Málkus 5

Yésus ag pámɛ mut mimbúl míɓē

(Mat 8.28-34; Lúk 8.26-39)

1Yésus la ɓayége ɓɛ́ɛ́ bú pám á yéŋé épah yé ebúle, á ékombo ɛ́ Gelasénia. 2Kasig Yésus a ŋgí suh á m̀ɓoŋgó, á ékūyá-kúyá, mut wa a ɓɛ́ɛ́la m̀búl m̀ɓé, ɔ sɔ́ li ɓoman la nyɛ́, a ŋgí sɔ́le á kɔ́tá sɔŋ, 3ápah a ŋgí tɔɓene. Tɔ mut a ŋgí la ɓé pɛ nyɛ́ lí kág, tɔ ɓɛ́ ja la nsáŋ-á-bícɛɛ. 4Ákaa ɛ́sɛ nɛ́ bí ŋgí yɔg nyɛ́ lí kág li mɔ la mikoo la misáŋ-mí-bícɛɛ, ndí eceg sig, a ŋgí pát mɔ́; ndí tɔ mut ah ɓɛ́ɛ́la ɓé ŋguu li byee lí nyɛ. 5Díɓe la nzámuh, a ɓɛ́ɛ́ ja múŋ á kɔ́tá sɔŋ la á lóō lí ákolá, ag tɛ́ɛ milón, ag ɓáálɛ nyuú yɛ́ɛ̄ la ŋgɔg. 6Ɛnɛ́ a ɛ́n Yésus énɛŋɛ́ wóŋóó, ɔ ɓógó m̀bíí, ɔ sɔ́ ɔ kū la miɓɔ́ŋ ɔ́sū vɛ́ɛ́. 7Váŋ nɛ́ a tɛ́ɛ́ nlón la ŋguu nɛ́: «Á Yésus, Mɔɔ́n Ɔlolómɛ̄ Nyɔlɛ, yéé ɔ ŋgɔ sōmle ma é? Sóon á jóō lí Ɔlolómɛ̄, ɔh sɔ́ɔ́g ɓé ma lí ɓɔgɔ.» 8Ákaa ɛ́sɛ Yésus a ŋgí laga wɔ́ nɛ́: «Á m̀búl m̀ɓé, pám á nyúū nyɔ́ mut!» 9Ámbúh náŋ Yésus ɔ bíhī wɔ́ nɛ́: «Joó jɔ́ɔ nɛ́ nzáá é?» Wú pélē nyɛ nɛ́: «Ma nɛ́ mi lɛ Ɔbul; átɔm nɛ́ bi lɛ́ ŋgandag.» 10Wú díit hɔ́ Yésus la nzɔ́hyé nɛ ah duhlág ɓé mɔ́ enɛŋɛ́ la ekombo. 11Ákaa liɓembá lícɛ̄ŋ lí ŋgoo lí ɓɛ́ɛ́ lí ŋgí dí váŋ á míɓēt mí ɔ́kolá, 12mimbúl míɓē mú sɔ́hyé nyɛ nɛ́: «Óm ɓɛ́hɛ á líɓembá lí ŋgoo nɛ́ bi níŋgí yɔ́ á nyúū.» 13La Yésus ɔ yéɓe. Váŋ nɛ́ má pám nyɔ́ŋ mut á nyúū, mú níŋgí ŋgoo á nyúū; la jéŋ liɓembá lísɛ jé lí ɓɛ́ɛ́la jam ákaa akóó á ŋgoo áɓáa lú yɔ́lɔ́ á lóō lí ɔ́kolá, lú ɓɛ́hán á ébúle, lú tíɓe. 14Ɓatát yíŋ ŋgoo bú nāŋgá m̀bíí, bú kɛ li camanɛ lí nyíŋ pɔ́l á tísɔn la á ɓɔ́ɔ̄n bí míkɔŋ bísɛ. Ɓot bú sɔ́ li légɓe lí yéé yá loo. 15Ɛnɛ́ ɓá pám ɓɛ́ɓɛ la Yésus, bú ɛ́n nyɔ́ mut a ɓɛ́ɛ́la mimbúl míɓē ŋgandag a tɔ́ɔ̄, a jáhɛ mbɔ́tí, ɔ tímān nyaa m̀ɓɛɛŋ, Náŋ ɔ kɔ̄nhánɛ́ ɓɔ woŋ. 16Ɓá bí ɛ́nɛ́ɛ́ yéé yá loo, bú máŋlɛ́ ɓɔ mam mísɛ má looléné mut a mimbúl míɓē elɔŋ la ŋgoo. 17La ɓɔ́ bú ɓōtlé li sɔ́hye lí Yésus nɛ́ a nɛ́ŋɛ̄ la ékombo yáɓá. 18Eceg Yésus a ŋgí níŋgi á m̀ɓoŋgó, mut a ɓɛ́ɛ́la mimbúl míɓē ɔ sɔ́hyé nyɛ nɛ́ bí byáŋ elɔŋ. 19Ndí Yésus ah yéɓyée ɓé, ndí ɔ lága ja nyɛ́ nɛ́: «soóg á átān wɔ́ɔ, kɛɛ́n máŋlɛ́ ndog yɔɔ yé ɛ́sɛ Nyɔ́ŋ-Ɛsáŋɛ́, átē a ekɔnan-ŋgɔ́ɔ́ yɛ́ɛ́ a ɓɔ̄ŋlé wa.» 20Váŋ nɛ́ nyɔ́ŋ mut a kɛ, ɔ ɓōtlé li camanɛ á yéŋ epah ékombo yé Jóom lí Tísɔn yé ɛ́sɛ Yésus a ɓɔ̄ŋlé nyɛ. Ɓot bísɛ bú nyág.

Yésus ag tɔɔyɛ mindígá wā mbólí, ag pahyɛ ki ŋgɔn nyí Yálius

(Mat 9.18-26; Lúk 8.40-56)

21Eceg Yésus a cágáá á nyúŋú mií á ébúle la m̀ɓoŋgó, límut lú díí nyɛ́ á ŋgwáāg mindím. 22Váŋ nɛ́ ŋ̀kanʼyɛ wa átē a ɓakanʼyɛ ndáá-miɓomán bí ŋga yáŋa nɛ́ Yáīlos a ɛ́n nyɛ, ɔ sɔ́, ɔ kúēlé nyɛ á míkoo; 23ɔ díit nyɛ la nzɔ́hyé nɛ: «Ŋgɔn yama ɛg somo li wú, sɔ́ ɔ káhyɛ́ yɔ mɔ á li ɓɔŋ nɛ́ ɛ sūŋɓɛ̄ ndí ɛ nīŋ.» 24Yésus ɔ kɛ elɔŋ la nyɛ́, ndí limut licɛ́ŋ lí ŋgí oŋ nyɛ́, lú pagtánɛ́ nyɛ. 25Váŋ nɛ́ míndīgá wa nyɔ́ micii mí ŋgí pám, náŋ ag ɓɔŋ jóom lí mímbú la míɓáa lɛn, 26a kuhúú ŋgandag ndutu á li yɛ́ŋgan á yóg ɓot bí mítāālán, a pámhɛ́ɛ ki yé ɛ́sɛ a ɓɛ́ɛ́la ákaa ŋkuh, ɛ́h ɓɛ́ ɓé lí ɛ́n lí mveŋghanɛ́ tɔ wa; ndí á bíŋ bísɛ, nyuú ɛ́ ŋgí dit bí lí dit. 27Kasig nyɔ́ŋ mindígá a ámbléé yéé ɓot bí ŋgí kwɛl likɔlɓan la Yésus, ɔ níŋgí átē á jéŋ limut, ɔ sɔ́lé Yésus á mbúh, ɔ síiɓán mbɔ́tí yɛ́ɛ̄. 28Ákaa ɛ́sɛ a ŋgí laglan nɛ́: «Kíyáɓɛ́nɛ ma lá tɔ li siiɓan lí mbɔ́tí yɛ́ɛ̄, mag suŋɓɛ.» 29Á ékūyá-kúyá, micii mú sɛ́m, ɔ ógtán nɛ́ ɔkɔn vɛ́ɛ́ vá man. 30Á nlemlem á éceg, Yésus ɔ ógtán nɛ puh ŋguu ya pám nyɛ á nyúū. Ɔ yáan átē a limut, ɔ bíhī nɛ: «Nzáá a síiɓán mbɔ́tí yáma é?» 31Ɓayége ɓɛ́ɛ́ bú tímānɛ̄ nyɛ nɛ́: «Wā-mɛ̄n ɔg ɛ́n ákaa limut lá kág wa, ndí ɔg ɓáá m̀mím lí ɓat nɛ́: ‹Nzáá a síiɓán ma é?›» 32Ndí Yésus ɔ yáanɛ́ miíh voóm asɛ̄ á li légɓe lí nzáá a ɓɔ̄ŋ náŋ. 33Váŋ nɛ́ nyɔ́ŋ mindígá, ákaa a ŋgí yí yéé yá loo, ɔ sɔ́ ag sɛ́glan la woŋ, ɔ kū Yésus á sí míkoo, ɔ lága nyɛ mbálɛ ɛsɛ̄. 34Ndí Yésus, ɔ lága nyɔ́ŋ mindígá nɛ: «Á ŋgɔn yama, ŋyéɓé wɔ́ɔ wá sūŋ wa, kɛnɛ́g la nsaŋ, ɔkɔn vɔ́ɔ vá man!»

35Yésus a ɓɛ́ɛ́ a ŋgí pɔ́tɔg eceg ɓot bí sɔ́léé á yóg ŋ̀kanʼyɛ ndáá-miɓomán Yálius á li laga lí nyɛ nɛ́: «Ŋgɔn yɔɔ ya wú, yéé pɛ ɔ ŋgí teeŋgɛ́gɛ́ Ŋ̀yéglɛ é?» 36Ndí Yésus, ɛ́h ɓɛ́ ɓé li nyɔŋ lí eceg la bíŋ biɓaŋgá, ɔ yó ŋ̀kanʼyɛ ndáá-miɓomán nɛ: «Ɔh kɔnɔ́g ɓé woŋ, ɓɛ́ ja la ŋyéɓé.» 37Amáh sig Pétlos, Yákop la Yohánɛs mɔɔ́nyāŋ á Yákop, Yésus ah yéɓyée ɓé nɛ mut ntám tɔ wa a kɛ́ elɔŋ la nyɛ́. 38Li pám á yóg ŋ̀kanʼyɛ ndáá-miɓomán, eduŋgú ɛ́ ɓɛ́ɛ́ ŋgandag. Yésus ɔ ɛ́n ɓot bíg lee, bíg tɛ́ɛ milón. 39Ɔ níŋgí á ndáá, ɔ lága ɓɔ́ nɛ́: «Yéé ɛ́ lɛ ŋgandag eduŋgú la yí cíŋ míwū é? Mɔɔ́n ah wúág ɓé, a lɛ ja á ɔlɔ́.» 40Ɛnɛ́ ɓá ɓōtlé li ɔl lí Yésus, ɔ pámɛ ɓot bísɛ á ápūū, ɔ yéglé ja elɔŋ la ɛsáŋɛ́ la nyaŋɛ́ á mɔɔ́n, la ɓot bí sɔ́ɔ́ nyɛ li yígɛ. Bú níŋgí ápah mɔɔ́n a ɓɛ́ɛ́ á náŋɛ, 41Yésus ɔ byée nyɛ á wɔ, ɔ lága nyɛ nɛ́: «Talíta kum», náŋ a lɛ nɛ́: «Á ŋgɔn-mindígá, mag pɔ́t, ɔg vɛɛɓe!» 42Á ékūyá-kúyá, ŋgɔn-mindígá yu tɛ́lɛ, yu ɓōtlé li wɛɛ. A ɓɛ́ɛ́la jóom lí mímbú la míɓáa. Náŋ ɔ nyágɛ́ ɓá bísɛ bí ɓɛ́ɛ́ váŋ tɔláá. 43La Yésus ɔ ɓéhyɛ́ ɓɔ nɛ́ bíh ɓɔŋɔ́g ɓé nɛ mut tɔ wa a yí náŋ; ámbúh náŋ, ɔ lága ɓɔ nɛ́ bí tí ŋgɔn-mindígá lidí.

Currently Selected:

Málkus 5: NTB

Highlight

Copy