Mitteko 10

Petro ni Korineliyo

1Waakhalla muthu mmodda a o Kaisareya nnddina naye Korineliyo, oyo aari akhoto muullupalli a o Roma a mulloko wa akhoto 100, wooromolliwa wi, “Mulloko wa Italiya.” 2Aanamoova Mulluku, olliye ni nibanja naye nittheene. Aaneerattho ddeko ddinchichi waakavihera Ayuda oohoowa nave aanavekella wa Mulluku mallapo mattheene. 3Yaari enthawi ekwakhwanne 3 koloko otthaana mvo oonilleeye phaama ddene masomphenya, mungelo a Mulluku awaaka wa olliye amwiithana wi, “Korineliyo!”

4Olliye aamuweha mungeloolle oovaka akoha wi, “Apwiya, tti waphaama?” Mungeloolle ahaakhulla wi, “Mavekellwaawo navettho waakavihera wawo oohoowa ddohaakhullelliwa ni Mulluku wonanko mukutho. 5Vano arumihe athu amodda eye o Yopa wi yamwiithane muthu mmodda nnddina naye Simoni Petro. 6Olliyoolla tti mulleto mu enyumba ya Simoni oopanga mattapara oyo anakhalla vakhuviru ni enyanja.” 7Nave mungeloolle aavenyavo, vano Korineliyo aawiithana allupa muttekwaaye eelli owaaka akhoto mmodda oyo aari oomullapella Mulluku nave oyo aari ovenyera mwa ayo yamurumeyella Korineliyo. 8Ahaalleella ddittheddene ddeereyillennddo nave aaruma wi eye o Yopa.

9Osaka wene eri voolendoniiwoolla nave yaatamelliiwa o Yopa, enthawi ya 12 koloko otthaana Petro aawella vaddullu va enyumba wi avekelle. 10Aavolliwa ettalla nave aapalla yoocha. Vano yoocheeyo yakhuruwiwiiwa, ahoona masomphenya. 11Ahoona oddullu ohulleyille nave ello yawooneya wonanko ekuwo yuullupalli ekitthellaka va ellapo yavatthi ephareelliwe ni etthoka ddiwa ddisese. 12Mwemmo mwaakhalla enama dda mitundu ddittheddene wonanko enama dda m'mawaani, ddawaapadda owaakattho epallame ddamuhakani. 13Mawu yahiiweya ellotaka wi, “Petro khawe wiiphe enamannddo nave oddiche!”

14Koma Petro aallota wi, “Apwiya, ngeera! Nginachekevo ovenyera khalle ello yoonanara apaalle yooheellihiwa.”

15Mawaalle yahiiweya wiilli ellotiwaka wi, “Oheereke yoonanara eyo yeellihiwe ni Mulluku.” 16Ella yaheereya oraru nave vano ekuweelle yaawellihiwa oya oddullu.

17Petro aahalleelliwa ni ddeko oonilleeyennddo wi tti tini. Enthawi yeeyo athu yarumiwe ni Korineliywaalle yaari ekohenre khalle mvo vaari enyumba ya Simoni nave yaari yiimenlle vamullakoni. 18Yahiithana nave ekoha wi, “Ethiyo wuno wookhalla mulleto nnddina naye Simoni Petro?”

19Enthawi yeella Petro aari aganizeraka dda masomphenyanndde, Munepa Waweella waallota wi, “Athu araru#10.19 araru: Ddoolemba ddimodda ddakhalle ddookhalla ni mawu awi amodda. Yoolemba emodda yakhalle eri ni mawu awi eelli. enimuupaalla weyaano. 20Sika venya okitthe vatthi nave ohikhoote waathwara vawi kirimaarumiha.” 21Sika Petro aakittha vatthi nave allota wa athwaalle wi, “Munamupaallaanyooyo tti miyaano. Mwaweella tini?”

22Alliwaayo yahaakhulla wi, “Korineliyo, akhoto muullupalli a o Roma a mulloko wa akhoto 100 sika anirumalle. Olliyoolla tti muthu oolungama ni oomoova Mulluku nave Ayuda attheene ennamuvaha olemu. Mungelo a Mulluku sika amulleelle wi awiithaneni muye onyumbani waye wi iiwe eyo munaalloteenyu.” 23Petro aawiithana athwaalle wi evollowe mpa nave ahaalleella wi ekone wenko nllapo nenno.

Osaka wene aavenya aya vamodda ni athwaalle navettho ookhulupilila amodda oovenyera o Yopanko yaathananana. 24Osaka wene aaphiya o Kaisareya, nko Korineliyo amutiyereeyewo vamodda ni abalaaye ni akhwaaye ayo awiithanneeye. 25Petro ahanlleeye vang'ono ovollowa, aakumana ni Korineliyo oyo akokhonre vakhuviru ni olliye nave amuvaha olemu. 26Nave Petro aamuvenyiha allota wi, “Venya, miyaanottho tti muthu.” 27Petro aallota ni Korineliyo avolloweeye mpa, mmo aaphwanyilleeye athu anchichi etthukumanne. 28Allota wi, “Nyu nyookha munnadduwella phaama wi Muyuda khanaakhullelliwa ni malamulwaaye oweetella apaalle waattana ni athu ayo ehiri Ayuda. Koma Mulluku ookooniha miyaano wi kihimweere arive muthu oonanara apaalle ooheellihiwa. 29Sika mwakirumihenlleenyu athu, miyaano koowa moohikhoota. Vano kinimuukohani wi mukiithanenlle tini?”

30Korineliyo aallota wi, “Waari nnddana enthawi wonanko yeella kaamavekella#10.30 kaamavekella: Ddoolemba ddimodda ddakhalle ddookhalla ni mawu awi kaamahalla ocha ni ovekella. mpa mwaka enthawi ya 3 koloko otthaana. Moorurumusa muthu oowara ddaweellesesa ahiimella vahoollo vaka 31nave allota wi, ‘Korineliyo! Mavekellwaawo ahiiweya navettho waakavihera wawo oohoowa wohaakhullelliwa ni Mulluku wonanko mukutho. 32Vano arumihe athu amodda eye o Yopa wi yamwiithane muthu mmodda nnddina naye Simoni Petro. Olliyoolla tti mulleto mu enyumba ya Simoni oopanga mattapara oyo anakhalla vakhuviru ni enyanja.’ 33Sika kaawiithanani enthawiine yeeyo nave moheera phaama wi moowa. Vano attheenehi niri wuno vamiitthoni va Mulluku, otiyera wi niiwe erive ello Apwiya yuulamunlleewani wi munilleelle.”

34 # Deu 10.17 Petro ahaamba ollota wi, “Ddawoona, vano kohiiwesesa wi wa Mulluku athu attheene tti oophwanaphwana. 35Ayo enamoova olliye ni weera echilungamo ennaakhullelliwa ni olliyooyo nave olliyooyo khanoonattho wi enavenyera mutundu wa aani. 36Aarumiha othengaaye wa athu Israele, ollalleya othenga waphaama wa murendelle mwa Yesu Khrisitu. Yesu yoolla tti Apwiya a athu attheene. 37Munnadduwella dda ello yeereye mu ellapo ya Israele, waambeella mu Galileya vatulli va obatizo woollalleyiwa ni Yohane. 38Munnadduwella dda Yesu a o Nazareti nave wi Mulluku aamuvaha olliye Munepa Waweella owaakattho masiva. Aaya orive weko, weera ddaphaama ni waachiriha attheene ayo yalamuliwa ni masiva a Satana vawi Mulluku aari ni olliye. 39Hiyaano tti amboni a ddittheddene eerilleeye mu ellapo ya Israele ni mu Yerusalemu. Vano yaamwiipha voomutthomeyani vamutandani. 40Koma Mulluku aamuvenyiha wa ookhwa viviralle mallapo mararu navettho aamweeriha wi ooneye, 41ohiri wa athu attheene koma wa amboni yaayove yatthoolliwe khalle ni Mulluku, sika vano tti hiyaano nachille ni owirya ni olliye avenyille wa ookhwa. 42Nave aanilamulella wi nillalleye ni weerella omboni wa athu wi olliye sika atthoolliwe ni Mulluku wi akhalle oweeruza millatu wa athu ookumi ni ookhwa. 43Anamallotella attheene yaallota dda olliye wi, attheene enakhulupilila mwa olliye eneerokhululukelliwa machimwiiwa oweella mwamasiva a nnddina naye.”

Athu ayo ehiri Ayuda enaakhella Munepa Waweella

44Vano Petro allotakave ddiiddo, Munepa Waweella aakitthella va attheene yiiwella othengaayoolle. 45Ayuda ookhulupilila ayo yavenyenre o Yopa ni Petro yaattikhina wi Mulluku aavaha emphaswaaye ya Munepa Waweella naari va athu oohikhalla Ayuda. 46Vawi yaawiiwa ellotaka mu ellotello ddoohidduwanyeya* nave etitimihaka wunnuwa wa Mulluku. Petro aallota wi, 47“Athwaalla ahaakhella Munepa Waweella wonanko hiyaano. Vano khaavo muthu oyo anaahiihe wi ebatiziwe ni maaddi” 48Sika ahalamulella wi ebatiziwe mu nnddina na Yesu Khrisitu. Nave yaamukoha wi akhallena wenko wa mallapo ooyeva.

Currently Selected:

Mitteko 10: MW2019

Highlight

Copy