Atos 6
6
Halixatshine Hapatjetatshine Hepixatshine Hitajikolu Piranapni
1Hiyáhoni wale hohnekaka rixolewnatkana Cristo halixatshine. Seyni hejnu hima hakanhatka grego-nerune, hebreu-neruneyma. Klu tshinanu grego hipnahnurutatshrone hi hima hislahka heneksajexikowakaya pa hohne pejnu.
2Hiyáhoni doze nuretkalune rapatjetkana yine waneya wane htshinna:
— Hi kihleru wuknojyawakaplu wunkaklexyawaklu Hoyakalu tokanu nikkaluru tshinanu.
3Hiyáhoni, nomolene, hnuretanna sete jejine hixa tskalaya, jejine kihle piranyehirune, Hoyakalu Hiwejikaluru katsepoyalune, kahchinikanerune. Wanna wutakanu xye kamrurtshi hkamhiywakapna.
4Seyni hixa womkahitanru hanjihohneru hiyrunu Hoyakalu tokanu wunkaklexyawaka.
5Waneya ptowru yineru hikchikhihlenutlu wane htshinyawakna nuretkalune. Hiyáhoni hnuretluna Estêvão, jeji Cristo halixatshri potuka hiyrun-koxa katsepoylu Hoyakalu Hiwejikaluru. Hiyrun-koxa hnuretna Filipe, Prócoro, Nicanor, Timom, Pármenas, Nicolau Antioquia hajerni. Walemka hi judeu-neru seyni judeu halixyawaka homkahitatshrini.
6Nyi jejine nuretkalune hoji sreta hitakka. Waneya nuretkalune hanjihohnetatka, rutakamyotna jejine jiwu hoho.
7Hiyáhoni Hoyakalu tokanu mixkowatatka. Rixolewnatkana Cristo halixatshine Jerusalém poktshiya. Hiyrun-koxa hixo sacerdote-ne homkahitlu halixlewlu.
Estêvão Hapatjehchinikanutatshine Hoji Sreta Hitajikolu Piranapni
8Waneya Estêvão Hoyakalu hamotanru potuko katsepoylu hpixkonu. Xye jeji tsru himyekaklewatatshrikaka tsru hetkalurkaka koxa hkamha yine tskalaya.
9Seyni satkaka yineru hanjihohnewakapji hislahatshine Libertos tshinkalune, Cireneus, Alexandrinos, Cilícia, Ásia hichpajikatshine, ruhjekakna Estêvão-yma.
10Seyni hi rumukata halliretlu Estêvão rimatkalnu tshinanu hiyrun-koxa Hiwejikaluru hyanumkakjeru tshinanu.
11Hiyáhoni Estêvão kamnitjene hyohniyehitluna satkaka jeji wane htshinyawakapluna Estêvão:
— Ha hixa wjemlu xye jeji hektutu htshinyehixyawaklu Moisés hiyrun-koxa Hoyakalu yehi.
12Estêvão kamnitatshine jihekna hixolune yine, judeu-ne tsrukakalutene koxa hiyrun-koxa kasruklewaklerune hinanchitkaluru pirana hasruklewatatshine. Rapyehitluna Estêvão. Waneya ranikluna jemahchinikanyehixikowakapji.
13Hiyáhoni ranikluna weyawatatshine hweyawyehixyawakapluna Estêvão:
— Xye jeji hi hituka hektutu tshinrenwakatlu Hoyakalupji potukalu hiyrunu Moisés yonreru koxa.
14Klu tshinanu wjemlu wane htshinyawaklu: Xye Jesus Nazaré hajeru nikatanru Hoyakalupji hiyrun-koxa pnuko rixkakanwu wixjexyawaka Moisés yokanre hixa tshinanu.
15Waneya ptowru yineru tuplatatshine jemahchinikankakjexikowakapji yopukhapotutlu. Rethojitluna Estêvão. Hiwejikaluru Hoyakalu towreru tenhohne hichpajikatshri hoji pixka rixhojita Estêvão.
Currently Selected:
Atos 6: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
