Atos 5
5
Ananias Hiyrunu Safira Piranapni
1Satu jeji Ananias hiwakatletatshri hhanunro Safira-yma hichankatkalu psoji tshiji.
2Seyni psoji tshiji wenru Ananias himutuka hhanunro koxa himatyehitatkalu. Seyni tshiji wenru psojite tsonu ranikatka Ananias waneya renekna nuretkalune.
3Waneya Pedro wan-tshinru:
— Ananias, haklu tshinanhe pitshitlu Satanás htowuxyawakyi pihchinikanuya pweyawyehixyawaklu Hoyakalu Hiwejikaluru pumutujyawaklu psoji tshiji wenru?
4Pma muchankakanuklunuwalu tshiji, hi he pixanu rixapa? Haté pali hichankalexinixkalu tshiji, hi he pixanni tiyiro? Haklu tshinanhe paluka wan-hixletatka? Hi yineru pweyawyehita seyni halikaka Hoyakaluko pweyawyehita.
5Xye tokantshi hjeminixka Ananias waneya waneklukawa hyawnanatka rupnanatka. Hiyáhoni tsru piklu rixna jempiranyehitatshine ptowruneka.
6Hiyáhoni rapokna maklujine hpoyitatkaluna himanni waneya maleka ranikluna hkapnatatkaluna.
7Waneya mapa hora rixini tjihlokatka Ananias-ni hnunro seyni hi timatakanata wan-rixyawakanatka Ananias-ni.
8Waneya Pedro hepomhalo:
— Punkakanno, wla pso wenrurhe pyoptoxyalu tshiji?
Waneya tuhitlu:
— Hehe, wane pso wenru wyoptota.
9Hiyáhoni Pedro wan-tshinatkalo:
— Haklu tshinanhe pixa phanuruyma pa hchinikanurutu hixa yahotletlu Hoyakalu Hiwejikaluru? Petanna! Hiphaptostsitkana maklujine phanurni kapnatapatshine hiyrunu pix-koxa hkochpakanna.
10Waneklukawa Pedro jixistsi tyawnamtanatka. Tupnanatka. Waneya hjihlojinixkana maklujine, hipnatshroni rukchijyalona waneya hkochpaklona thanurnistsi hkapnatanatkalona.
11Hiyáhoni Cristo halixatshine hapatjetatshine hiyrunu ptowru jempiranyehitatshine koxa pikpotutatka.
Hixo Himyekaklewatatshrikaka Hkamhana Nuretkalune Piranapni
12Nuretkalune kamhalu hixo hetkalurkaka, himyekaklewatatshrikaka koxa yine tskalaya hiyrunu rapatjejetna Hoyakalupji psojite Salomão tshinikowaka.
13Pimrineko pika hepiretletna seyni wanepnawaka yine kahwakpirpotutna nuretkalune.
14Híxona jejine, suxon-koxa halixlu Tsru Hixikatshriwa Cristo hiyáhoni rixolewnamtatkana Jesus halixatshinetka.
15Haté yine koxa hanikna yeyixatshine hatnu tnumne rutakkana. Hijekoymana ho rukwereyma rutakkana pa katako Pedro wane hyapamxinipa wale mayawle katshpokanna.
16Hixolune yine Jerusalém poktshistsi satkaka wane hwajetatshine hina. Ranikna yeyixatshine, hiwejikaluru hektutu himwatshine koxa ranikna waneya wanna ptowruneka hitskalakkatka.
Nuretkalune Kachixikowaka Piranapni
17Waneya hpalnatka tsru sacerdote hiyrunu waleymalune saduceu-ne mkoje hajenni, wanna ptowruneka hahxatna nuretkalune.
18Hkachitna nuretkalune waneya preso rutakkatkana.
19Seyni wale yetshno potuko satu hiwejikaluru Hoyakalu towreru tenhohne hajeru kotpukatkalu preso hiphaptotkaka waneya ranikna nuretkalune maleka waneya wane htshina:
20— Hyanutka, Hoyakalupji hyopkakanu waneya hinkakanna xye herotu hiweklu pirana.
21Xye tokantshi hyijnakoxinixkana, yetshpotukawa rixini hjihlokatkaluna Hoyakalupji waneya runkaklewatna. Seyni tsru sacerdote hiyrunu waleymalune hapatjejixatkana tsrukakalune judeu-ne hiyrunu tsrune judeu-ne ptowruneka. Wane pnute rawapjixatkana nuretkalune preso hwatshine.
22Seyni preso yehi rapojinixkana soldado-ne, hi wane rukchijikatkana hiyáhoni hsatokatkana waneya runkaklewatna,
23wane htshinna:
— Preso yehi wapoka wetlu hihle hichyaletatshri hiyrunu hinotatshine soldado-ne hiphapto hinaple hyopkakakanatna. Seyni wkotpujinixkalu preso hike yineru wane wukchijyatka.
24Waneya xye pirana hjeminiklunu Hoyakalupji kosekatshri hiyrunu tsru hixikatshinwa sacerdote-ne, hi rimat-hichinikanuwatatkana klukta rixatkana nuretkalune.
25Waneya pchini tsonu satuko hapoka, runkakna wane htshina:
— Hjemanu! Preso hitakanune jejine Hoyakalupji hyopkakna runkakna yine.
26Hiyáhoni soldado-ne pohire h-soldado-teneyma Hoyakalupji nwaka hyana. Rawapna nuretkalune seyni hi hipokananu hkachitna klu tshinanu hpikna hixolune sotlujexyawakna wanna soldado-ne.
27Waneya soldado-ne hjemahchinikanyehitjene hoji sreta hitakna nuretkalune waneya tsru sacerdote wan-tshina:
28— Hi he wuykothi xye hiwaktshi pirana hmasruklewaxyawakanu? Seyni hetanu Jerusalém psoluyaka hyapiranata xye hasruklewlu hiyrunu hixa haluka hikolukletwu xye jeji hiylaxikowaka tshinanu.
29Pedro hiyrunu pimrine nuretkalune wan-tshin-hihretatkana:
— Hoyakalu halujyawak-potu wujha homkahretanu seyni yine halujyawaka hike.
30Wutsrukatenni Hoyakalute hiwekkakatkalu Jesus hixa hiylaleru hahmuna skita hixpaleru.
31Seyni Hoyakalu hitaklu Jesus hpotukle sreta Tsru Hixikatshriwa rixyawakapa yine hiwekkakatshri rixyawakapa. Renejyawakna judeu-ne rehchinikanuxyawakapna hiyrunu rektunna ruknojyawakapna.
32Hixa hiyrunu Hoyakalu Hiwejikaluru koxa hiphujtatatshinwu xye pirana tshinanu. Hoyakalu henekna ralixjene Hiwejikaluru Potukalu.
Gamaliel Hiykole Piranapni
33Waneya hjemahchinikanyehitjene jeminiklunru xye pirana hjihekanuwatna hiyáhoni raluk-hiylaletna nuretkalune.
34Seyni satu fariseu-ne, Gamaliel hiwakatletatshri, yopkaka wanna hanikajite. Wale, hinanchitkaluru pirana hasruklewatatshrini, ptowru yineru kahwakpirpotutlu. Wale maleka hkochpakjixna nuretkalune pchini tsonu.
35Waneya Gamaliel wan-tshina:
— Israel-nerune! Xakoka kluhe hkamhinna nyi jejine.
36Klu tshinanu mitshikawa ruphujewnatka Teudas tshinkaluru. Tsru rutajnawa hiyáhoni psokaklu quatrocentos jejine hepiretlu seyni ruylatkatka waneya ralixjene ptowruneka hipalatatka hiyáhoni hike hkamhatkana wanna.
37Waneya wane pnute rutakyahojikolhohnena yine rixinixka ruphujewnatka Judas tshinkaluru, Galileia hajeru. Hixo yineru homkahitlu waneya wale koxa hipnana waneya romkahitjene ptowruneka hipalatatka.
38Hiyáhoni xawakni nunkakhi: Hetachatanutkana nyi jejine hichochatanutkana klu tshinanu yinenu rixini xye chinikantshi, xye kamrurtshi pa hohne nikawnachatanu.
39Seyni Hoyakalunu rixinipa, hixa hi himukata himaletletanru. Pa katako haté Hoyakalu wyahota hixa.
Waneya wanna halixlu Gamaliel tokanu.
40Hiyáhoni htomhatkana nuretkalune waneya rali kotshipjerexinna ruykotna Jesus hiwaka hma munkaklexyawakanpatkana waneya ruchotatkana.
41Hiyáhoni nuretkalune hjemahchinikanyehixikowakna yehi ruchpajyana. Rumuwamtna klu tshinanu rutakyahokkana rumukata salewnalexyawakna haté reyikkana Jesus hiwaka tshinanu.
42Ptowru hohneruka Hoyakalupjiya haté pa pjikakaya hi rutuk-hinkakletletluna Jesus Cristo pirana hi rutuk-hasrukletna yine.
Currently Selected:
Atos 5: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
