Málkus 12
12
Ɔŋgaáŋgan ví bíɓēɓéyɛ bí ɓáɛŋ-kɔ́mbɔ
(Mat 21.33-46; Lúk 20.9-19)
1Ámbúh náŋ, Yésus ɔ kánɛ ɓákanʼyɛ ɓatíi-nsúlé la ɓayí-mbéndá ví aŋgaáŋgan nɛ́: «Mut wa a sáláá ǹdíí á bínyɛŋgɛ́n bí wáany, ɔ céŋ wɔ kɔ́tá, ɔ ɓɔŋ m̀ɓáláŋ á m̀ɓálá até ányúū li pámɛ lí mílɔg, ɔ óŋ njóŋgi á li ee li wɔ. Ámbúh náŋ ɔ tí wɔ ɓaɛŋ, ɔ kɛ́ á duwɛ.
2Ɛnɛ́ eceg yá kɔlan, ɔ óm m̀ɓɔŋle wɛɛ́ wa á yóg ɓaɛŋ á lí ɓat lí ɓɔ ɛjɛ́ɛ́ joga. 3Ɓaɛŋ bú byeé nyɛ, bú úm nyɛ bikút, bú sóɛ̄ nyɛ mɔ nsɔ́. 4Ɔ tíman ɔ óm sīg-pɛ m̀ɓɔŋle ntám; nyɛ́g bú lɔ́g nyɛ á m̀mú, bú óŋó nyɛ. 5Ɔ kōndyé ɓɔ́ li óm lí m̀ɓɔŋle ntám sīgpɛ, nyɔ́ŋ, bú ól nyɛ. Yíŋí ŋgandag ɓáɓɔŋle ɓatám a ómóó, bí ŋgí úm ɓá bikút, ɓáŋá ɓatám bíg ól. 6M̀wɛɛ́n ǹdíí ɔ yéglán já edidíŋɛ yɛ́ɛ́ mɔɔ́n yɔ́-ntámɛ́. Á mísúgle ɔ óm yɔ la mí míɔ̄ŋɔ nɛ́: ‹Bíg kɛ nyɛ́ lí ditɛ.› 7Ndí ɓaɛŋ-kɔ́mbɔ bú laglán nɛ: ‹Ŋ̀yéglan-embámbá nyɔ́ sɔ́án! Bi ól nyɛ́, bi yéglán émbāmbá.› 8Váŋ nɛ́ ɓá byeé nyɛ, bú ól nyɛ bú léé m̀bim wɛ́ɛ́ énɛŋɛ́ la ǹdíí. 9Ɓaá yéé m̀wɛɛ́n ǹdíí a ŋga kɛ́ li ɓɔŋ é? Ag kɛ li sɔ́, a ól ɓáŋ ɓaɛŋ, a tí ǹdíí wɛ́ɛ́ ɓáɛŋ ɓatám. 10Manáh sɔ́ŋgɔ ɓé pɔ́n yé epah Lícii-Lipúán ɛ́ ŋga yó nɛ́:
‹Ŋgɔg nyí ɓaóŋ ndáá ɓá ɓen,
yɔ nɛ́ ya tímān lí ɓɛgɛ lí ndáá é!
11Miɓɔŋɔg mí Nyɔ́ŋ-Ɛsáŋɛ́ miŋ;
sē líŋgɔ̄ŋɔ́ a miíh máhá é!›»
12Ɓakanʼyɛ ɓatíi-nsúlé la ɓayí-mbéndá bí ŋgí somo li byee lí Yésus ndí, bú kɔn límut woŋ. Átɔm nɛ́ bí sɔ́ŋtánɛ nɛ́ ányúū yaɓá nɛ a kánɛ víŋ ɔŋgaáŋgan. La ɓɔ́ bú yíg Yésus bú kɛ.
Mbihi likɔlɓan la táas bí ŋga nyɛ́ɛ li sála lí káísa ecɛ́ŋ
(Mat 22.15-22; Lúk 20.20-26)
13Ɓakanʼyɛ ɓatíi-nsúlé, ɓayí-mbéndá la ɓacɛ́ŋ bí lílōmɛ bú óm puh ɓot yí Élōg-Falísái la ɓot bí nlɔŋ á Élóde nɛ́ bí ám Yésus á biɓaŋgá byɛ́ɛ́. 14Váŋ nɛ́ ɓá sɔ́ li laga lí Yésus nɛ́: «Á Ŋ̀yéglɛ biíg yí nɛ́ ɔ lɛ mbálɛ, ɔ ŋgɔ́ mwáhɛ ɓé ki nɛ́ tɔ mut a dúmbɛ́ɛ wa. Ɔ ŋgɔ́ légɓe ɓé eɓɛ́lé yé ɓot ndí ɔg étɛ ɓɔ́ nzen nyí Ɔlolómɛ̄ átē á mbálɛ. Ɓaá ɛ́ lɛ́ kundɛ tɔ nɛ́ kɛ́m li sála lí táas á yóg káísa ecɛ́ŋ é? Ɓaá ɓa nyɛ́ɛ yɔ li sála tɔ nɛ́ kɛ́m é?» 15Ákaa Yésus a ŋgí yí nɛ́ bí lɛ́ ɔ́taɓa, a byɛ́la ɓɔ́ nɛ́: «Ányúū yéé miní ŋga ám ma é? Sɔ́án la ma épah ɛ́ kápa mi légɓé yɔ́.» 16La ɓɔ bú sɔ́la nyɛ yá. Yésus ɔ ɓāt ɓɔ nɛ́: «Asú la joó lí nzáá bí lɛ́ múŋ é?» La ɓɔ́ bú pélē nyɛ nɛ́: «Bí káísa ecɛ́ŋ». 17Yésus a byɛ́la ɓɔ nɛ́: «Miní tímánɛ Káísa ecɛ́ŋ yé ɛ lɛ yé Káísa ecɛ́ŋ, miní tímānɛ ki Ɔlolómɛ̄ yé ɛ lɛ yé Ɔlolómɛ̄.» Ndí ɓáŋ ɓot bísɛ bú nyág ŋgandag la mbele yɛ́ɛ̄.
Lipahye lí ɓot ɓá wú
(Mat 22.23-33; Lúk 20.27-38)
18Ámbúh náŋ, ɓot bí Sadúkái ɓá bí ŋgí laga nɛ́ lipahye lí sē ɓé, bú sɔ́ á ŋgwáāg Yésus, la ɓɔ́ bú ɓāt nyɛ nɛ́: 19«Á Ŋ̀yéglɛ, Móse a cíi ányúū yāhá nɛ: ‹kíyáɓɛ́nɛ mut wa a byɛ́ɛ́ mɔɔ́nyāŋ a páam ndí a wú, a yíg ŋkúh ŋgíla mɔɔ́n, mɔɔ́nyāŋ ag koto ŋkúh wɛ́ɛ́ á lí ɓɔŋ nɛ́ a kól nyɛ́ mbota.› 20Linyaŋ lí páam nzambúwá jéŋ, nyɔ́ ɔsú ɔ lɔ́m míndīgá, ɔ wú ɛ́h ɓɛ́ ɓé lí yíg lí mɔɔ́n. 21Nyɔ́ a yáhɛ́ bíɓáa ɔ kótō nyúŋ ŋkúh, ɔ wú ɛ́h ɓɛ́ ɓé lí yíg lí mɔɔ́n, nlemlem la nyɔ́ a yáhɛ́ bíŋháa. 22Jéŋ linyaŋ nzambúwá lísɛ líh yígíi ɓé mbota. Ámbúh yaɓá ɓɔ́ bísɛ, mindígá nyɛ́g ɔ wú. 23Á eceg lípahye lí ɓá ɓá wú, kí jéŋ linyaŋ lā tɛ́lɛ, ɓaá, nzáá á póla yaɓá a ŋga kɛ́ li ɓɛ́ lí nlóm á nyɔ́ŋ mindígá é? Átɔm nɛ́ ɓɔ́ nzambúwá ɓá tɔɔ́ la nyɛ́ ákaa ŋ̀gáá.» 24Yésus ɔ pélē ɓɔ́ nɛ: «Ɛ́ sē ɓé mbálɛ nɛ́ ŋgilí yí yaná nyí biciilé la nyí ŋguu Ɔlolómɛ̄ nɛ ɛ ŋga óm ɓɛ́nɛ á ɔ́vuha é?» 25La mbálɛ eceg mut a ŋga pāhye átē a ɓá ɓá wū, a ŋgá lɔ́mɓan ɓé pɛ, ndí ag ɓɛ́ ja ákaa áŋgɛl ɛ́ lɛ́ á lóō. 26Likɔlɓan la lipahye átē a ɓá ɓá wū, ɓaá, maná sɔ́ŋgɔ ɓé kálati Móse ápah a ŋga laga pɔ́l nyí ekaŋga ɛ́ ŋga lóŋ ɛ́h ɓɛ́ ɓé lí sííɓe é? Ákaa láá Ɔlolómɛ̄ a kwɛ́lɛ̄ nyɛ nɛ́: «Ma nɛ́ mi lɛ Ɔlolómɛ̄, Loó lí Áblaháam, Loó lí Ísaak, la Loó lí Yákob. 27Ɔlolómɛ̄ a sē ɓé Lōó li ɓot ɓá wú, ndí jé lí ɓá bí lɛ́ á éniŋ. Yíán hɔ́ nɛ maná yɔ́p.»
Litiŋ lí ɔ́sū lí mbéndá ɔsú
(Mat 22.34-40; Lúk 10.25-28; 20.39-40)
28Ɛnɛ́ ŋ̀yí-mbéndá wa a ámblé ɓɔ́ bíg kála, ɔ sīŋgle, ɔ ɛ́n nɛ Yésus a pélē ɓáŋ ɓot bí Élōg-Sadúkái m̀ɓɛɛŋ. Váŋ nɛ́ a sīŋglé Yésus ɓɛɓɛ ɔ ɓāt nyɛ nɛ́: «Jɔɔ́jɔ́ɔ litiŋ lí mbéndá lí ŋga lōo míŋí mísɛ é?» 29Yésus ɔ pélē nyɛ nɛ́: «Litiŋ lí ɔ́sū lí mbéndá jé nɛ́: Ámblé a Íslāɛl! Ɛtáŋɛ Lōó jáhá a lɛ pɔmbɛ Nyɔ́ŋ-Ɛsáŋɛ́. 30Ɔg kɛ li diŋ lí Nyɔ́ŋ-Ɛsáŋɛ́ Lōó jɔ́ɔ la m̀mím wɔ́ɔ ásɛ, la liɓɛ́ɛg jɔ́ɔ lísɛ la miɔ́ŋɔ mɔ́ɔ mísɛ la ŋguu yɔɔ ɛsɛ̄. 31Litiŋ lí mbéndá lá yáhɛ́ míɓáa jé nɛ́: Ɔg kɛ li diŋ lí mɔ́ɔ̄nɛ́sɔ̄ŋ ákaa wā-mɛ̄n. Litiŋ lí mbéndá tɔ já lí ŋga lōo míŋ ɛ sē ɓé.» 32Váŋ nɛ́ nyɔ́ŋ ŋ̀yí-mbéndá a lága Yésus nɛ́: «Náŋ a lɛ m̀ɓɛɛŋ ŋgandag á Ŋ̀yéglɛ, wa pɔ́t mbálɛ. Ɔlolómɛ̄ a lɛ pɔmbɛ, ntám á sē ɓé pɛ; 33li diŋ lí nyɛ la m̀mím wɔ́ɔ ásɛ, la eyí yɔ́ɔ ɛ́sɛ la ŋguu yɔɔ ɛsɛ̄, la li diŋ lí mɔ́ɔ̄nɛ́sɔ̄ŋ ákaa wā-mɛ̄n. Náŋ ag loo yaa misúlé mí bí ŋga dígɛ la mí bí ŋgá dígɛ ɓé.» 34Ɛnɛ́ Yésus a ɛ́n nɛ́ a pélē nyɛ a nyaa ɛ tɛ́ɛ́, a byɛ́la nyɛ nɛ́: «Ɔ sē ɓé énɛŋɛ́ la Ekombo Ɔ́lolómɛ̄.» Mut tɔ wa ah láa ɓé pɛ nyɛ́ li bihi lí tɔ jam.
Dávid la Nyɔ́-a-Pɔ́hlɛ
(Mat 22.41-46; Lúk 20.41-44)
35Kasig Yésus a ŋgí yéglɛ á ndáá-ēcɛ́ŋ-Ɔlolómɛ̄, ɔ nyɔ̄ŋ mpɔ́t a byɛ́ nɛ: «Nɛ láá ɓayí-mbéndá bí ŋga lá li pɔ́t nɛ́ Nyɔ́-a-Pɔ́hlɛ a lɛ mɔɔ́n Dávid é? 36M̀búl Mpúán nyɛ́-mɛ̄n a yíglé Dávid li laga nɛ́:
Nyɔ́ŋ-Ɛsáŋɛ́ a laga Ɛtáŋɛ wama nɛ́:
Tɔɔ́ á m̀ɓɛ́nlómɛ wama
nɛ tɛ́ɛ ma vá ɓálem ɓɔ́ɔ
á sí yɔ́ɔ míkoo.
37Jɔ́ hɔ́ nɛ́ Dávid nyɛ́-mɛ̄n a ŋga yáŋa nyɛ nɛ́ Nyɔ́ŋ-Ɛsáŋɛ́; nɛ́-láá a lɛ hɔ́ nyɛ́ mɔɔ́n é?» Limut licɛ́ŋ lí ŋgí ámblé nyɛ la mivag.
Yésus ag tɛ́ŋgánɛ ɓayí-mbéndá
(Mat 23.1-12; Lúk 20.45-47)
38Eceg Yésus a ŋgí yéglɛ, a ŋgí laga nɛ́: «Nyɔŋán lítāt lá ɓayí-mbéndá bí ŋga díiŋ li wɛɛwɛɛ la mitaandá mí mbɔ́tí, la ŋgandag mítamlan á ɓávoóm bí límut, 39li tɔɔ a bitɔ bí ɔ́sū a ndáá-míɓomán, la bitɔ bí ɔ́sū á ndáá-míndēmá. 40Ɓɔ́ ɓot bí ŋga nyɔ̄ŋ miɓɛɛŋ mí míkūh mí ɓóndīgá la li laaɓɛ lí míkánɛ, bíg kɛ li kuh lí ékɔ́ghɛ yé ŋguu li loo lí ɓot bísɛ.»
Likaale lí ŋ̀yɛ́ɛ́yɛ́ɛ a ŋkúh á míndīgá
(Lúk 21.1-4)
41Kasig Yésus a ɓɛ́ɛ́ á tɔ́ɔ̄ ɔ́sū ví ésɛɛ ɛ́ míkaale, ag légɓe ákaa ɓot bí ŋgí lɛŋgɛ ŋkuh múŋ, ɔ ɛ́n mímbyaŋ mí ɓot ŋgandag míg vá mbáŋ-mbáŋ ŋkuh átē, 42ŋgɔ́ɔ́ ŋkúh á míndīgá ya yɔg yu sɔ́, yu lɛ̄ŋgɛ́ ɓɔ́ɔ̄n bí kápa bíɓáa múŋ á ŋkúú á míkaale. 43Váŋ nɛ́ Yésus a yáŋa ɓayége ɓɛ́ɛ́ a byɛ́la ɓɔ́ nɛ́: «La mbálɛ mag laga ɓɛ́nɛ nɛ́, nyí ŋgɔ́ɔ́ ŋkúh á míndīgá ya tí li loo li ɓáŋá ɓot bísɛ; 44átɔm nɛ́ ɓáŋá bísɛ ɓá tí ákaa likaale yé ɛ́h byɛ́ɛ́ ɓé ɓɔ nsɛ́ŋ, ndí nyɛ́, la ŋgɔ́ɔ́ yɛ́ɛ̄ ɛsɛ̄, a tí yé ɛ́sɛ a mɓɛ́la ányúū li niŋ.»
Currently Selected:
Málkus 12: NTB
Highlight
Share
Copy

Want to have your highlights saved across all your devices? Sign up or sign in
© 2023, CABTAL