Yohane 20
20
Yesu anavenyehiwa wa ookhwa
(Mat 28.1-8; Mrk 16.1-8; Luk 24.1-12)
1Ohinase wa Nllapo Namulungu, epiphi ehinamalle, Mariya Magadalena aawa o mahame nave ahoona wi nlluku naavenyihiwavo vamullakoni valle. 2Vano aathamakella wa Simoni Petro ni oohuddera mmodda, olle Yesu aamukondilleeye, aalleella wi, “Apwiya aavenyihiwamo mu nihameninne nave khannadduwella nko yaavitthalliiwa!”
3Vano Petro ni oohuddera mmoddoolle yaakhuma eya o nihamenne. 4Yaathamaka eelli attheene nave oohuddera mmoddooyo aathamaka ahoolla omukhwaranya Petro nave aaphiya va nihamenno mwawaambeella. 5Aawarama atthurumellamo oona ekuwo ddahuruwelliwena Yesunndde koma khaavollowillemo. 6Vano aawattho Simoni Petro amuthwaraka nave aavollowa mu nihame nave ahoona ekuwonndde ddihallelle vaavo. 7Nave ekuwo eyo yaahuruwelle muru wa Yesu ehiri vamodda ni ekuwo ddimoddanndde koma yaavillikiwe va weekhiiwa. 8Vano oohuddera mmoddoolle, oyo aphiyalle va nihamenne mwawaambeella aavollowattho nave ahoona, akhulupilila. 9Ophiyera enthawi yeeyo khayaawiiwesesille mawu a Mulluku awi Yesu anaphwanella ovenya wa ookhwa. 10Vano oohudderaalle yaarowa owaniwa.
Yesu anooneya wa Mariya Magadalena
(Mat 28.9-10; Mrk 16.9-11)
11Koma Mariya ahiimella vaatte va nihame inllaka. Nave inllaka ddiiddo aawarama atthurumella mu nihame. 12Nave wenko aawoona angelo eelli ewanre ddoowara ddaweella ekeraatthille mvo vakonaatthihiwe mutembo wa Yesu, mmodda omuruni ni mmodda ometoni. 13Yaamukoha wi, “Moowe Muninllella tini?”
Ahaakhulla wi, “Ahaavenyihamo Apwiyaaka nave nginadduwella nko yaavitthalliiwa!”
14Allotille ella aarukunuwella otulli nave amoona Yesu iimenlle koma khaamudduwenlle wi olliyooyo aari Yesu. 15Yesu aamukoha wi, “Muninllella tini? Munamwaashaasha aani?”
Vano amweesa wi aari mullupa emata, sika aallota wi, “Mwaarimi mwaakusallemo, killeelleni nko mwaavitthalleenyu nave kiye kaakusewo.”
16Yesu aallota wi, “Mariya!”
Mariya aarukunuwa allota mu Eheberi wi, “Raboni.” Ottaphullella wi, “Ahuddihi.”
17Yesu aamulleella wi, “Ohikiphare vawi nginawelle wa Attiitthaaka. Koma vano khawe wa oohudderaaka waalleelle wi kinahokollweella wa Attiitthaaka ni wa Attiitthaanyu, wa Mullukwaaka ni Mullukwaanyu.”
18Sika Mariya Magadalena aaya aalleella oohudderaalle wi aawoona Apwiya nave yaallota ddenndda wa olliye.
Yesu anooneya wa oohudderaaye
(Mat 28.16-20; Mrk 16.14-18; Luk 24.36-49)
19Misikuwa a nllapo nenno, Nllapo Namulungu, oohudderaalle yaatthukumana vamodda. Yaawalla machiwi kaambiiwa yawoova Ayuda. Vano Yesu aawa iimella variyari viwa allota wi, “Murendelle okhalle ni nyuwaano.” 20Allotilleeye ddenndda aawooniha mattaaye ni epararu ddaye. Sika oohudderaalle yaahakallalla voowoonani Apwiya. 21Yesu aallota wiilli wi, “Murendelle okhalle ni nyuwaano. Miyaano kinuurumani nyuwaano wonanko mmo Attiitthaaka yaakirumalliiwa miyaano.” 22Nave allotilleeye ddenndda ahaaviddeellella allota wi, “Akhellani Munepa Waweella. 23#Mat 16.19; 18.18Mwakhululuka machimo a athu eneerokhululukiwa nave mwaahikhululuka machimwaayo khewa ekhululukiwa.”
Yesu ni Tomasi
24Vano Tomasi, ooromolliwa Didimo, mmodda a oohuddera khumi ni eellaalle, khaakhanllena vamodda ni oohudderaalle, Yesu awiilleeye. 25Sika oohuddera amodda yaamulleella wi, “Noowoona Apwiya!”
Koma Tomasi ahaalleella wi, “Kaahoona makhwata a misomali m'mattani mwiwa nave kaattannya ni eyaallaaka m'makhwatanimmo navettho kaattannya ni nnatta naka mu epararuni mwaye, ngiwa kikhulupilila.”
26Nave viviralle mallapo matthanu ni mararu, oohudderaalle yaarittho mpa mulle nave Tomasi aari vamodda ni yaayo. Machiwi eri oowallawalleene Yesu aawa iimella variyari viwa allota wi, “Murendelle okhalle ni nyuwaano.” 27Vano aamulleella Tomasi wi, “Ttannya ni eyaallaawo mva nave ona mattaaka navettho okolla nnatta nawo ottannye mu epararwaaka. Ohikhalle oohikhulupilila koma okhulupilileke.”
28Tomasi ahaakhulla wi, “Apwiyaaka ni Mullukwaaka!”
29Yesu aamulleella wi, “Wookhulupilila kaambiiwa wookoona? Oodalisiwa tti ayo enakhulupilila naari ehoonille.”
Yoolinga ya nibukhu nenna
30Yesu aheera ddoottikhiniha ddimodda ddinchichi vamiitthoni va oohudderaaye nnddo ddihilembiwe mu nibukhu nenna. 31Koma nndda ddiri mu nibukhu nenna ddoolembiwa wi mukhulupilile#20.31 mukhulupilile: Onani 19.35. wi Yesu tti Mesiya,* Mwaana a Mulluku nave wi voomukhulupililani olliyooyo mukhallena okumi.
Currently Selected:
Yohane 20: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
