9.46-48)
33Yésus la ɓayége ɓɛ́ɛ́ bú kɛ á Kafalnáum. Ɛnɛ́ bí níŋgléé á ndáá, Yésus ɔ ɓāt ɓɔ nɛ́: «Yéé miní ŋga kála á nzen é?» 34Ndí ɓɔ́ bú ɓen nyɛ li pele, átɔm nɛ́ múŋ á nzen, bí ŋgí kála á lí yí lí nzáá a lɛ ǹcɛ́ŋ á póla yaɓá. 35Váŋ nɛ́ Yésus a tɔɓéé á sí, ɔ yáŋá jéŋ Jóom jɛ́ɛ́ lí ɓáōmɓɛ la bíɓáa, aá la ɓɔ́ nɛ́: «kíyáɓɛ́nɛ mut ag somo li ɓɛ́ lí nyɔ́ ɔsú, a ɓɛ́ nyɔ́ a súgle la ŋ̀ɛɛle a ɓáŋá bísɛ.» 36La nyɛ́ ɔ dúutɛ́ mɔɔ́n ntɔ́ga, ɔ tɛ́ɛ́yɛ́ nyɛ á m̀mím wáɓá; ɛnɛ́ a óóɓé nyɛ, ɔ lága ɓɔ nɛ́: 37«Tɔ nzáá a lɛ́glé mɔɔ́n ákaa nyɔ́ á jóō jáma, ɛnɛ mā-mɛn nɛ́ a lɛ́gle; tɔ nzáá ki a lɛ́glé ma, ah ma ɓé nɛ a lɛ́gle, ndí a lɛ́glé ja nyɔ́ a óm ma.»
Nyɔ́ a ŋgá tɛ́ŋgánɛ ɓé ɓɛ́hɛ a lɛ lá ɓɛ́hɛ
(Lúk 9.49-50)
38Yohánɛs ɔ nyɔ̄ŋ mpɔ́t, ɔ laga Yésus nɛ́: «Á Ŋ̀yéglɛ, ɓa ɛ́n mut ag duhu mimbúl míɓē á jóō jɔ́ɔ, ndí ɓɛ́hɛ bu sómo nyɛ́ li suŋɛ náŋ, ányúū nɛ a sē ɓé á elɔŋ yáhá.» 39Váŋ nɛ́ Yésus a lága nyɛ nɛ́: «Miníh suŋhɛ́gɛ́ ɓé nyɛ, átɔm nɛ́ mut tɔ wa a ŋga ɓɔ̄ŋ binanaŋga bí mam á jóō jáma, ndí ámbúh eceg a pɔ́t áɓē likɔlɓan la ma a sē ɓé. 40Nyɔ́ a ŋgá tɛ́ŋgánɛ ɓé ɓɛ́hɛ a lɛ lá ɓɛ́hɛ. 41La mbálɛ mag laga ɓɛ́nɛ nɛ́, nyɔ́ la nyɔ́ a ŋga tíi ɓɛ́nɛ tómbeli mindím ányúū nɛ miní lɛ elɔŋ la Nyɔ́-a-Pɔ́hlɛ, la mbálɛ, mag laga ɓɛ́nɛ nɛ́ nyɔ́ŋ mut a ŋgá kɛ ɓé li jáŋɛ lí nsála wɛ́ɛ́.»
Yésus ag ɓéhyɛ ɓayége ɓɛ́ɛ́
(Mat 18.6-11; Lúk 17.1-2)
42Li kɛla lí ŋkwɛl ɔ́sū, Yésus aá la ɓɔ́ nɛ́: «Tɔ nzáá a ŋga kɛ́ li ɓɛ́ lí njɔm miɓé nyí ntɔ́ga wāhwa vá, á ɓá bí byɛ́ɛ́ ŋyéɓé la ma, ɛ́ lɛ́ nsɛ́ŋ nɛ́ bí tiŋ nyɛ́ lísūŋ lí ŋgɔg á cíŋ, bí léé nyɛ́ á túwɛ. 43Kíyáɓɛ́nɛ wɔ wɔ́ɔ á lɛ́ njɔm aɓé wɔ́ɔ, sɛ́m wɔ́; átɔm nɛ́, ɛ́ lɛ́ wá nsɛ́ŋ nɛ ɔ níŋgí á éniŋ éɓem la wɔ wá, li loo nɛ́ ɔg kɛ la mɔ mɔ́ɔ míɓáa á éɓēl ɛ́ nzáan nyí ɛ ŋgá dím ɓé [44]#9.44 Ɛ́nán 48 ápah bitúmb bí ŋga dí m̀bim wɔ́ɔ tɛɛla á éɓem la ápah nzáan ɛ ŋgá dím ɓé. 45kíyáɓɛ́nɛ akoo wɔ́ɔ á lɛ́ njɔm aɓé wɔ́ɔ, sɛ́m wɔ́; átɔm nɛ́, ɛ́ lɛ wá nsɛ́ŋ nɛ ɔ níŋgí á éniŋ éɓem la akoo wá, li loo nɛ́ bíg léé wa á éɓēl ɛ́ nzáan la mikoo mɔ́ míɓáa. [46]#9.46 Ɛ́nán 48 ápah bitúmb bí ŋga dí m̀bim wɔ́ɔ tɛɛla á éɓem la ápah nzáan ɛ ŋgá dím ɓé. 47Nlemlem á jam, kíyáɓɛ́nɛ diíh jɔ́ɔ lí lɛ́ njɔm aɓé wɔ́ɔ, túú jɔ́; ɛ́ lɛ́ wá nsɛ́ŋ nɛ ɔ níŋgí la diíh já á líkanʼyɛ lí Ɔ́lolómɛ̄, li loo nɛ́ bíg léé wa á éɓēl yé nzáan la miíh mɔ́ɔ míɓáa, 48ápah bitúmb bí ŋgá wú ɓé la ápah nzáan ɛ ŋgá dím ɓé. 49Jɔ́ nɛ́, nzáan ɛg kɛ li nyɔ́ lí mut sig á nyúū ákaa ŋku li oŋle la miɓɔŋɔg mɛ́ɛ́. 50Ŋku á lɛ́ jam lí m̀ɓɛɛŋ; ndí kí wá jáŋɛ́ ésɔh yɛ́ɛ́, la yéé miní ŋga tímanɛ yɔ́ é? Ɓɛ́án la ŋku á mínyuú máná, miní niŋ ki átē á nsaŋ ɓɛ́nɛ la ɓɛ́nɛ.»
Currently Selected:
Málkus 9: NTB
Highlight
Share
Copy

Want to have your highlights saved across all your devices? Sign up or sign in
© 2023, CABTAL