Yohane 19

1Vano Pilato aalamula wi Yesu awashulliwe. 2 Akhoto yaalluwa echipewa ya miiwa emuwariha m'muruni mwaye nave yaamuwariha mukanjo wooreera woofiira. 3Yaawa wa olliyooyo ellota wi, “Mooselliwa, Mwene a Ayuda!” Nave yaamuukutha.

4Nave Pilato aakhumattho vaatte allota wi, “Kinimamukusella wa nyuwaano vaatte wi mudduwelle wi nginaphwanya mullatu mwa olliyooyo.” 5Sika Yesu aakhuma awarille echipewa ya miiwa ni mukanjo wooreera woofiira. Pilato ahaalleella wi, “Ngamooneni muthoolle tti olla.”

6Nave allupa mukutho uullupalli ni akhoto yamoonilliiwa yaakhuwa wi, “Mutthomeyeni vamutandani! Mutthomeyeni vamutandani!”

Pilato ahaalleella wi, “Nyu mumukuse mwamutthomeye vamutandani olliyooyo. Vawi miyaano nginaphwanya mullatu mwa olliyooyo.”

7Ayudaalle yaamwaakhulla wi, “Nookhalla ni malamulo awi anaphwanella okhwa kaambiiwa ahiiromolla yeekhaaye Mwaana a Mulluku.”

8Pilato iiwalleeye nndda ahoova wunchichi. 9Aavollowattho munthatoni mulle nave aamukoha Yesu wi, “Onavenyera wuuwi?”

Koma Yesu khaawaakhullalle. 10Vano Pilato aallota wi, “Khonallota ni miyaano? Khonadduwella wi kookhalla ni olamulello wawuuttaphulla apaalle wawuutthomeya vamutandani?”

11Yesu ahaakhulla wi, “Khamwaakhallena olamulello va miyaano mwahivahiweke ni Mulluku. Sika muthu oyo akivelleelle wa nyuwaano ookhalla ni machimo muullupalli ohiyana ni nyuwaano.”

12Pilato iiwalleeye nndda aapaalla omuttaphulla Yesu koma Ayudaalle yaakhuwa wi, “Mwamuttaphulla olliyooyo, khamunakhalla mukhwaaye a Kaisara,* o Roma. Muthu oyo anaddeera yeekhaaye wi mwene anavaanyihana ni Kaisara.”

13Pilato iiwalleeye nndda aakhumana Yesu akeraatthi vampandoni wooweeruzella vanipuroni nooromolliwa Nthato namalluku nave mu Eheberi ninaromolliwattho wi Gabata. 14Vano naari Nllapo Nookhozekella Paska waatamella enthawi ya 12 koloko otthaana nave Pilato ahaalleella Ayudaalle wi, “Ngamooneni mwenaanyu tti olla.”

15Yaakhuwa wi, “Mwiipheni! Mwiipheni! Mutthomeyeni vamutandani!” Pilato ahaakoha wi, “Munapaalla kimutthomeye vamutandani mwenaanyu?”

Allupa mukutho uullupalli yahaakhulla wi, “Hi khaninna mwene mmodda koma Kaisarave.”

16Vano Pilato aamuvelleella Yesu wa yaayo wi atthomeyiwe vamutandani.

Yesu anatthomeyiwa vamutandani

(Mat 27.32-44; Mrk 15.21-32; Luk 23.26-43)

Vano yaamukusa Yesu. 17Aakhuma atukhulla mutanda yeekhaaye oyaana o nipuro nooromolliwa wi, “Nipuro na Nikharakadda.” Nno naromolliwa mu Eheberi “Gologota.” 18Yaamutthomeya vamutandani vaavo vamodda ni athu amodda eelli, mmodda o nnattanatta nave mmodda wuunyotthoni nave Yesu variyari. 19Pilato aalemba edduwanyeyiho iiyaatthi vamutandani. Aalembille wi, “Yesu a o Nazareti, Mwene a Ayuda.” 20Nave athu anchichi yaheerenga edduwanyeyiheeyo kaambiiwa Yesu aatthomeyiwe vamutandani vanipuroni noowaatamella muzinda. Edduwanyeyiho yeeyo yaalembiwa mu Eheberi, mu Eroma ni Egriki. 21Allupa mukutho uullupalli yaallota wa Pilato wi, “Muhilembe wi ‘Mwene a Ayuda’ koma wi, ‘Muthu yoolla eehina kiri Mwene a Ayuda.’ ” 22Pilato aallota wi, “Eyo kilembilleemi koolemba.”

23Akhotwaalle yamutthomeyilliiwa vamutandani Yesu, yaakusa ddoowara ddaye eddikawa vasese nave arive akhoto akusa emodda. Yaakusattho mukanjwaaye olle wasowiwe waambeella vaddullu ophiyera vatthi woohiminikiwa. 24#Mas 22.18Vano akhotwaalle yaallota mmodda ni mukhwaaye wi, “Nihaahulle alla koma noombese wi noone wi anaakuse ttaani.” Ddaari ddiiddo wi mawu a Mulluku ekwakhwanihiwe awi,

“Yaakawana ddoowara ddaka

nave yahoombesera va mukanjwaaka.”

Sika akhoto yaheera ella.

25Vakhuviru ni mutanda wa Yesu vahiimella amennya ni mwanamunniwa ni Mariya mwaara a Kleopa ni Mariya Magadalena. 26Vano Yesu awoonilleeye amennya ni oohuddera oyo aamukondilleeye yiimenlle vaavo, ahaalleella amennya wi, “Mutthiyana, ngoonani, olla tti mwaninyu.”

27Nave aamulleella oohudderoolle wi, “Ngoona, alla tti amaayo.” Nave ovenyera enthawi yeeyo oohudderoolle ahaakusa wi yakhalleke owaniwa.

Okhwa wa Yesu

(Mat 27.45-56; Mrk 15.33-41; Luk 23.44-49)

28 # Mas 69.21; 22.15 Yesu aadduwella wi vano ddittheddene ddaamalla. Nave wi mawu a Mulluku ekwakhwanihiwe, aallota wi, “Kinnavolliwa nthona.”

29Vano vaakhalla yookusella yooddalla ni vinyo oonyuunya. Sika yaatthaveya esiponje mu vinyo yiiyaatthi otthoka wa ekopo ya muteekho wa hisope* etukhullella owanoni waye. 30Yesu aamuwirya vinyoolle allota wi, “Ddoomalla!”

Vano aawaramiha murwaaye akhwa.

Enamuhoma Yesu epararu

31Vano attekweene a Ayuda* yaamuveka Pilato wi alamule wi yinttaka meto dda athwaalle yatthomeyiwe nave wi evenyihevo mitembo vamutandani. Yaaveka yeella kaambiiwa naari Nllapo nookhozekella Sabata nave khayaapanlle wi mitembonndde ddikhalle vamutandani va nllapo na Sabata kaambiiwa nllapo na Sabatanno naari naweella. 32Sika akhotwaalle yaawa yinttaka meto dda athu eelli alle yatthomeyiwe vamutandani ni Yesu. 33Koma yaphiyalliiwa wa Yesu, yamphwanyille akhwille khalle, sika khayaawinttakille meto ddaye. 34Nave mmodda a akhotwaayo aahoma epararu ya Yesu ni nivaka nave enthawi yeeyo mwaakhuma nikhame ni maaddi. 35Oyo oonille sika mboni nave ombonaaye ori wawoona. Nave yoolla annadduwella wi anallota ddawoona wi nyuwaanottho mukhulupilile.#19.35 mukhulupilile: Ddoolemba ddimodda ddakhalle ddookhalla ni mawu awi virellellani okhulupilila. 36#Eks 12.46; Num 9.12; Mas 34.20Nndda ddaheereya wi mawu a Mulluku ekwakhwanihiwe awi, “Naari nikhuva naye nimodda khaniwa ninttakiwa.” 37#Zek 12.10; Yaw 1.7Nave mawu a Mulluku enallotattho wi, “Eneeroweha va oyo yaamuhomilliiwa.”

Ovitthiwa wa Yesu mu mahame

(Mat 27.57-61; Mrk 15.42-47; Luk 23.50-56)

38Emanlle yeella, Yosefe o Arimateya, aamuveka Pilato wi avenyihevo mutembo wa Yesu. Yosefe aari oohuddera a Yesu mwawiipittha kaambiiwa awoova attekweene a Ayuda. Pilato ahaakhullella sika Yosefe aaya avenyihavo mutemboolle. 39#Yoh 3.1,2Nave Nikodemo, olle oonanne khalle ni Yesu mahiiyu aawattho. Aawaana makhura a nthuko naphaama a mure* oottakanyihera ni aloe,* ollemella wene vakhuviru makilogaramu 30. 40Athu eellaayo yaakusa mutembo wa Yesu ewuhuruwella ni ekuwo vamodda ni makhura a nthuko naphaamaalle moollikana ni makhallello a Ayuda oovitthella mutembo. 41Nave waatamella vanipuroni mvo Yesu aatthomeyiweeyevo vamutandani vaakhalla emata nave m'matanimmo mwaakhalla nihame nanaanweene mmo mwahivitthiwe muthu ovenyera khalle. 42Vano yaamuvitthamo Yesu kaambiiwa naari nllapo nookhozekella nllapo na Sabata navettho nihamenno naari vakhuviru.

Currently Selected:

Yohane 19: MW2019

Highlight

Copy