Yohánɛs 16

1Yésus aá la ɓayége ɓɛ́ɛ́ nɛ: «Ma lagá ɓɛ́nɛ míŋ mam mísɛ á li ɓɔŋ nɛ́ miníh kuág ɓé á míceglan. 2Bíg kɛ ɓɛ́nɛ li duhu á ndáá-míɓomán, li loo náŋ, ŋgɛ́ŋ ɛg sɔ́, nyí mut a ŋga kɛ́ ɓɛ́nɛ li ól a ŋga kɛ́ li ɔ́ŋɔ́ nɛ́ ag tíi Ɔlolómɛ̄ nsúlé. 3Bíg kɛ li ɓɔŋ náŋ ányúū nɛ ɓáh yí ɓé Etāa tɔ ma. 4Mag laga ɓɛ́nɛ náŋ á lí ɓɔŋ nɛ́ eceg nyíŋ ŋgɛ́ŋ ɛ ŋga kɛ́ li kɔlan, miní ɔ́ŋɔ́ nɛ́ mi lagléé ɓɛ́nɛ náŋ.»

Nsɔ́n á M̀búl Mpúán

«Máh laga ɓé ma ɓɛ́nɛ náŋ á bíɓotlé ányúū nɛ́ bi ɓɛ́ɛ́ elɔŋ. 5Ndí nyí vɔ́ŋɔ́ɔ, mag kɛ á yóg mut a óm ma, ndí tɔ mut á elɔŋ yáná ah ɓāt ɓé ma nɛ́: ‹Ɔg kɛ véé é?› 6Ndí kaa ma lagá ɓɛ́nɛ náŋ, maná súnán lí loo lí ɔ́vega. 7Ákaa ɛ́sɛ ma lagá ɓɛ́nɛ mbálɛ. Mikɛ máma mí lɛ́ ányúū nsɛ́ŋ wáná, ányúū nɛ́, kí máh kɛ́ ɓé ma, M̀mɔ́mɛ a ŋgá kɛ́ ɓé li sɔ́ ápah miní lɛ. Ndí kíyáɓɛ́nɛ ma kɛ̄, mag kɛ ɓɛ́nɛ nyɛ́ lí ómle. 8Eceg a ŋga kɛ́ li sɔ́, ag kɛ́ li étɛ lí ɓot bí ŋkɔŋ-á-sí nɛ́ ɓá yɔ́p likɔlɓan la aɓé, etɛ́l-sim la ŋkál. 9Likɔlɓan la aɓé, ag kɛ́ li étɛ nɛ́ ɓá yɔ́p ányúū nɛ bí ŋgá yéɓe ɓé la ma. 10Likɔlɓan la etɛ́l-sim, ag kɛ́ li étɛ nɛ́ ɓá yɔ́p ányúū nɛ mag kɛ á yóg Etāa, miní ŋga kɛ ɓé pɛ ma lí ɛ́n. 11Likɔlɓan la ŋkál, ag kɛ́ li étɛ nɛ́ ɓá yɔ́p ányúū nɛ Ɔlolómɛ̄ a kááhɛ́ ŋ̀kanʼyɛ a nyú ŋkɔŋ-á-sí 12Mí ŋgí byɛ́ɛ́ mam ŋgandag á li laga lí ɓɛ́nɛ, ndí miní ŋgá la ɓé mɔ́ li ɔ́hánɛ nyí vɔ́ŋɔ́ɔ. 13Eceg M̀búl á mbálɛ a ŋga kɛ́ li sɔ́, ág kɛ ɓɛ́nɛ li yíhɛ lí mbálɛ yɔ ɛsɛ̄, átɔm nɛ́ a ŋga kɛ́ ɓé lí pɔ́t la nyɛ́-mɛ̄n, ndí ag kɛ́ ɓɛ́nɛ li laga li mam a ámble la li yíhɛ́ lí ɓɛ́nɛ yé ɛ́sɛ yá nyɛ́ɛ lí sɔ́. 14Ag kɛ ma lí tíi lí lipém ányúū nɛ́ ag kɛ li kuhlene á yé ɛ lɛ́ ɛ́yáma, la nyɛ́ a yíhɛ́ ɓɛ́nɛ yɔ́. 15Yé ɛ́sɛ Etāa a byɛ́ɛ̄ ɛ lɛ́ ɛ́yáma, jɔ́ nɛ́ ma lága ɓɛ́nɛ nɛ́, ag kɛ li kuhlene á yé ɛ lɛ́ ɛ́yáma, la nyɛ́ a yíhɛ́ ɓɛ́nɛ yɔ́.»

Mitaka míg yaan mivag

16«Puh eceg, miní ŋga kɛ ɓé pɛ ma li ɛ́n, ndí ámbúh puh eceg miní ɛ́n sīg-pɛ ma.» 17Jogo jɛ́ɛ́ lí ɓayége lú ɓātɓán nɛ: «Yéé a ŋga somo ɓɛ́hɛ li laga eceg a ŋga yó nɛ́: ‹Puh eceg miní ŋga kɛ ɓé pɛ ma li ɛ́n, ndí ámbúh puh eceg miní ɛ́n sīg-pɛ ma.› Tɔ nɛ́: ‹Mag kɛ á yóg Etāa é›?» 18Bú ɓātɓán sīg-pɛ nɛ́: «Puh eceg náŋ ag mínɛ nɛ́ yéé é? Bi ŋgá sɔ́ŋtánɛ ɓé ɓɛ́hɛ yé náŋ a ŋga somo li laga.» 19Kasig Yésus a yíí nɛ́ ɓayége bíg somo nyɛ́ lí bihi, ɔ laga nɛ: «Mag yí nɛ́ ɓɛ́nɛ la ɓɛ́nɛ miníg somo ŋgɔpɔ nyí bí biɓaŋgá byáma nɛ́: ‹Puh eceg miní ŋga kɛ ɓé pɛ ma li ɛ́n, ndí ámbúh puh eceg miní ɛ́n sīg-pɛ ma.› 20La mbálɛ-mbálɛ mag laga ɓɛ́nɛ nɛ́, miníg kɛ li lee la li cɛ́lɛ, kí ɓot bí ŋkɔŋ-á-sí ɓɔ́ bíg sophɛ la mivag. Miníg kɛ li taka, ndí mitaka máná míg kɛ li yaan lí mivag. 21Eceg ŋkogɛ a ŋga byée mindígá, ag taka ányúū nɛ́ ŋgɛ́ŋ yɛ́ɛ̄ abyál ya kɔlan; ndí eceg a byál ag vólánɛ esɔghe a kūh; ag kɔn já mivag nɛ́ a byál mɔɔ́n á ŋkɔŋ-á-sí 22Jɔ́ nɛ́, miníg taka nyí vɔ́ŋɔ́ɔ, ndí biíg kɛ sīg-pɛ li ɛ́nan, mimím máná míg kɛ hɔ́ li sophɛ la mivag. Ndí míŋ mivag, tɔ mut á ŋgá kɛ ɓé ɓɛ́nɛ mɔ́ li ɓógtɛ. 23Múŋ á víŋ ɔlɔ́, miní ŋgá kɛ ɓé pɛ ma lí bihi lí tɔ jam. La mbálɛ-mbálɛ mag laga ɓɛ́nɛ nɛ́, ki maná ɓāt Etāa jam á jóō jáma, ag kɛ ɓɛ́nɛ jɔ́ lí tíi. 24Tɛɛla nyí vɔ́ŋɔ́ɔ, miní lɛ́ ŋgí lí ɓat lí tɔ jam á jóō jáma. Ɓatán hɔ́, miníg kɛ li kuh á lí somo nɛ́ mivag máná mí yáal.»

Yésus ag dí ŋkɔŋ-á-sí cíŋ

25«Ma lága ɓɛ́nɛ míŋ mam mísɛ á aŋgaáŋgan, ndí ŋgɛ́ŋ ɛg sɔ́, nyí míh ɓɛ́ ɓé pɛ ma mag pɔ́t la aŋgaáŋgan, ndí nyí mí ɓɛ́ mag nándlene ɓɛ́nɛ mam mí Etāa. 26Múŋ á víŋ ɔlɔ́, miníg kɛ li kánɛ á jóō jáma, mi ŋgá laga ɓé ma ɓɛ́nɛ nɛ́, mag kɛ li kánɛ lí Etāa ányúū yaná; 27átɔm nɛ́, Etāa nyɛ́-mɛ̄n ag dīŋ ɓɛ́nɛ ányúū nɛ́ maná dīŋ ma, la ki nɛ́ maná yéɓé nɛ́ ma pámléné á átē a Etāa Ɔlolómɛ̄. 28Ma pámléné á átē á Etāa li sɔ́ á ŋkɔŋ-á-sí, ndí nyí vɔ́ŋɔ́ɔ mag ɓógo á ŋkɔŋ-á-sí á li timan á yóg Etāa.» 29Ɓayége ɓɛ́ɛ́ bú lagá nyɛ nɛ́: «Ɛ́n nyí vɔ́ŋɔ́ɔ, wa yɛ́lɛ́ mam mísɛ, ɔ ŋgɔ́ pɔ́t ɓé pɛ la aŋgaáŋgan. 30Nyí vɔ́ŋɔ́ɔ, biíg yí nɛ́ ɔg yí jóō nɛ́ jam, ɔh byɛ́ɛ ɓé kóó nɛ mut a bíhī wa tɔ jam. Ányúū náŋ nɛ́ ɓaá yéɓé nɛ́ wa pámléné á átē a Ɔlolómɛ̄.» 31Yésus ɔ pélē ɓɔ́ nɛ́: «Ɓaá, li ɓotle nyí vɔ́ŋɔ́ɔ miníg yéɓé é? 32Ŋgɛ́ŋ ɛ lɛ lí siŋgle, ya nyɛ́g, nyí miní ŋga kɛ́ li caman, mut sig a kɛ́ á ɛ́yɛ̄ɛ̄ épah, miní yíg ma mā-ntámɛ́. Ndí mi sē ɓé ma mā-ntámɛ́, Etāa a lɛ́ la ma. 33Mag laga ɓɛ́nɛ míŋ mam á lí somo nɛ́, á ŋ̀atanɛ́ la ma, miní ɓɛ́la nsaŋ. Miníg kɛ li taka mú á nyú ŋkɔŋ-á-sí, ndí, lethánɛ nyuú ányúū nɛ ma dí ŋkɔŋ-á-sí cíŋ.»

Currently Selected:

Yohánɛs 16: NTB

Highlight

Copy