Mitteko 9

Orukunuwa murima wa Saulo

(Mit 22.6-16; 26.12-18)

1Vano Saulo aavirellellave owoopopiha oohuddera a Apwiya wi aneeroowiipha. Aaya wa mullupa mukutho muullupalli, 2amuveka makalata awi adduwelliwe mu enyumba ddamavekello* o Damasiko. Vawi apaalla aaphwanyawo yakhalla moollikana ni ettilla ya Apwiya, allopwana naari atthiyana aamake aweena o Yerusalemu.

3Saulo aatamellaka o Damasiko, moorurumusa owala woovenyera oddullu waamwaapheella. 4Ahiikuha nave ahiiwa mawu awi, “Saulo, Saulo! Onakihoosella tini?”

5Olliye ahaakhulla wi, “Nyu ttaani, Apwiya?”

Mawaayo yahiiweya wi, “Mi tti Yesu onamuhooseewe.” 6“Koma venya wi wavollowe m'muzindanimmo nave eneerewuulleella yoophwanella wi weere.”

7Athu yaari ni Saulo voolendonoolla yaallakallakeya. Yahiiwa mawaayo koma kheyaamoonille muthu. 8Saulo aavenya koma khaaworille woona ello akhunuullalleeye miitthwaaye. Akhwaayaayo yaamuphara nnatta eyaana mu Damasiko. 9Akhanlle mallapo mararu ahoonaka nave enthawi yeeyo khaachille naari owirya ello.

10O Damasikonko waakhalla oohuddera mmodda nnddina naye Ananiya.* Apwiya yaamulleella muullohani wi, “Ananiya!”

Olliye ahaakhulla wi, “Tti mi Apwiya.”

11Apwiya yaallota wi, “Venya oye omusewuni wa m'muzindanimmu wooromolliwa, ‘Musewu wowookowa.’ Khawe o enyumba ya Yudasi wenko wakohere dda muthu nnddina naye Saulo a o muzinda wa Tariso vawi animavekella. 12Nave muullohani mwaye oomoona muthu nnddina naye Ananiya awiille navettho iiyaatthi mattaaye va olliye wi oonettho.”

13Ananiya ahaakhulla wi, “Apwiya, athu anchichi aakilleella dda muthu yoolla navettho wi oheera ddoonanara wa athwaanyu a o Yerusalemu. 14Vano oowa wuno o Damasiko ni olamulello wa allupa mukutho uullupalli wi aamake athu attheene enuullapellani nyuwaano.”

15Koma Apwiya yaallota wi, “Khawe kaambiiwa koomutthoolla wi akhalle echipangizwaaka, allalleye nnddina naka wa athu ayo ehiri Aisraele ni mamwene ni athu a o Israele. 16Vawi kineeromooniha mmo anaahoowelleeye wunchichi ekaamba ya nnddina naka.”

17Vano Ananiya aatimulla, avollowa mpa mwaari Saulooyo, iiyaatthi mattaaye va olliye allota wi, “Mwanamunnaka Saulo, Apwiya Yesu aakiruma miyaano yeekhiwa, tti yaalla yawooneyelle vamusewuni waweewe wuno. Ekirumalle wi woonettho ni ohoollelliwa ni Munepa Waweella.” 18Enthawi yeeyo m'mwiitthoni mwaye mwaakhuma ddeko ddawooneya wonanko makarumbasa ahomba nave ahaambattho woona. Nave aavenya abatiziwa. 19Nave achilleeye yoocha, aakhallattho ni masiva.

Ollalleya wa Saulo o Damasiko

Saulo aakhalla ni ookhulupilila mu Damasiko wa mallapo ooyeva. 20Enthawi yeeyo ahaamba ollalleya mu enyumba ddamavekello wi Yesu tti Mwaana a Mulluku.

21Athu attheene yamwiiwalle yaanattikhina nave enakoha wi, “Muthu yoolla khe olle awiiphalle athu yamullapella Yesu o Yerusalemu? Ethiyo awiille wuno wi aaphareke athu ayeena wa allupa mukutho uullupalli?”

22Koma Saulo aavirellella ollalleya mwamasiva manchichi. Nave ahaahalleelliha Ayuda ookhalla o Damasiko voowoonihellani wi Yesu sika Mesiya.*

23 # 2 Ako 11.32,33 Viviralle mallapo manchichi Ayuda yaakumana vamodda nave yiiwanana wi emwiiphe Saulo. 24Koma aalleelliwa wi athu amodda anapaalla omwiipha. Otthaana ni mahiiyu yaanamutiyera vamillakoni dda muzinda wi emwiiphe. 25Mahiiyu mamodda oohuddera yaamukusa emukhumihella vaatte oweella vasirini voomukitthihani akeraatthille m'mutaangani.

Saulo o Yerusalemu

26Saulo aphiyalleeye o Yerusalemu aapaalla wi akhallena m'mullokoni wa oohuddera koma attheene yaanamoova vawi kheyaakhulupililalle wi olliyooyo tti oohuddera. 27Koma Baranaba aawa amukavihera nave amukusa ayaana wa amurummwa. Ahaatthopoollella ddeereye wi Saulo aawoona Apwiya vamusewuni nave yaallotana. Ahaalleellattho wi Saulo aallipa murima voollalleyani mu nnddina na Yesu mu Damasiko 28Vano Saulo aakhalla ni alliwaayo eeteeta mu Yerusalemu mutthemwene allalleyaka moollipa murima mu nnddina na Apwiya. 29Aallotattho ni okambirana ni Ayuda oollota Egriki nave alliwaayoottho yaapaalla omwiipha. 30Ookhulupililaayo yiiwalliiwa ya yeella, yaamukusa Saulo eyaana o muzinda wa Kaisareya nave emurumiha o Tariso.

31Nave mipingo dda mu ezigawo ddittheddene dda Yudeya, Galileya ni Samariya ddaari mu enthawi yamurendelle. Vookaviheriwani ni Munepa Waweella mipingo ddahunnuwa vookhallani ni athu anchichi vawi yaanawoova Apwiya.

Petro o Luda ni o Yopa

32Petro aweetella athu virive veko nave nllapo nimodda aaphiya wa athu a Mulluku ayo yakhalla o Luda. 33Wenko aakumanawo ni muthu nnddina naye Eneya oyo aari oorakalla nave aamoona okonaatthi vamwinllini vawi khaaworille weeta wa miyakha mitthanu ni miraru. 34Petro aallota wi, “Eneya, Yesu Khrisitu ohuuchiriha. Venya nave okuse mwinllaawo.” Enthawi yeeyo Eneya aavenya. 35Athu attheene ookhalla mu Luda ni Saroni yaamoona nave yaarukunuwella murima wa Apwiya.

36Vano mu Yopa mwaakhalla oohuddera aamutthiyana mmodda nnddina naye Tabita. (Mu Egriki nnddina naye ninattaphullella Dorika.) Aaneera mitteko ddinchichi ddaphaama anaakavihera oohoowa 37M'mallaponi yaayo aavoriiwa nave aakhwa. Mutembwaaye waahapihiwa ohiyiwa mu echipinda yavaddullu. 38Yopa khaarekamellane ni Luda sika ookhulupilila a o Yopa yiiwalliiwa wi Petro aari o Luda, yahaarumiha athu eelli wi yamulleelle wi, “Mwaakuve muwe wuno.” 39Vano Petro aatimulla athaananana athwaayo. Aphiyalleeye, aakusiwa aya mu echipinda yavaddullweelle, wenko anaamukhwelle attheene yaatthukumana emwaapheella yinllaka nave emoonihaka malaya ni ddoowara ddittheddene Dorika asowilleeye ari mukumi. 40Petro ahaakhumiha attheenaayo muchipindanimmo, akokhora nave avekella. Vano aarukunuwella waari mutembooyo allota wi, “Tabita, venya!” Aakhunuulla miitthwaaye nave amoonilleeye Petro, aavenya akeraatthi. 41Petro aamuphara nnatta nave amukavihera wi iimelle. Vano aawiithana athu a Mulluku ni anaamukhwellaalle nave aawoonihella alliwaayo Dorikooyo ari mukumi. 42Epilli yeella yaavuwa mu Yopa mutthemwene nave wa athu anchichi owaakhulupilila Apwiya. 43Nave Petro aakhalla o Yopa mallapo manchichi ni muthu oopanga mattapara nnddina naye Simoni.

Currently Selected:

Mitteko 9: MW2019

Highlight

Copy