Mitteko 8

1Nave Saulo aaniiwanana ni wiiphiwa wa Sitefanonko.

Saulo anahoosa mpingo

Nllapo nene nenno mpingo wa o Yerusalemu wahaamba ohoosiwa wunchichi. Ookhulupilila attheene waahiya amurummwa, yaapallalleyella mu echigawo ya Yudeya ni ya Samariya. 2Athu amodda oomullapella Mulluku yaavittha mutembo wa Sitefano emwinllellattho wunchichi.

3 # Mit 22.4,5; 26.9-11 Koma Saulo aheeseesa woononga mpingo. Aavollowa mu enyumba ddittheddene aapurullamo ookhulupilila attheene, allopwana ni atthiyaneene nave aahiya mundende.

Othenga waphaama onallalleyiwa o Samariya

4Ookhulupilila yapallallesiwaayo yaaya mu echigawo ettheene, ellalleyaka othenga waphaama. 5Nave Filipo* aaya o muzinda muullupalli#8.5 muzinda muullupalli: Ddoolemba ddimodda ddakhalle ddookhalla ni mawu awi muzinda. wa Samariya aallalleyella athu dda Mesiya.* 6Athu anchichi yahaapella maaru wi yiiwe ddalloteeye ni woona ddoottikhiniha aneereeye. 7Minepa ddoonanara ddaakhuma mwa athu anchichi ddinllaka mookhuwa nave athu anchichi ookhwa meto ni oorakalla yaachirihiwa. 8Vano mwaakhalla ehakallallo yinchichi m'muzindanimmo.

9Muthu mmodda nnddina naye Simoni akhalla wenko. Nayeenettho khalle aanaattikhiniha athu a o Samariya ni masengaaye nave aanallota yeekha wi olliye tti muullupalli. 10Nave arive muthu m'muzindanimmo, waambeella muullupalli ophiyera mung'onong'ono yaanamwaapella maaru enallota wi, “Muthu yoolla sika masiva a Mulluku ooromolliwa, ‘Masiva muullupalli.’ ” 11Yaamwaapella maaru kaambiiwa enthawi yoorekama ahaattikhiniha athu ni masengaayo. 12Koma yakhulupililalliiwa othenga waphaama dda omwene wa Mulluku ni dda Yesu Khrisitu woollalleyiwa ni Filipo, yaabatiziwa allopwana ni atthiyaneene. 13Simoni nayeenettho aakhulupilila nave abatiziweeye, aamuthwara Filipooyo nave aattikhina oonilleeye ezizindikiro ni ddoottikhiniha dduullupalli ddeeriwannddo.

14Amurummwa ayo yaari o Yerusalemu yahiiwa wi athu a o Samariya ahaakhullella mawu a Mulluku, yahaarumawo Petro ni Yohane. 15Yaphiyalliiwa, yahaavekella ookhulupililaayo wi yaakhelle Munepa Waweella. 16Vawi Munepa Waweella aari ahinaakitthelle athwaayo, yaarimoona obatiziwa mu nnddina na Apwiya Yesu. 17Nave Petro ni Yohane yahiiyaatthi mattiiwa va athwaayo nave yahaakhella Munepa Waweella.

18Simoni oonilleeye wi Munepa Waweella aavahiwa wa ookhulupililaayo, amurummwa yiiyaatthilliiwa mattiiwa va athwaayo, aapaalla waavaha makobiri Petro ni Yohane, 19nave aallota wi, “Mukivahe masiva yaalla wi arive muthu kinaamwiiyaattheemi mattaaka aakhelleke Munepa Waweella.”

20Koma Petro aamwaakhulla wi, “We ni makobiraawaayo mukhwelle nimodda kaambiiwa waaganiza okulla emphaso ya Mulluku voovelleellani makobiri! 21Kheyiivo yawaakhella apaalle yawuukawella ya muttekwaahoolla kaambiiwa murimaawo khori phaama vamiitthoni va Mulluku. 22Vano ohiye ddeko ddoonanaranndda nave ovekelle wa Apwiya wi yuukhululukelle maganizwaawo oonanara. 23Vawi kohoona wi wookhalla ni ehache yuullupalli ni wi woomakiwa ni meerellwaawo oonanara.”

24Simoni aallota wa Petro ni Yohane wi, “Kivekellelleni wa Apwiya wi ehikhallevo ello emodda ya ddeko ddenndda mullotilleenyunndda enaakeereyelle.”

25Yamallihalliiwa ovelleella omboniiwa ni ollalleya dda othenga wa Apwiya, Petro ni Yohane yaahokollweella o Yerusalemu. Yarowiiwa yaallalleya othenga waphaama m'mizi ddinchichi o Samariya.

Filipo ni muthu muullupalli a o Etiyopiya

26Mungelo a Apwiya aallota wa Filipo wi, “Venya nave oyeelle omwera#8.26 omwera: apaalle otthaana. okuse musewu woovenyera o Yerusalemu oya o Gaza.” (Muttano musewu yoolla khoneetiwa.)#8.26 khoneetiwa: apaalle tti wa mu echipululu. 27Nave aavenya ayaawo. Vano waakhalla muthu mmodda oohulliwa* oovenyera o Etiyopiya. Olliye aarittho muullupalli oomurumeyella Kandake,#8.27 Kandake: Nna tti nnddina na omwene naromollelliwa arive mwene a o Etiyopiya. mwene aamutthiyana a o Etiyopiyanko ni oowehera eyuumaaye ettheene. Awiille o Yerusalemu wi amullapelle Mulluku. 28Vano aamahokollweella owaniwa nave aari awenlle garetaaye, eerengaka nibukhu na namallotella Yesaya. 29Nave Munepa Waweellooyo aallota ni Filipo wi, “Khawe waatamelle va vanigaretanimvo.” 30Vano Filipo aamuthamakella nave aamwiiwa eerengaka nibukhu na namallotella Yesaya, amukoha wi, “Onniiwesesa oneerengeewenndda?” 31Nave olliye aallota wi, “Kinaawiiwesese mwawiidde ahiivo oyo anakittaphullella?” Vano aamwiithana Filipo wi awelle akeraatthina vamodda. 32#Yes 53.7,8Vano mawu a Mulluku eerengeeyaayo yaari wi,

“Wonanko enkhosa yookusiwa wi yiiphiwe,

wonanko mwaanaankhosa oomaalleya voomuchemani,

olliye khaawakhunlle ello.

33Aavevulliwa nave khaaweruziwe mwa echilungamo.

Khaavo anaawore ollota dda edduullu ddaye

kaambiiwa okumaaye va ellapo yavatthi waakusiwa mwa olliye.”

34Muullupallooyo aamukoha Filipo wi, “Killeelleni, namallotelloolla anallota ddawani? Ddayeekha apaalle dda muthu mmodda?” 35Vano Filipo ahaamba ollota, aambeelle va mawu yaalla, aamullalleyella dda othenga waphaama dda Yesu. 36Yavirellelliiwa ni musewooyo, yaaphiya vanipuroni vamodda vookhalla maaddi nave muullupallooyo aallota wi, “Ngoona maaddi, yookihiiha ttiivi wi kihibatiziwe?”#8.36: Ddoolemba ddimodda ddakhalle ddahaanjerera evesi 37: Nave Filipo aallota wi, “Oneerobatiziwa wakhulupilila ni murimaawo muttheene.” Olliye ahaakhulla wi, “Kinnakhulupilila wi Yesu Khrisitu sika Mwaana a Mulluku.”

38Muullupallooyo ahiimesa nigaretanno nave Filipo ni muullupallooyo yaakitthella m'maaddinimmo nave Filipo aamubatiza. 39Yakhumalliiwa m'maaddinimmo, Munepa a Apwiya aamukusavo Filipooyo. Muullupallooyo khaamoonille wiilli nave aavirellella olendwaaye addalliwe ni ehakallallo. 40Filipo oonille wi ari mu muzinda wa Azoto ovenyera wenko aayattho o Kaisareya nave muttilla mutthemwene avireeyemo aanallalleya mu erive etawoni othenga waphaama.

Currently Selected:

Mitteko 8: MW2019

Highlight

Copy