Genesis 22

Abrahampa chalapacuynintam Tayta Dios yaćhapaycun

1Chaypi unay pasäluptinmi Tayta Dios Abrahampa chalapacuynin imanuy caśhantapis licaycuyta munala. Chaymi ayala: “Abraham” nil.

Payñatacmi: “Cayćhümi cayá” nin.

2Chaymi Tayta Dios: “Japallan cuyay chuliqui Isaacta puśhaculcul Moriah läduman liy. Chay nishá ulꞌućhüćha wañulcachil unanchaycuśhäcäćhu cañaycapamanqui” nin.

3Chaymi wäla wälalla Abraham śhalcuculcul aśhnunta carunaculcul ishcay uyway nunancunawan jinaman chulin Isaacwanpis liculcäla. Chaynütacmi chulinta wañulcachil Tayta Dios nishan ulꞌućhu cañaycunanpä yamtactapis apala. 4Ñä quimsa muyunpïtam Abraham licaćhacul chay nishan ulꞌuca calućhüla caśhanta licälun. 5Chaymi liwshïnin uywayninta Abraham nin: “Cayllaćhu aśhnuntin capäcuchcanqui. Yaꞌañatacmi Tayta Diosta alawaycú Isaacwan janay ulꞌüta ishpïlälisha. Chaypïta caymanmi cutipämuśhä” nil.

6Nilculmi cañananpä cä yamtäta chulin Isaacman śhawalcachil, Abrahamñatac nina latachicücätawan cuchillüta apaculcul liculcan. 7Chayćhümi Isaac: “Papay, papay” nin.

Niptinmi Abraham: “Má, nimay” nin. Chaymi: “Nina latachicücätawan yamtallactam apayanchic, ¿wañulcachil cañanapä mayćhütan uwishcá cayan?” nin.

8Niptinmi Abraham: “Quiquin Tayta Diosmi uwishcäta cañanapä uycamäśhun” nin. Nilculmi cuscan lipäcula.

9Chay Tayta Dios nishan ulꞌuman ćhayculmi Abraham juc uycuna patacta lulaycul yamtäta ćhulaycula. Jinalculmi chulin Isaacta ćhänalcul yamta caśhancäman ćhulaycülun.#Stg 2.21. 10Chaypïtam Abraham cuchillüta apticulcun chulinta muꞌunanpä. 11Chayćhümi janay pachäpi anjilca: “Abraham, Abraham” nilpämun. Niptinmi Abraham: “Cayćhümi cayá” nin.

12Niptinmi anjilca: “Ama imanaypischu walaśhcäta. Tayta Diosta manchacuśhayquita ñam yaćhaycüña. Chay japallan cuyay chuliquitapis ama-pacha manam niycunquipischu” nin.

13Niptin Abraham muyülïninta licalcunanpämi juc ulu uwish jaćhaman wälan chalacacüśha cayäña. Chayta chalalculmi chulinpa pudirnintaña Tayta Diospä cañaycapula.#Heb 11.17-19. 14Chay sityuctam Abraham śhutichäla “Tayta Diosmi ćhulaycamun” nïta. Chaymi canancamapis nipäcun “Chay ulꞌućhu Tayta Diosmi ćhulaycamun” nil.

15-16Ñatac janay pachäpi anjilca Abrahamta yapam nin: “Quiquin Tayta Diosmi nishunqui: Japallan chuliquitapis manaña manalcullal uycamäśhayquipïtam, quiquïpa śhutïta śhaycaycachil limalicuc: 17Rasunpa, allinpä licaycuśhayqui, mana camacaycü uyllurcunätanu, awishquicunactanümi milayniquitapis uycuśhayqui.#Heb 6.13-14; 11.12. Chaynütacmi milayniquicuna ćhïnïnincunactapis maquinćhu cachipäcunꞌa. 18Cäsucamäśhayquipïmi milayniquićhu jinantin pachäćhu malcacunaca allinpä licaycuśhä#Hch 3.25; Gal 3.8. capäcunꞌa” nin.

19Chaypïtam uywaynin alcapäcuśhancäman cutila. Chaypïtam Beersebacta llapanña cutipäcul, chayćhu yaćhala.

Nacorpa chulincuna

20Caycuna pasatityäluptinmi Abrahamman willaycapäcula: “Wawꞌi-caśhayqui Nacorpa chulintam Milca ishyacülun” nil. 21Caycunam cala: Wamä chulinmi Uz, atimüninñatacmi Buz, chaypa atïninñatacmi Arampa taytan Kemuel. 22Śhullcancunañatacmi Quesed, Hazo, Pildas, Jidlaf, Betuel capäcula. 23Betuelpa chulinñatacmi Rebeca cala. Chayurá Abrahampa wawꞌi-caśhan Nacorpa pusä chulin walmin Milcaćhümi cala.

24Ñatac Reuma uywanacuśhan walminćhümi Nacorpa chulincuna cala: Teba, Gaham, Tahas, Maaca.

Currently Selected:

Genesis 22: QVW

Highlight

Copy