Genesis 23

Saracta pampananpämi ćhaclacta Abraham lantin

1Ñatac paćhac ishcay ćhunca anćhish (127) watam Sara cawsala. 2Canaanpa Quiriat-arba (Hebron) nishan lädućhümi Sara wañucula. Chaymi Abraham lutucula, chaynütac llaqui-llaquicta waꞌacula. 3Chay caśhancäpïta Abraham śhalcuculculmi Het caśhtacunäman lilcul nin: 4“Amcunaćhu mana Israel caśhta pulicüllam callá.#Heb 11.9, 13. Walmïta pampaycunäpä allpayquita lanticaycälillämay”#Hch 7.16. nil.

5Niptinmi Het caśhtacunaca nin: 6“Taytay, am canqui quiquin Tayta Diospa aclacuśhan puydïcämi. Wañüniquita munaśhayqui allinnin sityumanlä pampaycuy. Manaćh mayannïpis imapi mićhaculcäná canꞌachu” nil.

7Niptinmi Abraham śhalcuculcul jinantin Het läducunäman uyshuycula. 8Jinalculmi: “Wañünïta pampaycunäpä rasunpa awniycälimalꞌa, Zoharpa chulin Efronta ruygaycapallämay, 9Macpelaćhu cä ćhaclanpa manyanćhu maćhayninta lanticaycamänanpä. Amcunaćhu pampaculcänäpä tincüninmanćhari uyculläśha quiquïpäña caycunanpä” nin.

10Ñatac chay Het caśhtacunäćhu Efron täcuyalmi lluy nishanta uyalïla. Chaymi malcap puncunpa pasäcunäpa ñawquin, jinaman lluypa ñawquin śhalculcul nin: 11“Taytay, manam lantićhülächu uycuśhayqui. Chay maćhayta ćhaclantinta dinbaldillam uycuśhayqui. Lluy malcamasïcunap ñawquinmi uycuc wañüniquita pampamunayquipä” nil.

12Niptinmi allpayücunäpa puntanćhu Abraham uyshuycul, 13lluypa puntanćhu Efronta nin: “Ama chaynu callaychu uyaliycallämay. Ćhaclap ćhaninta uycunacpä ćhasquiycallämay. Chayläćha wañünïta pampaycamuśhä” nin.

14Niptinmi Efron nin: 15“Taytay, uyaliycallämay. Chay ćhaclap tawa paćhac (400) illaymi ćhanin. ¿Maynüpam chaytala unacuyäśhun? Wañüniquita pampamuy jinalla” nil.

16Chay Efron nishanta Abraham awnilculmi lluy Het läducunäpa ñawquin tawa paćhac (400) illaycäta uycula. Chay timpu lanticücunäman tincütamari uycula. 17Chaynüpam Efronpa Mamrep chimpan Macpelaćhu ćhaclanta, maćhaynintinta, lluy muyülïninćhu lantantintapis lantila. 18Chaynu lantinaculcäla lluy Het läducunäpa ñawquinmi, jinaman chay malcap puncunpa lluy pasäcunäpa ñawquinmi.

19Chaymi chay Mamrep chimpan Macpela ćhaclaćhu cä maćhaycäman walmin Saracta Abraham pampaycamula. Chayta Hebron nipäculatacmi. Chay cala Canaanpa allpanćhümari. 20Chaynüpam Hetpa caśhtancunapïta lantisha ćhaclapis maćhaypis Abraham ayllucuna pampanaculcänanpäña cala.

Currently Selected:

Genesis 23: QVW

Highlight

Copy