Yohane 21
21
Yesu anooneyattho wa oohudderaaye
1Ddimallille nndda Yesu ahooneyattho wa oohudderaaye o enyanja ya Tiberiya. Ddeereyille mwawi ddiidda: 2Simoni Petro, Tomasi ooromolliwa wi Didimo, Natanaele a o Kana a Galileya, anamwani a Zebedayo ni eelli amodda a oohudderaaye yaari nimodda. 3#Luk 5.5Vano Simoni Petro ahaalleella amoddaayo wi, “Kinaya kiiphe ehomba.”
Yaallota wi, “Hittho nineeroyaawo ni nyuwaano.” Sika yaatimulla mukallawani koma mahiiyu mattheenaayo kheyaawiiphalle ello. 4Nndduwa nakhumiiwa Yesu ahiimella mukhwipi mwa enyanja nave oohudderaalle khayaadduwenlle wi olliyooyo aari Yesu. 5Vano ahaakoha wi, “Mohiipha ello?”
Yaamwaakhulla wi, “Iyaayi, khaniiphalle ello.”
6 #
Luk 5.6
Ahaalleella wi, “Vokhani nthavi nanyu o nnattanatta na ekallawa nave muneerewiipha ello.” Sika yaavokha nave kheyaaworille opurulla ekaamba yawaata wa ehomba. 7Oohuddera olle Yesu amukondilleeye aamulleella Petro wi, “Tti Apwiya!” Vano Simoni Petro iiwalleeye wi yaari Apwiya aawara yawiikhuneellaaye kaambiiwa khaawarille phaama nave aalluphella mu enyanja. 8Oohuddera amoddaalle yaawa mukhwipi mwa enyanja eri mukallawani epurullaka nthavi nooddalla ni ehomba. Kheyaari voorekama ni mukhwipi mwa enyanja, vakhuviru mamita 100. 9Yaphiyalliiwa mukhwipi mwa enyanja, yahoona munllo wa mankhalla vaavo viri ehomba ni buledi. 10Vano Yesu aallota wi, “Wannani ehomba ddimodda mwiiphalleenyu wene.”
11Sika Simoni Petro aawella mukallawani apurullella nthavinno mukhwipi mwa enyanja. Nthavinno naaddalla ni ehomba dduullupalli 153. Nave naari ddaari ddawaata ddiidda koma nthavinno khanaawaahuwalle. 12Yesu ahaalleella wi, “Waawoni muche.” Nave khaavo mmodda a oohudderaaye allipalle murima omukoha olliyooyo wi, “Nyu ttaani?” Yaadduwella wi yaari Apwiya. 13Sika Yesu aamukusa buledi aavaha alliwaayo. Nave aheerattho emoddamoddave yeeyo ni ehombanndde.
14Yeeyo yaari enthawi yaneeraru avenyilleeye wa ookhwa wi Yesu ooneye wa oohudderaalle.
Yesu ni Petro
15Nave emanlle ocha, Yesu aamulleella Simoni Petro wi, “Simoni, mwaana a Yohane, onnakikonda miyaano ookhwaranya amoddaalla?”
Ahaakhulla wi, “Ee Apwiya, munnadduwella wi kinnuukondani.”
Yesu aamulleella wi, “Achiheke anamwanankhosaaka.” 16Yesu aamukohattho wiilli wi, “Simoni, mwaana a Yohane, onnakikonda miyaano?”
Ahaakhulla wi, “Ee Apwiya, munnadduwella wi kinnuukondani.”
Yesu aamulleella wi, “Achiheke asaanaankhosaaka.” 17Yesu aamukoha waneeraru wi, “Simoni, mwaana a Yohane, onnakikonda miyaano?”
Petro aamoriwa ethakaraka kaambiiwa Yesu aamukoha waneeraru wi, “Onnakikonda miyaano?” Sika aallota wi, “Apwiya, munnadduwella ddittheddene, munnadduwella wi kinnuukondani nyuwaano!”
Yesu aallota wi, “Chihaka enkhosa ddaka. 18Kinimuulleella ddawoona wi waariiwe musombwe, waaniimakella weekhaawo laamba muyuununi mwawo onaya orive weko wapaalleewe. Koma wuulluvalla, oneerowookolla mattaawo wi muthu mmodda uumakelle laamba muyuununi mwawo ni wuukusella nko ohinapaalleewe oyaawo.” 19Voollotani ddenndda, Yesu aadduwanyeyiha dda mmo Petro aneereeye akhwelle moomutitimiha Mulluku. Vano Yesu aamulleella wi, “Kithware!”
Yesu ni oohuddera oyo amukondeeye
20 #
Yoh 13.25
Petro arukunuwalleeye aamoona oohuddera mmodda olle Yesu aamukondilleeye, aathwaraka. Olliyoolla tti olle akeraatthille vakhuviru ni Yesu vamachellelloni nave amukoha Yesu wi, “Apwiya, ttaani oyo anuuvelleelleni wi mwiiphiwe?” 21Petro aamoonilleeye, aamukoha Yesu wi, “Apwiya, vano enaamweereyelle tti tini muthoolla?”
22Yesu aamwaakhulla wi, “Kapaalla wi olliyoolla ahikhwe ophiyera kihokollowille, weyaano ddenndda orina mutteko tini? Kithware!”
23Sika epilli yeella yaavuwa variyari va oohuddera a Yesu wi oohuddera yoolla khakhwa. Koma Yesu khaallotille wi khakhwa, aallotille wi, “Kapaalla wi olliyoolla ahikhwe ophiyera kihokollowille, weyaano ddenndda orina mutteko tini?”
24Yoolla tti oohuddera oyo avelleelle omboni dda ddenndda nave aalemba ddeko ddenndda. Nave ninnadduwella wi ombonaaye tti wawoona.
Mamallihello
25Vano vookhallattho ddeko ddimodda ddinchichi nnddo Yesu eerilleeye. Ddaalembiweke ddittheddene emodda emodda, kinaganiza wi ellapo yavatthi ettheene kheyaakhallena nipuro na mabukhu mamodda oolembiwa.
Currently Selected:
Yohane 21: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
