1 Corintios 12
12
Na ỹoreta'oguit lo'ueenataxanaxac so Espíritu Santo ỹaanem ca qom
1Qamiri ỹaqaỹa', ỹim sahotaque quiyim 'yiiñita da leloxoỹaxac na ỹoreta'oguit lo'ueenataxanaxac so Espíritu Santo ỹaanem queca 'óna.
2Qamiri, 'yiiñita na' saqa' coñiguit da na'qaatec, ca' qamiri o'miitac, ca' oquiita'pegue' quen na nashiilec nqolac sqaicaua caua la'qaatqa. 3Vichiguiño' nagui sahotaque quiyim 'yiiñita queca 'óna retaqa nqohin queda lquesaxanaxa so ne'Espíritu ñi qota'a, ca'maxare se ishit quiyim 'naac: “¡Qaỹalauat so Jesús!” Chaqai qaica ca ishit 'naac: “¡Chaqaiso so Jesús ỹa'gaxala'!” quiyim sqaiso so Espíritu Santo retaqa nqai'en ca'maxare.
4'Ue na ỹoreta'oguit no'ueenataxanaxac quiyim queca 'óna qom ishit icoñiguit, qam chaqaisoota só'maq Espíritu so chicqo'ot. 5Chaqai ỹoreta'oguit na leloxoỹaxac quiyim qaro'ueenataxanot so qara'gaxala', qam 'oonoqui' só'maq so'ueenataxanqatacot. 6Chaqai sqai dá'ogue da leloxoỹaxac da lo'ueenataxanaxac na qomyipi, qam chaqaiñiita ñí'maq qota'a ñí'maq ỹo'uet quena' ỹo'ueenataxanaxan na'maxare. 7Ca' ñi qota'a ỹaanem quiñi 'óna quiyim ichoxot nqai'en so Espíritu Santo cá'maq ỹahotaque lotaanaxanaxat quená'ogue na qomyipi. 8Ca ñi'maxare 'ue na ỹaanem da la'deenaxanaxa quiyim retaqa, chicqochigui nqai'en so Espíritu, chaqai 'ue na ỹaanem quiyim 'xoic da la'deenaxanaxa, chicqochigui nqai'en so Espíritu. 9'Ue na ỹaanem da lpi'ỹaxac chicqochigui nqai'en so Espíritu. Chaqai 'ue na ỹaanem quiyim ishit nataren nqai'en na ralolaxaic. 10Chaqai 'ue na ỹaanem quiyim ỹo'uet na nquesaxanaxa se qaiuanapega, chaqai 'ue na ỹaanem quiyim ỹa'xat da la'qaatec ñi qota'a, chaqai 'ue na ỹaanem da la'deenaxanaxa quiyim retan na se re'xogui quena 'maatqaic, loqo'm chaqaiso so Espíritu Santo. Chaqai 'ue na ỹaanem quiyim ỹa'xate' naua na'qaatqa se qaiuanapegalo, lotqai 'ue na ỹaanem quiyim ỹa'den da leloxoỹaxac naua na'qaatqa. 11Qam chaqaiso so Espíritu chicqo'ot ná'ogue najo, ca' chaqaiso só'maq imeenec ná'maq ỹoreta'oguit lo'ueenataxanaxac queca qom, quecá'maq shim 'neeta'gue.
Qomá'ogue ña'daqatau'a so 'oonoqui' noshicmaxa
12Ma' so Cristo 'nejem ca 'oonoqui' noshicmaxa, qam 'xoic na louenqaipi. Ca 'eno'm 'xoic, qam inoqueta'ta' queso 'oonoqui' noshicmaxa. 13Ma' qomi' 'eno'm qomi' judío lase', loqo'm sqai judío lase', loqo'm qomi' nelaatqa, loqo'm sqo qomi' nelaatqa, qam na' qanachilaxane' qomi', ca 'eco' qarenocau'a so 'oonoqui' noshicmaxa chicqochigui so Espíritu. Chaqai qomá'ogue 'ec qane'taxanguilo só'maq 'oonoqui' Espíritu Santo.
14Ca 'oonoqui' noshicmaxa mesqai queca 'oonoqui' louenec, ca' nalogoñi, ma' 'xoic na louenqaipi. 15Chaqai no'm da nipia' 'naac: “Mesqai aỹim nqai'laxat, vichiguiño' sqa saỹapegueu'a na noshicmaxa”, qam qaiyiita na'deetau'a na noshicmaxa. 16Loqo'm aca nque'la 'naac: “Mesqai aỹim qote, vichiguiño' sqai saỹapegueu'a na noshicmaxa”, qam qaiyiita taỹapegueu'a na noshicmaxa. 17Ma' quetqai ná'ogue na noshicmaxa qote, ¿negue' ca neeta'gue quet aca nque'la? Chaqai quetqai ná'ogue na noshicmaxa nque'la, ¿hua'gue quet ca na'gue ca nimic? 18Qam ñi qota'a ñí'maq chicqochigui quiyim naloqojonchiguiñi quiyim ỹa'ue na loma' na louenqaipi na noshicmaxa. 19Ma' quetqai ná'ogue na noshicmaxa 'oonoqui' ca no'ueetaxat, ca ¿negue' queto' ca 'neeta ca noshicmaxa? 20Qam quedá'maq 'neeta quiyim 'xoic na nouenqaipi, qam 'oonoqui' ná'maq na'deetau'a noshicmaxa.
21Ma' aca qote se ishit 'naapega ca nqai'laxat: “Se soviñi'”, chaqai ca nqahic se ishit 'naapegalo naua nichil: “Se soviñii.” 22Chaqaidaata quiyim quecá'maq pa'ỹa'gue ca louenec na noshicmaxa quená'maq 'eco' qaica ca 'negue, ca' chaqaica cá'maq paguec qaỹouen. 23Chaqai ná'maq hua'ñi nouenec ná'maq 'eco' qaica ca 'negue, qam chaqaica cá'maq paguec qaretela'a. Chaqai ná'maq pa'ỹa'gue ná'maq 'eco' qaica ca lemaqachic, ca' chaqaina ná'maq paguec sa'maxatqa'tegue. 24Ma' se ỹouen quiyim quená'maq re'qoota quiyim paguec qaimaqachin. Ca' chaqaido' da 'ne'tegue ñi qota'a co'na' ỹa'maxajñi na noshicmaxa quiyim paguec qaimaqachin ná'maq 'eco' qaica ca lemaqachic, 25qaiyi sqaica nqaida quena noshicmaxa. Ta'ta'a quiyim queca 'óna notaanta'ta' queca liỹa. 26Ca no'm 'ue ca hua'ñi quena nouenqaipi ca qaiuet, ca ná'ogue na liỹaripi 'ue da le'xoric. Chaqai no'm 'ue ca pa'ỹa'gue quena nouenqaipi ỹaatqajam qaiquelola, ca' ná'ogue na liỹaripi netoon.
27Ca chaqaqamiri nauá'maq louenqa so loshicmaxa so Cristo, ca quiñi 'óna caqamiri na'yiitau'a so noshicmaxa. 28Ca 'eda da 'ne'tegue ñi qota'a quena' 'ue ñi ỹaconeu'a quená'maq mashic huelec ñi'maxare quena' ỹo'uet da lo'ueenataxanaxac. Ỹa'maxachichiguiñi da 'ne'tegue quiyim ỹa'auaxan na lelaatec so Jesús, ime lotqai na ỹa'xat da la'qaatec ñi qota'a, ime lotqai na napaxaguinataxanaq, ime lotqai na re'oq nqai'en na nquesaxanaxa se qaiuanapega, ime lotqai na nataren na ralolaxaic chaqai na ỹotauan ca liỹa, chaqai na na'gaxala', chaqai 'ue na ỹa'xate' naua na'qaatqa se qaiuanapegalo. 29Ca ¿sá'ogo' lelaatqaipi so Jesús? Loqo'm ¿ná'ogue ỹa'xat da la'qaatec ñi qota'a? Loqo'm ¿ná'ogue napaxaguinataxanaripi? Loqo'm ¿ná'ogue ishit ỹo'uet re'oq nqai'en ca nquesaxanaxa se qaiuanapega? 30¿Ná'ogue hueeto'ot da nquesaxanaxa quiyim ỹomatec ca ralolaxaic? ¿Ná'ogue ỹa'xate' naua ỹora'alo na'qaatqa? ¿Ná'ogue ỹa'deene' na leloxoỹaxaco naua ỹora'alo na'qaatqa? Llicsa ma' 'e'. 31Ca nquipichiỹa'pegue' quiyim coñiguit na lo'ueenataxanqateripi ñi qota'a ná'maq paguec nqai'en ca na'maxa. Qam aỹim sapaxaguiñiigue da ñicyaxac paguec loyac 'neetasa'.
Currently Selected:
1 Corintios 12: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
