1 Corintios 14
14
Da llicyaxac quena' qaỹa'xate' naua se qaiuanapegalo na'qaatqa
1Nquipichiỹa'pegue' quiyim 'ue ca re'xorenataxanaxahi, chaqai nauá'maq lo'ueenataxanaxaco so Espíritu Santo chicqoro'ot ñi qota'a, qam paguec la'maxa quiyim qaỹa'xate' naua la'qaatqa ñi'maxare. 2Ma' cá'maq qom quiyim ỹa'xate' naua se qaiuanapegalo na'qaatqa retaqata'pegue' ñi qota'a, qam mesqai na qom, ma' qaica cá'maq ỹa'den da ỹa'xatetac. Quena' qaitaxaỹaxan queso Espíritu, ca 'ue dá'maq ỹa'xatetac, qam se qara'xaỹa. 3Qam cá'maq ỹa'xate' naua la'qaatqa ñi qota'a, ca'maxare ỹa'xatema ca liỹa, ca nqo'ñishiguim nqai'en da no'ueenataxac, chaqai ỹa'ñaxat, chaqai ỹa'maxagui lauel nqai'en. 4Cá'maq ỹa'xate' naua na'qaatqa se qaiuanapegalo, ca'maxare chi lañaqtaxac dajo, qam cá'maq ỹa'xate' naua la'qaatqa ñi qota'a ỹo'uet da lañaqtaxac ná'maq mashic icoñiguit da na'qaatec.
5Ỹim sahotaque quet quiyim qamiá'ogue 'xachii' naua na'qaatqa se qaiuanapegalo. Qam paguec la'maxa nqaishin queta' 'xachii' naua la'qaatqa ñi qota'a. Ma' paguec la'maxa quiyim qaỹa'xat da na'qaatec, sqai 'nejem quiyim qaỹa'xate' naua na'qaatqa se qaiuanapegalo, ta'to'o' no'm 'ue ca ichoxot ca leloxoỹaxac cá'maq qaỹa'xatetac, qaiyi nqo'in da lañaqtaxac ná'maq mashic icoñiguit da na'qaatec. 6Ca' vichiguiño' qamiri ỹaqaỹa', quiyim sovitalo qamiri, ca' sa'xate' naua se qaiuanapegalo na'qaatqa, ca' sqaica quet cá'maq chigoqchiỹaugui ca itaxaỹaxac, ta'to'o' no'm sa'xat cá'maq ỹahotaque ỹa'deenaxanaxanque qomi' ñi qota'a, loqo'm 'ue ca ỹaañiỹaxarom quiyim 'yiiñii cá'maq lliqueta, loqo'm sa'xat ca na'qaatec chicqo'ot ñi qota'a, loqo'm ca napaxaguinataxanaxac.
7Sahoqai aca saloqojnaxanaxagui quena niviiguellipi ma' se retaqa, 'nejem aca npe'te loqo'm aca niviigue. No'm sqa ỹaataxa'uegue da lavilshaxac quena' qaiviguigui loqo'm qaipi'chigui, ca' se qaỹa'den negue' cá'maq nivigaxanaxac. 8Chaqai quena' lauataq, no'm sqa ỹaataxa'uegue da lelamaxa aca npe'te, ca' sqaica cá'maq na'maxatetañi quiyim eec nalauat. 9Ca' qaican ỹapaguec quedá'maq 'ñiita qamiri: no'm nauá'maq na'qaatqa 'xachita'pe se qaỹa'den cá'maq leloxoỹaxague', ¿negue' quet cá'maq 'neeta quiyim qaỹa'den quet cá'maq 'xachitac? ¡'Eco' quiyim taxaitac qaqamitam! 10'Nesa ma' 'xoic na qomyipi huelec na 'laua ỹoreta'oguit na la'qaatqaipi, qam ná'ogue na'maxare na'yiinchiguilo naua chi la'qaatqa. 11Qam no'm se sa'xaỹalo cauá'maq la'qaatqa cá'maq yitaxaỹaxantac, ca 'eco' ỹoqa'a ca sachicqa'gue queca'maxare, chaqai ca'maxare qai'neeta 'eco' ỹoqa'a ca chigoxogue caỹim. 12Ma' qamiri 'xoic ná'maq rishoxohi quiyim coñiguit ná'maq ỹoreta'oguit lo'ueenataxanaxaquipi so Espíritu Santo, vichiguiño' nquipichiỹa'pegue' quiyim coñiguit cá'maq ỹo'uet ca llaqtaxac ná'maq mashic icoñiguit da na'qaatec.
13Ca vichiguiño' ca qom no'm hueeto'ot quiyim ishit ỹa'xate' naua na'qaatqa se qaiuanapegalo, ca 'maxaraic quiyim ỹashiila ñi qota'a quiyim qaỹa'deenaxanaxanegue quiyim ichoxot ca leloxoỹaxague' naua na'qaatqa. 14Ma' no'm ñqouagaxain, ca sa'xate' naua ỹora'alo na'qaatqa, 'nesa ma' queda ñqouagaxainaxac ñi ỹa'al nqouagaxaintac, qam se nqo'ñishiguim da ỹa'deenaxanaxa. 15Ca ¿nega'ỹo' ca shinta nagui? Ñqouagaxain ñi ỹa'al, qam qai'neeta da ỹa'deenaxanaxa. So'ueenaxana ñi ỹa'al, qam qai'neeta da ỹa'deenaxanaxa. 16Ma' no'm qami' maqachiñi'sac ñi qota'a, qam nodaatec ñi ra'alli', ca no'm na'xaỹaxantac ca saqa'leca ca ỹa'den, ca se ỹalecau'a ca nqouagaxainaxaqui' quiyim 'ỹaañisacot da na'aachicyaxaqui' ñi qota'a, ma' se ỹa'den dá'maq 'xachisac. 17'Nesa ma' sqoue ỹa'maqachiguiñi ca nqouagaxainaxaqui', qam ca riỹa'e' se nqo'in ca la'al. 18Saantacot da ña'aachic ñi qota'a quiyim seshit sa'xate' naua na'qaatqa se qaiuanapegalo, sapacauec caqamiá'ogue. 19Qam quena' 'ue na lapoxoc quená'maq mashic icoñiguit da na'qaatec, ca sahotaque quiyim sa'xate' caua cincolqai' na'qaatqa, qam quiyim qaỹa'yiinchiguilo qaiyi seshit sapaxaguin ca iỹa, mesqai 'nejem ca diez mil na'qaatqaipi se qaiuanapega.
20Qamiri ỹaqaỹa', quecá'maq ra'deenataxanaxaguii 'neeto' 'ñiitari' ca noctoqui'. Coñiỹa quiyim 'ñiitari' ca noctoqui' quená'maq se no'uen, qam 'ec qamiri qo'xoiqa quecá'maq ra'deenataxanaxaguii. 21'Nerac yaua naneresañi laqataxaco ñi qota'a: “Sahota'ahi naua ỹora'alo na'qaatqa ma' setaqaugui na qomyipi, ñila' na ỹoreta'oguit qomyipi quiyim retaqa, qam qaiyiita se qana'xaỹaxañiua'. Ca' 'eda da 'neeta da la'qaatec ñi qara'gaxala'.” 22Ca' vichiguiño' naua na'qaatqa se qaiuanapegalo chi letanqa nqohin ná'maq saqa' icoñiguit da na'qaatec, qam mesqai ná'maq mashic icoñiguit da na'qaatec. Qam quiyim qaỹa'xate' naua la'qaatqa ñi qota'a chi letanec nqohin ná'maq mashic icoñiguit da na'qaatec, mesqai ná'maq sqai huelec da na'qaatec. 23Ca no'm ná'ogue lapoota'ta' ná'maq mashic icoñiguit da na'qaatec, ca no'm ná'ogue ỹa'xateta'pe naua na'qaatqa se qaiuanapegalo, ca no'm 'vii caua inoxondo quená'maq saqa'leca ca ỹa'den, loqo'm quená'maq saqa' huelec da na'qaatec, ¡vire'to' ma' ishit 'naac quiyim se nouooguiñi! 24Qam no'm ná'ogue ỹa'xateta'pe naua la'qaatqa ñi qota'a, ca' inoxono ca saqa' icoñiguit da na'qaatec, loqo'm ca sqaica ca ỹa'den, qam chi netanalta' ca'maxare, chaqai na'deenalta' nqai'en ná'maq lasauaxaset, ma' 'xaỹa ná'ogue ná'maq 'xachitac. 25Ca ná'maq hueetagui añi le'taxanata re'oq. Ime, ca' ishit ỹa'yi'iñi naua le'cootal quiyim imaqachintac ñi qota'a, chaqai ỹa'xatetac quiyim ỹaatqajam llic ỹalequetauguilo qamiri ñi'maxare.
Ma' 'viichii ca lapoxoguii, ca 'maxachichiguiñi cá'ogue ca leloxoỹaxac
26Ca' qamiri ỹaqaỹa', quedá'maq 'neeta dajo: Quiyim quena' ỹovita quiyim lapoiỹata', 'ue ca 'ue ca lo'ueenec caqamiri, loqo'm 'ue ca 'ue ca lapaxaguinataxanaxac, loqo'm 'ue ca 'ue ca qaỹa'deenaxanaxanegue quiñi qota'a, loqo'm 'ue ca ỹa'xate' naua ỹora'alo na'qaatqa, loqo'm 'ue ca ichoxot ca leloxoỹaxague' naua na'qaatqa. Hua', qam quiyim ná'ogue najo no'ueenaxat ca lañaqtaxac nqai'en ca la'al ná'maq mashic icoñiguit da na'qaatec. 27Ca quena' qaỹa'xate' naua ỹora'alo na'qaatqa, ca retaxahi' caua dos qomi'. Chaqai no'm 'ue ca liỹa, qam se napacalgoto yaua tres, chaqai na'ualtecta'. Chaqai 'ue ca ichoxot ca leloxoỹaxague' naua na'qaatqa. 28Qam no'm qaica ca ishit quiyim ichoxot ca leloxoỹaxague' naua na'qaatqa, ca 'maxaraic quiyim qaica ca retaqa queca lapoxoc, ta'ta'a quiyim quiñi 'óna nalamaqchi'chiguit ñi qota'a. 29Chaqai qai'neeta quiyim 'vii caua ỹa'xate' naua la'qaatqa ñi qota'a, ca retaxahi' caua dos loqo'm caua tres, ca' na liỹaripi retanete' ná'maq ỹa'xatesac caua'maxare. 30Ca no'm ñi qota'a 'ue ca ỹa'deenaxanaxan quená'maq nqa'xantañi, ca cá'maq 'auaxaic ỹaxanñi da ỹa'xatetac. 31Ca ma' qamiá'ogue 'xachii' naua la'qaatqa ñi qota'a shichii quiyim taxahi 'onatac caqamiri, qaiyi qamiá'ogue 'ue ca 'yiiñii chaqai 'ue ca rquesaxanaxahi. 32Chaqai ná'maq ỹa'xateta'pe naua la'qaatqa ñi qota'a, 'maxaraic quiyim ỹa'den nollaalta'. 33Ma' ñi qota'a sqa chicqo'ot da quiyim nasauaxatetecta' na qomyipi. Ta'ta'a da na'maxa chicqo'ot ñi'maxare.
Ma' da no'ueenataxac ná'ogue ana lo'ueenaxanaxaqui na qarqaỹaripi qarpi'ỹaxauaripi 'neetasa': 34Na 'aallipi se ishit retaqa quena' ỹalequetaho quena lapoxoc ná'maq mashic icoñiguit da na'qaatec, ma' se qaỹa'maxaren. Ta'ta'a quiyim na'xaỹaxanta, ma' 'nerac dajo yaua naneresañi laqataxaco ñi qota'a. 35No'm nishiitaque 'ue ca ỹa'den, ca inat cá'maq loua queca la'a', ma' sqa taiguit aca 'aalo quiyim retaqa queca lapoxoc.
36Ñaqa 'yiiñi'a quiyim da la'qaatec ñi qota'a sqa chicqauguilo qamiri, chaqai mesqaqamita coñiguit da'maxare. 37No'm 'ue ca pe'taxantaque quiyim mashic la'qaataxanqajnec ñi qota'a, loqo'm pe'taxantaque quiyim mashic icoñiguit so Espíritu Santo, ca 'maxaraic quiyim ỹa'deena'a dá'maq seretegueñi caqamiri, ma' da'maxare laqataxac so qara'gaxala' Jesús. 38Qam no'm se ỹa'deena'a dajo, ca' ca'maxare qai'neeta se qaỹa'deena'a.
39Vichiguiño' qamiri ỹaqaỹa', nquipichiỹa'pegue' quiyim 'xachii' naua la'qaatqa ñi qota'a, chaqai se quepaxachii quiyim qaỹa'xate' naua ỹora'alo na'qaatqa. 40Qam ná'ogue na'maxare 'maxachichiguiñi ca llicyaxac.
Currently Selected:
1 Corintios 14: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
