Exodo 30

Insinsiu cañacu patacta lulananpämi nin

Exo 37.25-28

1“Chaynütacmi insinsiucta cañanapä acacia ilupïta cuadrädu uycuna patacta lulanqui. 2Tawan läduncunañatacmi tawa ćhunca picha (45) cintimitruyü-cama canꞌa. Altunmanñatacmi isun ćhunca (90) cintimitru canꞌa. Chay uycuna pataccällapïtam tawan isquinanćhu-cama lulanqui śhäcuya wälactanu. Chaycuna juc ilullapïta luläśham canꞌa. 3Chay tawan läduntapis, janänincunactapis, wälancunactapis ürunllanllanwanmi laꞌanqui. Janapay lädu muyülïninmi ichá üruwan ribityäśha canꞌa. 4Chay ribityäśhap ulapay manyancascanmanmi ishcay argüllacta ćhulanqui. Chay argüllacunaca wic lädun cay lädunćhümi canꞌa. Chaypam apanapä cä bäracta pasachinqui. 5Chay bärancunactapis acacia ilupïta lulalculmi üruwan laꞌalunqui. 6Chay insinsiu cañana patactam ćhulanqui limalicuśhan babulpa puntan läduman; amwan tincunanchicpä cä täpanpa puntan lädumanmari.

7“Wälanpa michïrucunäta Aaron allichalmi tuqui aśhnä insinsiucunacta insinsiu cañacüćhu cañaycunꞌa. 8Chaynütacmi aspilpuyćhu michïructa latachiśhanćhüpis insinsiucunacta Aaron cañaycunꞌa. Chaytanümi Tayta Diospa lluy milayniquicunapis lulaycapäcunꞌa. 9Cay insinsiu cañana patacćhu amam juc licchä insinsiucunactapis, cañanacunactapis, uywacunactapis, uycuna micuycunactapis cañaywan uycapäcunquichu; nïtac uycuna bïnucunactapis jićhaywan uycapäcunquichu. 10Ñatac watan-watanmi Israel caśhtacunäpa juchanta Aaron chuyanchaycunꞌa. Chaynu lulaycunꞌa insinsiu cañanapä cä wälaniläninman uycuśhan uywap yawarninwan llusiyculmi. Chay insinsiu cañanapä patacca Tayta Diosllapä japächaycuśham cayan” nil Tayta Dios nila.

Chuya carpaćhu imapis pishipacuynincunapä uycunanpämi nin

11Nilculmi Moisesta Tayta Dios nin: 12“Jinantin Israel caśhtaca ayca caśhantapis fintayaptiqui Tayta Diosta uycälinꞌam. Chaynu lulapäcuptiquim imaymana mana allincuna amcunaman mana ćhäpäcuśhunquichu. 13Lluy fintaśhancunämi picha grämu illayta Tayta Diosman uycapäcunꞌa. Chaynu uycapäcunꞌa chuya carpaćhu mïdinapä camachishanpa ćhawpintam. 14Caynu Tayta Diosman uycälinꞌa ishcay ćhunca (20) watayüpi janaman fintaśhacunämi. 15Chaynu juchanta chuyanchaycunanpä rïcucunäpis picha grämu illaypïta mastá manam unmanchu; nïtac wacchacunäpis picha grämu illaypïta minustá unmantacchu. 16Chaymi chay juchanpïta libraculcäśhanpi illay uśhancunäta am quiquiqui ćhasquiycunqui. Chaymari chuya carpaćhu ima pishipacuynincunapäpis caycunꞌa. Chaynu Israel caśhtacunaca uycapäcuśhantam Tayta Dios yalpanꞌa ima mana allinpis ćhänanpi” nil.

Maqui paꞌacunacta lulananpämi nin

Exo 38.8

17Chaypïtam Moisesta Tayta Dios nin: 18“Chaynütacmi juc maqui paꞌacunacta brunsipïta lulanqui; täcunanpis brunsipïmi canꞌa.#Exo 38.8. Chaymanmi yacucta ćhulaycunqui paꞌacunapä cananpä. Chayta ćhulanqui chuya carpap yaycunanpä yaycuycul uycuna patacman linap ćhawpićhu cayalmi. 19Chayćhümi Aaronpis, chulincunapis maquintawan ćhaquinta paꞌaculcanꞌa. 20Chaynu paꞌaculcanꞌa Chuya Sityuman aśhuyculmi ütac uycuna patacman Tayta Diosta cañaywan uycunanpä cañayculmi. Chaynu paꞌaculcalmi mana wañupäcunꞌachu. 21Chayurá maquintawan ćhaquintam mana wañupäcunanpä paꞌaculcänan. Cay camachishäca Aaronpäwan milaynincunapä wiñaypämi canꞌa” nil.

Japächana asaytictawan insinsiucta lulananpämi nin

22Chaypïtam Moisesta Tayta Dios nin: 23“Anmi allinnin jaćhacunacta#30.23 jaćhacunacta nishanta waquincunaćhuꞌa “lantacunacta” nipäcunmi. aclaycunqui japächaycunapä cä asayticta lulanayquipä. Caycunactam aclanqui: Pusä quïlucta allinnin mïrracta, quimsa quïlucta tuqui aśhnänin canïlacta, allinnin tuqui aśhnä cäñactapis quimsa quïluctatac. 24Chaynütac uycuna patacpa midïdanmannu süta quïlu camayta casia nishantapis aclaycuy, quimsa litructa ulïbus asaytictapis. 25Lluy caycunawanmi japächaycunapä cä asayticta lulaycunqui. Alli-cama pirfümicunacta luläcunänümari lulaycunqui. Chay asaytica japächanapä llusiycunapämi canꞌa. 26Cay asaytiwantacmi llusiycunqui: chuya carpacta, limalicuśhan babulcäta, 27mïsacta lluy cänintinta, jatun michïructapis lluy cänintinta, insinsiu cañaycunapä patactapis. 28Chaynütacmi pasaycunqui cañanapä cä uycuna patacta lluy cänincunacta, chaynütac maqui paꞌacunacta täcunantintapis. 29Chaynüpam lluy chaycunacta japächaycunqui chuya cananpä. Chaymi chaycunaman imapis ćhaycücá chuyaña caycunꞌa.

30“Chaynütacmi asaytiwan llusiycul japächaycunqui Aaronmanpis chulincunamanpis sasirdütïnu sirbipämänanpä. 31Chaypïta jinantin Israel caśhtacunätam ninqui: ‘Cay asaytim lluy milayniquicuna japächaycuśha chuya cananpä canꞌa. 32Amatacmi yanꞌal nunacunämanꞌa llusiycuyanquichu, nïtac chay licchä juc asaytictapis lulanquichu. Chay asaytica japächaycuśha chuyam. Chaymi camachishanmannülla lulaycälinqui. 33Ñatac mayanpis chay licchä asayticta luläcätawan ütac yanꞌal mana sasirdüti nunacunäman llusiycücätá malcapi alüśham canꞌa’ ” nil.

Imaymana jaćhapi insinsiucta lulananpämi nin

34Chaypïtam Moisesta Tayta Dios nin: “Chay cusca tupullactam tupunqui: jaćhap wiꞌinta, mishqui aśhnä lamarćhu cäcäta, insinsiu jaćhacta, galbano jaćhap wiꞌintapis. 35Lluy caycunawanmi allinnin pirfümi luläcänu tuqui jucllachäśha cä chuya-chuya püru insinsiucta caćhintinta lulaycunqui. 36Chay lulaśhayquipi partintam tuqui maćhcay-maćhcayta aꞌalcul Chuya Sityućhu cä limalicuśhan babulcäpa puntanman ćhulaycunqui; tincunanchic cäcämanmari ćhulaycunqui. 37Chay lulaśhayqui insinsiuctanuꞌa manam pipis quiquinpä lulanmanchu; yaꞌallapä japächäśha insinsiu caśhan-laycumari. 38Ñatac mayanpis caynu insinsiucta luläcá malcanpi alüśham canꞌa” nil.

Currently Selected:

Exodo 30: QVW

Highlight

Copy