Mitteko 11

Petro anatthopoolleella mpingo wa o Yerusalemu

1Amurummwa ni ookhulupilila a mu Yudeya mutthemwene yahiiwa wi naarittho athu ayo ehiri Ayuda ahaakhullella mawu a Mulluku. 2Vano Petro aphiyalleeye o Yerusalemu, Ayuda ayo yapaalla wi athu ayo ehiri Ayuda ephaddiwe yaamuhumullulla ellota wi, 3“Waari mulleto o enyumba ya athu ayo ehiri Ayuda ayo ehiphaddiwe navettho waachana!” 4Sika Petro ahaatthopoollella ddittheddene ddeereyennddo ovenyera vawaamba wi,

5“Kavekelleemi m'muzindani wa Yopa, kahoona m'masomphenya. Kahoona oddullu ohulleyille nave ello yawooneya wonanko ekuwo yuullupalli ekitthellaka va ellapo yavatthi vakhuviru ni miyaano ephareelliwe ni etthoka ddiwa ddisese. 6Kaawehesesa muwarimmo nave kahoona enama dda m'mawaani, ddamuhakani ni ddawaapadda ni epallame ddamuhakani. 7Nave kahiiwa mawu ellotaka wa miyaano wi, ‘Petro khawe wiiphe enamannddo nave oddiche!’ 8Koma miyaano kaallota wi, ‘Apwiya, ngeera! Nginachekevo ovenyera khalle ello yoonanara apaalle yooheellihiwa.’ 9Mawaalle yahiiweya wiilli ellotiwaka wi, ‘Oheereke yoonanara eyo yeellihiwe ni Mulluku.’ 10Ella yaheereya oraru nave vano ekuwo ettheeneelle yaakusiwa ehokolloselliwa oddullu. 11Enthawi yeeyo athu araru yarumihiwe ovenyera o Kaisareya yaaphiya onyumbani kakhalleemiwo.#11.11 kakhalleemiwo: Ddoolemba ddimodda ddakhalle ddookhalla ni mawu awi nakhalleehuwo. 12Munepa Waweella aakilleella wi kaathware kihikhoote. Ookhulupilila Akhwiihu atthanu ni mmodda oovenyera o Yopa yaathanana ni miyaano o Kaisareyanko nave attheenehi naavollowa mpa mwa Korineliyo. 13Aanilleella mmo oonilleeye mungelo iimenlle mpa mwaye, oyo amulleelle wi, ‘Waarumihe athu a o Yopa yamwiithane muthu nnddina naye Simoni Petro. 14Aneerollota wi weyaano ni nibanja nawo nittheene muvullusiwe.’ 15Nave kaambilleemi ollota, Munepa Waweella aakittha va alliwa wonanko mmo eerilleeye va hiyaano vawaamba valle. 16#Mit 1.5Vano kahuupuwella ddallotille Apwiya wi, ‘Yohane aabatiza ni maaddi koma nyuwaano muneerobatiziwa ni Munepa Waweella.’ 17Mulluku ahaavaha athu ayo ehiri Ayudaalla emphaso yoophwanaphwana ni elle naakhenlleehu nikhulupililalle mwa Apwiya Yesu Khrisitu. Vano miyaano kaari aani wi kaaweromuhiiha Mulluku!”

18Yiiwalliiwa yeella, yaahiya omuhumullulla wulle nave yaamutitimiha Mulluku, ellota wi, “Vano Mulluku ohaavaha athu ayo ehiri Ayuda ekari yawi ehiye machimo nave ekhalle ni okumi woohimalla!”

Mpingo wa Antiyokeya

19 # Mit 8.1-4 Ookhulupilila amodda ayo yapallalleyille ekaamba ya ohoosiwa waambeyille Sitefano iiphiweeye yaaphiya o ezigawo dda Fenisiya, Kupro ni o muzinda wa Antiyokeya,* ollalleya othenga wa Ayudave. 20Koma ookhulupilila amodda, ayo yaari oovenyera o Kupro ni o Kurene yaaya o Antiyokeya ellalleya othenga wa athu ayo ehiri Ayuda,#11.20 athu ayo ehiri Ayuda: Ddoolemba ddimodda ddakhalle ddookhalla ni mawu awi Ayuda oollota Egriki apaalle athu oollota Egriki. yaalleella othenga waphaama wa Apwiya Yesu. 21Masiva a Apwiya yaari ni alliwaayo nave athu anchichi yaakhulupilila erukunuwella murima wa Apwiya.

22Epilleella yaaphiya wa mpingo mu Yerusalemu, sika yaamurumiha Baranaba wi aye o Antiyokeya. 23Aphiyalleeyewo ahoona echisomo ya Mulluku vaathwaayo. Aahakallalla nave aallipiha mwiilli attheenaayo wi evirellelle ookhulupilila mwa Apwiya ni murimiiwa muttheene. 24Baranaba aari muthu aphaama, oohoollelliwa ni Munepa Waweella ni a echikhulupililo nave athu anchichi yahaanjerereya owa wa Apwiya.

25Vano Baranaba aaya o Tariso wi amwaashaashe Saulo. 26Amuphwanyilleeye, aamukusella o Antiyokeya nave wa muyakha muttheene yaakumana ni mpingo ni ohuddiha mulloko wa athu muullupalli. Waari o Antiyokeya nko ookhulupilila yaambilliiwa oromolliwa wi akhrisitu.

27Vano mallapo yaayo anamallotella o Yerusalemu yaaya o Antiyokeya. 28#Mit 21.10Mmodda a anamallotellaayo nnddina naye aari Agabu aallotella ni masiva a Munepa Waweella wi ettalla yawoopiha eneerophiya va ellapo yavatthi ettheene. (Nndda ddeereyille Klaudiyo aariiye oolamulella a o Roma) 29Sika oohuddera yahiiwanana wi tti waphaama wi erumiheke ddeko ddawaakavihera ookhulupilila akhwiiwa o Yudeya moollikana ni eyuumiiwa. 30Vano yaheera yeella voowinnyani Baranaba ni Saulo makobiri wi yawinnye attekweene a mpingooyo.*

Currently Selected:

Mitteko 11: MW2019

Highlight

Copy