Málkus 11
11
Yésus ag níŋgi kaa káísa á Yélūsalɛm
(Mat 21.1-11; Lúk 19.28-40; Yhn 12.12-16)
1Ɛnɛ́ Yésus la ɓayége ɓɛ́ɛ́ bí siŋgléé ɓɛ́ɓɛ la Yelúsalɛm, á ŋgwáāg mikɔŋ mí Betfagéa la Betánia, jé lí ɔ́kolá ví tín ɛ́ Olíva#11.1 (Á kaa Lúkas 19.29) Bíŋ biéé bí lɛ́ kaa miyaa, mbóó yɛ́ɛ́ ɛ́g tíi miwúú, biɓám byɛ́ɛ́ ki bí lɛ́ bílāām ŋgandag ányúū kápínda. , ɔ óm ɓáyēge ɓɛ́ɛ́ bíɓáa, 2a byɛ́la ɓɔ́ nɛ́: «Kɛnán á ŋkɔŋ á lɛ́ ɔ́sū váná, Eceg miní ŋga kɛ́ li pám wóŋ, miníg kɛ li kɔ́p lí mɔɔ́n jákāas a tíŋɛ nyɔ́ tɔ mut āh mɓétég ɓé á lóō jɛ́ɛ́, Tiŋlán nyɛ́ miní sɔ́ la nyɛ́. 3Ndí kíyáɓɛ́nɛ mut a ɓāt ɓɛ́nɛ nɛ́: ‹Ányúū yéé miní ŋga tíŋi nyɛ́ é?› Peelán nyɛ́ nɛ́: ‹Nyɔ́ŋ-Ɛsáŋɛ́ a byɛ́ɛ́ kóó la nyɛ́›, ag kɛ ɓɛ́nɛ nyɛ́ li vóo lí li tíi.» 4La ɓayége bú kɛ, bú kɔ́p mɔɔ́n jákāas ápūū, a tíŋɛ ɓɛɓɛ la likooká lí ndáá nyí ɛ ɓɛ́ɛ́ ɓɛ́ɓɛ váŋ á ŋgwáāg nzen. Bú tīŋí nyɛ. 5Apuh á ɓot nyú á ɓɛ́ɛ́ váŋ wú bíhī ɓɔ nɛ́: «Ányúū yéé miní ŋga tíŋi nyɔ́ŋ mɔɔ́n jákāas é?» 6Ɓayége bú pélē ɓɔ ákaa Yésus a lagléé ɓɔ; váŋ nɛ́ ɓá mwahɛ́ ɓɔ nɛ bí kɛ́la nyɛ́. 7Bú sɔ́la Yésus nyɔ́ŋ mɔɔ́n jákāas, bú táa mbɔ́tí yáɓá á ŋkag wɛ́ɛ́, la nyɛ́ ɔ tɔ́ɔ̄ á lóō jɛ́ɛ́. 8Ɓot ŋgandag bú táa mbɔ́tí yáɓá á nzen, ɓáŋá ɓatám bú táa péná ɛ́ ɓɔ́ɔ̄n bí mícāā bí sɛ́mɛ́ɛ́ á pɛ́ɛ́. 9Ɓot bí ŋgí wɛɛ ɔ́sū ví Yésus la ɓá bí ŋgí oŋ nyɛ́ á mbúh bí ŋgí lón nɛ́: «Osána! Ndómbo ɛ ɓɛ́ la nyɔ́ a ŋga sɔ́ á jóō lí Nyɔ́ŋ-Ɛsáŋɛ́. 10Ndómbo ɛ ɓɛ́ la líkanʼyɛ lí Dávid Etāa wahá, likanʼyɛ lí ŋga sɔ́! Osána á loó-loó!» 11Yésus ɔ níŋgí á Yélūsalɛm, ɔ kɛ́ á ndáá-ēcɛ́ŋ-Ɔlolómɛ̄. Ɛnɛ́ a légɓé mam mísɛ mí ɓɛ́ɛ́ nyɛ́ á ŋgwáāg, kasig náŋ a ɓɛ́ɛ́ ébúg-lóō ɔ nyɔ̄ŋ nzen li kɛ á Betánia elɔŋ la jóom jɛ́ɛ́ lí ɓáōmɓɛ la bíɓáa.
Yésus ag lɔg tín ɛ fígiya
(Mat 21.18-19)
12Ɛnɛ́ kítí ya yɛ́, á míɓógo máɓá mí Betánia, nzal yu byée Yésus. 13La nyɛ́ ɔ ɛ́n tín ɛ fígiya#11.13 Fígiya ɛ lɛ eéé ɛ́ ŋga wúm mitám kaa ŋgwáɓan. enɛŋɛ́ ɔ́sū nyí ɓɛ́ɛ́la awáá. Ɔ kɛ́ li légɓe kíyáɓɛ́nɛ ag la li kuh lí mitám tɔ máŋvéé muŋ. Ndí ɛnɛ́ a siŋgléé, ɔ kɔ́p ja áwāā la awáá, átɔm nɛ́ eceg yɛ́ɛ́ li úm ɛ́ ɓɛ́ɛ́ ŋgí lí kɔlan. 14Váŋ hɔ́ nɛ a lága nyíŋ tín ɛ fígiya nɛ́: «Á m̀ɓá la m̀ɓá, mut āh dí ɓé pɛ litám jɔ́ɔ.» Ɓayége ɓɛ́ɛ́ bú ámblé yé a pɔ́t.
Yésus ag duhu ɓot á ndáá-ēcɛ́ŋ-Ɔlolómɛ̄
(Mat 21.10-17; Lúk 19.45-48; Yhn 2.13-16)
15Ɛnɛ́ ɓá pám á Yélūsalɛm, Yésus ɔ níŋgí á ndáá-ēcɛ́ŋ-Ɔlolómɛ̄, ɔ ɓōtlé li duhu lí ɓot bí ŋgí nuŋu la ɓá bí ŋgí sóm. Ɔ ɓōtlé ki li ɓɛ́h lí téɓeli á sí yí ɓáveŋghanɛ-mɔní, la aɓɛlá á ɓánuŋu aɓeŋ. 16Ah mwáhɛ́ɛ ɓé tɔ mut nɛ́ a póghán la jam múŋ átē. 17Ámbúh náŋ, ɔ ɓōtlé li yéglɛ lí ɓot, a byɛ́la ɓɔ́ nɛ́: «Ɓaá yáh ciiɓɛ ɓé nɛ: Ndáá yáma ɛg kɛ li yáŋlɛ nɛ́ ndáá mikánɛ ányúū milóm mísɛ é? Ndí ɓɛ́nɛ, maná yaanɛ́ yɔ lisɔlɓéné lí mítɔnɓa.» 18Ɛnɛ́ ɓakanʼyɛ ɓatíi-nsúlé la ɓayí-mbéndá ɓá ámblé yé ya loo, bú ɓōtlé lí veg lí peg ákaa láá ɓá nyɛɛ́ lí ólhánɛ lí Yésus; átɔm nɛ́ bí ŋgí kɔn nyɛ́ woŋ, kasig limut lí ŋgí mɛmɛ nyɛ́ likɔlɓan la yé ɛ́sɛ a ŋgí yéglɛ. 19Á ébúg-lóō, Yésus la ɓayége ɓɛ́ɛ́ bú ɓógo á nyíŋ tísɔn.
Ŋguu mikánɛ até a ŋyéɓé
(Mat 21.20-22)
20Eceg bí ŋgí loo la kítí, bú ɛ́n nɛ nyíŋ tín ɛ fígiya ya wú, yu óm nɛ́ kɛ́lɛ́t tɛɛla á míkaŋ. 21La Pétlos ɔ ɔ́ŋɔ́ yé Yésus a pɔ́tɔ́ɔ́, ɔ lága nɛ: «Á Ŋ̀yéglɛ, légɓé sig, nyí tín fígiya wa lɔ̄g ya wú.» 22Váŋ nɛ́ Yésus a lága ɓɔ́ nɛ́: «Ɓɛ́án la ŋyéɓé la Ɔlolómɛ̄. 23La mbálɛ, mag laga ɓɛ́nɛ nɛ́, kíyáɓɛ́nɛ mut a laga ví ɔkolá nɛ: ‹muglán vá, kɛɛ́n ɓɛ́hán á túwɛ›, kíyáɓɛ́nɛ a ŋgá pendan ɓé á m̀mím, ndí ag yéɓe, yé ɛ́sɛ a lága ɛ́g ɓɔŋɓɛ, la yɔ́ yá yál. 24Jɔ́ nɛ́ mi ŋga lága ɓɛ́nɛ nɛ́: Mam mísɛ miní ŋga kɛ́ li ɓat kí miníg kánɛ, miní ɓɛ́la ŋyéɓé nɛ maná kuh mɔ, mɔ́g mí kɛ ɓɛ́nɛ li tíéɓɛ. 25La náŋ, eceg miní tɛ́ɛ́ miníg kánɛ, kíyáɓɛ́nɛ miníg álye mut, laakánɛ̄ nyɛ́ á lí ɓɔŋ nɛ́ Ɛsɔ́ŋɛ́ waná nyɔ́ a lɛ á lóō nyɛ́g a láákɛ́ ɓɛ́nɛ avuha wáná.» [26]#11.26 Ndí ki manáh laakɛ ɓé ɓáŋá ɓatám, tɔ Ɛtáŋɛ waná nyɔ́ a lɛ á lóō nyɛ́g a ŋga laakɛ ɓé ɓɛ́nɛ aɓé wáná.
Nzáá a tí Yésus likundɛ
(Mat 21.23-27; Lúk 20.1-8)
27Yésus la ɓayége ɓɛ́ɛ́ bú tímān sīg-pɛ á Yélūsalɛm. Ɛnɛ́ a níŋgí á ndáá-ēcɛ́ŋ-Ɔlolómɛ̄, ɔ ɓōtlé li wɛɛ voóm asɛ̄. Váŋ nɛ́ ɓákanʼyɛ ɓatíi-nsúlé, ɓayí-mbéndá la ɓacɛ́ŋ bí lílōmɛ ɓá sīŋglé nyɛ ɓɛɓɛ. 28La ɓɔ́ bú ɓāt nyɛ nɛ́: «La jɔɔ́jɔ́ɔ likundɛ ɔ ŋgɔ ɓɔ̄ŋ míŋ mam. Nzáá a tí wa kundɛ li ɓɔŋ lí mɔ́ é?» 29Yésus ɔ pélē ɓɔ́ nɛ́: «Mag ɓat ɓɛ́nɛ mbihi yāhya; kí maná pélē ma, mág ma laga ɓɛ́nɛ la jɔɔ́jɔ́ɔ likundɛ mi ŋga ɓɔŋ míŋ mam mísɛ. 30Laglán ma: Ɓaá nzoɓan nyí Yohánɛs ɛg sɔ́le la Ɔlolómɛ̄ tɔ nɛ́ la ɓot-bí-bínam é? Peelán ma!» 31La ɓɔ́ bú dūtɛ́ míɔ̄ŋɔ, bú mɔg nɛ: «kíyáɓɛ́nɛ ɓa lágá nɛ Ɔlolómɛ̄, ag ɓat ɓɛ́hɛ nɛ́: Ányúū yéé hɔ́ manáh yéɓe ɓé la nyɛ é? 32Kɛ́m, bí sē ɓé ki nɛ́ ɓa cégē li laga nɛ́: Ɓot-bí-bínam.» Bí ŋgí laga náŋ ányúū nɛ́ bí ŋgí kɔn limut woŋ; kasig ɓot bísɛ bí ɓɛ́ɛ́la á m̀mú nɛ́ Yohánɛs a ɓɛ́ɛ́ taŋ m̀pɔ́tle-a-Ɔlolómɛ̄. 33Váŋ nɛ́ ɓá pélē Yésus nɛ́: «Bi ŋgá yí ɓé ɓɛ́hɛ.» Yésus nyɛ́g ɔ tímānɛ̄ ɓɔ nɛ́: «Tɔ mág, mi ŋgá laga ɓé ma ɓɛ́nɛ la jɔɔ́jɔ́ɔ likundɛ mi ŋga ɓɔ̄ŋ míŋ mam.»
Currently Selected:
Málkus 11: NTB
Highlight
Share
Copy

Want to have your highlights saved across all your devices? Sign up or sign in
© 2023, CABTAL