1 Corintios 13
13
Da ne'xorenataxanaxa
1No'm ỹim sa'xateta'pe naua la'qaatqa na qom chaqai naua la'qaatqa na chicqashiguim qota'a lelaatqaipi, qam quiyim sqaica ca i'xorenataxanaxa, ca shintari' aca nouaxana quiyim ilamtapigui, loqo'm aca nasaquinata quiyim qaỹasaquintapigui. 2Chaqai no'm sa'xateta'pe naua la'qaatqa ñi qota'a, chaqai sa'den ná'ogue nanchaqaina se re'xogui, chaqai somata'ta' ná'ogue na na'deenaxanaxa, chaqai queda ipi'ỹaxac mashic ỹovita quiyim seshit ñqo'naxat aca ladocai quemaralec, qam quiyim qaica ca i'xorenataxanaxa, qaiyiita qaica ca shinegue. 3Chaqai no'm saan ná'ogue na hueetaỹot, chaqai no'm saanec na ỹoshicmaxa quiyim qaỹavigaxat, qam qaica ca i'xorenataxanaxa, qaiyiita qaica ca 'negue caỹim.
4Cá'maq 'ue ca le'xorenataxanaxa ỹaatqajam 'ñaaxaic lauel, 'naxanaxaraic, se pa'guenaxanaxaic, se napacqajnaxai, chaqai se nemaqajnaxai. 5Se ỹo'uet ca layiloxo ca liỹa, chaqai se imitetaque ca chi la'maxa. Chaqai se ro'o, chaqai sqai caapeguem ca qohine'tegue. 6Se netoongue ca lasauaxaset ca liỹa, qaidaata dá'maq lliqueta netoongue. 7Chaqai ná'ogue nanchaqaina na'ñaxachiguit, ma' 'ue da lpi'ỹaxac, naquitaxac, chaqai da leualaxavic. 8Da ne'xorenataxanaxa sqaica ca lqodoc. Ca 'uo' ca na'xa'a quiyim tot qaỹa'xate' naua la'qaatqa ñi qota'a, chaqai tot qaỹa'xate' naua se qaiuanapegalo na'qaatqa, chaqai tot qaỹouen da na'deenaxanaxa. 9Ma' 'ue na hua'ñi na sa'deenaq, chaqai 'ue na hua'ñi quiyim sa'xataxai' naua la'qaatqa ñi qota'a. 10Qam ma' ỹovita quiyim dá'ogue sa'deenaq, ca' palac ma'le ná'maq se nalogoñi.
11Ca na' ñaqaỹim noctoqui', da itaxaỹaxac, ỹa'deenataxanaxac, chaqai da ỹa'ajanaxanaxac shintari' quiyim aỹim noctoqui'. Qam na' sovita quiyim mashic aỹim ỹale, ca' saxanñi da shintari' na' ñaqaỹim noctoqui'. 12Ca' chaqaida 'nejem nagui 'ue ná'maq seuanaxa, qam napalalec 'ec aca na'ỹoxolate quiyim i'telqatalec. Qam ma' ỹovita ca na'xa'a, ca seuanaxa ỹaatqajam ná'ogue re'qojlec. Ca' nagui saqa' nalogoñi dá'maq sa'den, qam ma'le ma' ỹaatqajam ná'ogue sa'deenta, 'nejem quiñi qota'a ỹa'den aỹim. 13Ca' chaqaida, quiyim da npi'ỹaxac, chaqai da quitaxac, chaqai da ne'xorenataxanaxa qaica ca lqodogue'; qam dá'maq ỹapacauec quedaua tres, dá'maq ne'xorenataxanaxa.
Currently Selected:
1 Corintios 13: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
