YouVersion Logo
Search Icon

Málkus 6

6
Yésus ag kɛ á tísɔn yɛ́ɛ̄ nyí Názalɛt
(Mat 13.54-58; Lúk 4.16, 22, 24)
1Yésus ɔ ɓógo váŋ á nyɔ́ŋ voóm ɔ sóo á tísɔn yɛ́ɛ̄ la ɓayége ɓɛ́ɛ́ bú kɛ elɔŋ la nyɛ. 2Á ɔlɔ́ ví évɛɛɓan ví Élōg-Yúda, Yésus a ɓɛ́ɛ́ a ŋgí yéglɛ á ndáá-miɓomán, ŋgandag ɓot ɛ́ ŋgí ámblé nyɛ́ yú nyág. Váŋ nɛ ɓá ɓatán nɛ: «Ɓaá véé náŋ a ŋga sɔ́léne nyɛ́ é? Yɔɔ́yɔ́ɔ nyíŋ peg a kūh ɛ́ ŋga yígle nyɛ́ li ɓɔŋ lí bínanaŋga bí mam la mɔ mɛ́ɛ́ é? 3Ɓaá nyɛ́ ɓé nɛ a lɛ kápínda, mɔɔ́n Mālía, mɔɔ́nyāŋ a Yákop, Yósɛs, Yúde la Símɔn é? Ɓaá elōgnyāŋ ɛ́ ɓondígá ɛ́ sē ɓé la ɓɛ́hɛ vá é?» Náŋ ɔ ɓɔ̄ŋ nɛ́ ɓot bú ɓen li yéɓe la nyɛ́. 4Váŋ nɛ Yésus a laga ɓɔ́ nɛ: «m̀pɔ́tle-a-Ɔlolómɛ̄ ah byɛ́ɛ́ ɓé ádit á ŋkɔŋ wɛ́ɛ́, á m̀biya wɛ́ɛ́ tɔ á ndáá yɛ́ɛ̄.» 5Yésus ah láa ɓé li ɓɔŋ lí énanaŋga ɛ́ jam tɔ yá váŋ; amáh sig lí tɔɔyɛ lí ápuh á ɓákɔɔ́kɔn mbólí ɓá a kahyɛ́ɛ mɔ; 6tɔ la náŋ ɔ nyág nɛ bíh byɛ́ɛ́ ɓé ŋyéɓé.
Yésus ag óm Jóom jɛ́ɛ́ lí Ɓáōmɓɛ la Bíɓáa
(Mat 9.35; 10.1, 5-14; Lúk 9.1-6)
Ámbúh váŋ, Yésus ɔ kɛ ag wɛɛ á míkɔŋ mí ɓɛ́ɛ́ á ŋgwáāg ag yéglɛ. 7Ɔ yáŋá Jóom jɛ́ɛ́ lí Ɓáōmɓɛ la Bíɓáa, ɔ ɓōtlé ɓɔ́ li óm bíɓáa bíɓáa, ɔ tí ɓɔ́ ŋguu nyí li kanʼyɛ lí mímbūl míɓē. 8Eceg bí ŋgí kɛ, ɔ yíhɛ́ ɓɔ́ nɛ́: «Amáh sig njéŋ, miníh nyɔŋɔ́g ɓé tɔ jam ányúū duwɛ, ɛ́ ɓɛ́ lidí, mpég, tɔ li vá lí ŋkuh á pɔ́sa. 9Jálán bítāmbí bí míkɔɔ, ndí miníh nyɔŋɔ́g ɓé mbɔ́tí ɛ́ɓáa.» 10Yésus ɔ laga sīg-pɛ ɓɔ́ nɛ́: «kíyáɓɛ́nɛ maná pám voóm ndí ɓá lɛ́glé ɓɛ́nɛ á ndáá, tɔɓán até nɛ́-tɛ́ɛ la á míɓógo máná. 11Kíyáɓɛ́nɛ ɓot ɓá ɓen ɓɛ́nɛ li lɛ́gle voóm tɔ li ámble, á míɓógo máná, kután líbūlú lí míkoo máná, náŋ ag kɛ ɓɔ́ li yégle ákaa ndembye eɓé.» 12La ɓaómɓɛ ɓɛ́ɛ́ bú kɛ li lɛgɛ lí pɔ́l nɛ ɓot bí vēŋé bílɛ̄m. 13Bí ŋgí duhu ŋgandag mimbúl míɓē, bíg ɔ́gɛ ŋgandag ɓakɔɔ́kɔ̄n miúú á lí tɔɔyɛ lí ɓɔ́ mbólí.
Elóde la Yésus
(Mat 14.1-2; Lúk 9.7-9)
14Elóde a ámbléé ɓot bíg pɔ́t likɔlɓan la Yésus; kasig jóō jɛ́ɛ́ lí cāmáán pɛ́ɛ́ ɛsɛ̄, ányúū nɛ ɓot ɓá bí ŋgí laga nɛ́: «Yohánɛs Ǹtíi-nzoɓan nɛ́ a pāhye; ányúū náŋ nɛ́ a byɛ́ɛ̄ ŋguu li ɓɔŋ lí bínanaŋga bí mam.» 15Ɓáŋá ɓɔ́ɔ́: «Elías nyɔ́ŋ.» Ɓatám sīg-pɛ ɓɔ́ɔ́: «m̀pɔ́tle-a-Ɔlolómɛ̄ wa nyɔ́ŋ a ŋga púnan la ɓapɔ́tle-bí-Ɔ́lolómɛ̄ ɓáhá bí kwaŋ.» 16Ɛnɛ́ Élóde a ámblé nyíŋ pɔ́l ɔ ɓātɓán nɛ: «Nyɔ́ Yohánɛs ma sɛ́mhánɛ́ m̀mú nyɛ́ nɛ́ a pāhye é?»
Nyɛmb nyí Yohánɛs Ǹtíi-nzoɓan
(Mat 14.3-12; Lúk 3.19-20)
17-18Ɛ́ lolóó nɛ́, Elóde a byelháánɛ Yohánɛs ɔ óm nyɛ á m̀ɓog, ɔ kág nyɛ la nsáŋ-á-bícɛɛ, ányúū nɛ Yohánɛs a lagléé nyɛ́ Élóde nɛ́: «Ɔh byɛ́ɛ́ ɓé kundɛ li tɔɔ la lí Elódiáda ŋ̀gáá mɔ́ɔ̄nyɔ̄ŋ Filípo.» 19Ányúū náŋ, Elódiáda ɔ vínān la Yohánɛs, ɔ sómo nyɛ li ólhánɛ, ndí ah ɛ́nɛ́ɛ ɓé bu li ɓɔŋ náŋ. 20Átɔm nɛ́ Elóde a ŋgí kɔn Yohánɛs woŋ, ákaa a ŋgí yí nɛ́ nyɔ́ŋ a lɛ mut a tɛ́ɛ́ sim, nyɔ́-mpúán; a váá nyɛ́ á sí bitátlé byɛ́ɛ́. Elóde a ŋgí diŋ ag ámble Yohánɛs; ndí ɛnɛ́ a ámblé nyúŋ ŋkwɛl wɛ́ɛ́, a ŋgí yí ɓé pɛ yéé a nyɛ́ɛ li ɓɔŋ. 21Ndí ɔlɔ́ ví m̀ɓɛɛŋ vá vú kɔlan, ápah Elódiáda a kuhúú póla nyí li ólhánɛ lí Yohánɛs. Náŋ a ɓɛ́ɛ́ ŋgand ɔlɔ́ ví líbyáa ví Élóde, eceg nyɛ́ Élóde a yáŋléé ɓot bí gɔ́mna, sónja ecɛ́ŋ, la ɓacɛ́ŋ bi Galiléa á líndēmá. 22Ŋgɔn Elódiáda yu níŋgí á ndáá lindémá, yu yém, nyaa nyí ɛ lɛ nɛ́, yu nyɛ́ɛlé Élóde la ɓacɛn ɓɛ́ɛ́. Váŋ nɛ́ káísa Elóde a yáŋa yɔ, ɔ lága yɔ nɛ́: «Ɓāt ma tɔ yéé ɔ ŋgɔ somo, mag kɛ wa yɔ́ li tíi.» 23Ɔ kān-sɔŋ ɔsú ví ɓot nɛ́: «Tɔ yéé ɔ ŋgɔ kɛ́ ma li ɓat, mag kɛ wa yɔ́ li tíi, tɔ ɓɛ́ ja épah ewút yé ékombo yáma.» 24Váŋ nɛ ŋgɔn mindígá ya pám, yu kɛ li bíhī lí nyaŋɛ́ nɛ́: «Yéé mi ɓāt é?» Nyaŋɛ́ ɔ pélē nyɛ nɛ́: «M̀mú á Yohánɛs Ǹtíi-nzoɓan.» 25Ŋgɔn mindígá yu vóó lí timan á ŋgwáāg Káísa yu yó nyɛ nɛ́: «Mi byɛ́ɛ́ kóó nɛ́, ákaa mi tɛ́ɛ́ vá, ɔ tí ma m̀mú á Yohánɛs Ǹtíi-nzoɓan á nlɛ́há-á-páan.» 26Ɛnɛ́ káísa a ámblé náŋ, ɔ súnan. Ndí, kasig a kanáá-sɔŋ ɔ́sū ví ɓácɛn ɓɛ́ɛ́, a ŋgí lá ɓé pɛ li ɓen. 27Á ékūyá-kúyá ɔ óm sónja yɛ́ɛ̄ ya la ndag nɛ́ ɛ kɛ́, ɛ sɔ́la nyɛ́ m̀mú á Yohánɛs. Sónja yu kɛ́ á ndáá-m̀ɓog, yu sɛ́m Yohánɛs m̀mú. 28Yu sɔ́ ɛ ɓɛ́gɛ wɔ́ á nlɛ́há-á-páan, yu tí wɔ́ nyíŋ ŋgɔn mindígá, la yɔg yu lōɛ́ wɔ́ nyaŋɛ́. 29Ɛnɛ́ ɓáɓɔŋle bí Yohánɛs ɓá ámblé náŋ, bú kɛ bú nyɔ̄ŋ m̀bim wɛ́ɛ́ bú kɛ́, bú jē wɔ́ á sɔŋ.
Yésus ag díɛ́hɛ akóó á páam átáan
(Mat 14.13-21; Lúk 9.10-17; Yhn 6.1-15)
30Ɓaómɓɛ bú sɔ́ ɓɛ́ɓɛ la Yésus á lí laga lí nyɛ yé ɛ́sɛ ɓá ɓɔŋ la yéé ɛ́sɛ ɓá yéglɛ. 31Kasig ɓot ŋgandag bí ŋgí sɔ́ bíg kɛ, ɓaómɓɛ bíh ɓɛ́ɛ́la ɓé eceg li dí. Váŋ nɛ́ Yésus a laga ɓɔ nɛ́: «Bi kɛ́nɛ́g á voóm á liɛ́g, miní vɛ́ɛɓán puh.» 32La ɓɔ́ bú ɓét á m̀ɓoŋgó á lí kɛ á voóm á liɛ́g. 33Kasig ɓot bí ɛ́nɛ́ɛ́ ɓɔ́ bíg kɛ, ŋgandag yu lēm ɓɔ. Váŋ nɛ́ ɓot ɓá ɓógyé á tísɔn ɛ́sɛ, bú ɓól m̀bíí li kɛ wóŋ, bú pám á nyɔ́ŋ voóm sɔ́kágánɛ́ Yésus la ɓayége ɓɛ́ɛ́ bíg pám átē. 34Á mísuh mí Yésus á m̀ɓoŋgó, ɔ ɛ́n limut licɛ́ŋ, ɔ kɔ̄nlé jɔ ŋgɔ́ɔ́ ányúū nɛ́ li ɓɛ́ɛ́ ákaa mitómbɛ́ mí ŋgíla ǹtát. La nyɛ́ ɔ ɓōtlé li yéglɛ lí ɓot mam ŋgandag. 35Ákaa eceg ɛ́ ɓɛ́ɛ́ nlolóog, ɓayége bí Yésus bú sīŋglé nyɛ ɓɛɓɛ li laga lí nyɛ́ nɛ́: «Nyɔ́ voóm a lɛ ɔ́tīgá, eceg ki yá kɛ; 36soɛ́ ɓá ɓot: nɛ́ bí kɛ, bí sóm yoóm lí dí á mítān la á míkɔŋ mí lɛ́ ɓɛ́ɓɛ vá.» 37Ndí Yésus ɔ pélē ɓɔ nɛ́: «Ɓɛ́nɛ-mɛ̄n tíán ɓɔ́ lídī.» La ɓɔ́ bú lāgá nyɛ nɛ́: «Ɔg somo nɛ́ bi nyɔ́ŋlé bíɓógo bí kápa bíɓáa véé á lí sóm lí lídī bi ŋga káale ɓɔ́ é?» 38Aá la ɓɔ́ nɛ́: «Kɛnán miní légɓé! Bikɔgá byáŋvéé miní byɛ́ɛ̄ é?» Ɛnɛ́ ɓá légɓe, bú lāgá nyɛ nɛ́: «Bikɔgá bítáan la kɔh ɛ́ɓáa.» 39Váŋ nɛ́ Yésus a tí ɓɔ̄ kundɛ nɛ́ bí tɔ́ɔyɛ́ ɓáŋ ɓot biti biti á lóō lí péná bíkāā. 40Bú tɔ́ɔ̄ bíti bí éɓōgo ɓot la bí bí muúmítáan. 41Yésus ɔ nyɔ̄ŋ bíŋ bikɔgá bítáan la yíŋ kɔh ɛ́ɓáa, ɔ ɓétɛ́ miíh á lóō, ɔ tí Ɔ́lolómɛ̄ mítamlan, ɔ búg byɔ, ɔ tí byɔ ɓayége ɓɛ́ɛ́ nɛ bí kaa byɔ́ la ɓot; ɔ nyɔ̄ŋ ki nyíŋ kɔh ɛ́ɓáa, ɔ káa yɔ la ɓot bísɛ. 42Ɓot bísɛ bí díéé, bú yál. 43Bitun bí bíkɔgá la kɔh bí yégléé bí yáhɛ́ɛ jóom lí bísɛɛ la bíɓáa. 44Ɓá bí díéé bíkɔgá bí ɓɛ́ɛ́ ákōō á páam átáan.
Yésus ag wɛɛ á lóō lí míndīm
(Mat 14.22-33; Yhn 6.16-21)
45Á ékūyá-kúyá, Yésus ɔ nyághánɛ́ ɓayége ɓɛ́ɛ́ li ɓét á m̀ɓoŋgó. Ɔ dúgɛ́ ɓɔ nɛ́ bí ɓēhé á nyúŋú mií á ebúle, jé lí tísɔn Betsaída. Nyɛ́ ɔ yéglé á li soɛ lí limut. 46Ɛnɛ́ a mánɛ jɔ́ li soɛ, ɔ ɓét á ɔ́kolá á míkánɛ. 47Ŋgōgó yu vín, Yésus ɔ yéglé a tɛ́ɛ á lóō li ŋkɔŋ nyɛ́-ntámɛ́, ɓáŋá ki á lóō lí m̀ɓoŋgó á m̀mím á ebúle. 48Ɔ ɛ́n ákaa ɓayége ɓɛ́ɛ́ bí ŋgí lɔ́gɓan la edúga ányúū nɛ ŋgɔá ɛ ŋgí teeŋgɛ ɓɔ́; la miyɛ́ mí kítí, ɔ sɔ́ ag wɛɛ á lóō lí míndīm, ɔ́ŋgɛn ag loo ɓɔ́, 49ɛnɛ́ ɓá ɛ́n nyɛ ag wɛɛ á lóō lí míndīm, bú ɔ́ŋɔ nɛ ŋkúgu nyúŋ la ɓɔ́ bú tɛ́ɛ́ mílōn. 50Ɛnɛ́ ɓɔ́ bísɛ ɓá ɛ́n nyɛ́, bú pámblan. Ndí á ékūyá-kúyá, a byɛ́la ɓɔ́ nɛ́: «Miníh kótóg ɓé, ma nyɔ́ŋ, miníh kɔnɔ́g ɓé woŋ!» 51Váŋ nɛ́ a ɓét á m̀ɓoŋgó wáɓá, ŋgɔá ki yu vɔ́lɓe. Ɓayége ɓɛ́ɛ́ bú nyág nlohanɛ́. 52La mbálɛ nɛ́ bíh sɔ́ŋtánɛɛ ɓé yé yá lóō la bikɔgá, ányúū nɛ bí ŋgí let mimú.
Yésus ag tɔɔyɛ ɓakɔɔ́kɔ̄n mbólí á Genesálɛt
(Mat 14.34-36)
53Ɛnɛ́ ɓá yaɓé ébúle, bú cág á ékombo yé Genesálɛt. 54Á mísuh máɓá mí m̀ɓoŋgó, ɓot bú lem Yésus. 55Váŋ nɛ́ ɓáŋ ɓot ɓá kɛ á míkɔŋ mísɛ, bú káhá nyɛ lí sɔ́la lí ɓakɔɔ́kɔ̄n á lóō lí bíbúŋga á voóm sig bí ŋgí ámble nɛ́ a lɛ. 56Á ɓávoóm bí líŋgīndá bísɛ Yésus a ŋgí níŋgi; ɛ́ ɓɛ́ á tísɔn, míkɔŋ tɔ á mítān, ɓot bí ŋgí sɔ́la nyɛ́ ɓakɔɔ́kɔ̄n wóŋ. Bíg sɔ́hye nyɛ́ nɛ́ a mwáhɛ́ ɓɔ́ bí síiɓán tɔ lisúg jɛ́ɛ́ lí mbɔ́tí. Ɓáŋ bísɛ bí síiɓán nyɛ́ bí tɔɓéé mbólí.

Currently Selected:

Málkus 6: NTB

Highlight

Share

Copy

None

Want to have your highlights saved across all your devices? Sign up or sign in