Exodo 31

Aläjacunacta lulä nunactam aclaycun

Exo 35.30—36.1

1Chaypïtam Moisesta Tayta Dios nin: 2“Yaꞌa aclaycú Bezaleelta, Juda ayllupi Urip chulinta, Hurpa willcantam. 3Paymanmi yaꞌa juntaycachí yaćhaynïta, umacta, tantiayta, imactapis yaćhaywan sumäta lulaycunanpä. 4Chaymi imaymana sumä aläjacunacta ishpiycachinꞌa illaycunapi, ürucunapi, brunsicunapïpis. 5Chaynütac lumicunapi labraycul aläjacunacta chalachinanpäpis lulaycunꞌa. Jinaman ilucunaćhüpis, ütac imapïpis imaymana aläjacunactam lulaycunꞌa. 6Yanapäninpäñatacmi ćhulaycú Aholiabta, Dan ayllupi Ahisamacpa chulinta. Cay aläja lulapäcunanpä ćhulaycuśhäcunactam mas yaćhayta uycú, lluy nishäcunacta lulaycälinanpä. 7Paycunamari lulapäcunꞌa: chuya carpacta, limalicuśhá babulcäta, chaypa jananćhu cä täpanta, carpaćhu cä lluy sirbichicunantapis. 8Jinaman mïsacta lluy cänintinta, ürunllanllanpi candilïructa lluy cänintinta, insinsiucta cañana patactapis lulaycunꞌamá. 9Chaynütacmi cañaywan uycuna patactapis lluy cänintinta, maqui paꞌacunactapis täcunantinta lulaycunꞌa. 10Jinaman Aaron sasirdütinu sirbimänanpä cä chuya müdanancunactapis, chulincuna sasirdütinu lulapäcunanpä müdanancunactapis lulaycunꞌam. 11Chaynütac japächaycunapä cä asaytictapis, Chuya Sityućhu tuqui aśhnä insinsiucunätapis lulaycunꞌam. Paycunamari camachishätanülla lluy lulaycälinꞌa” nil.

Jamana muyunćhu jamananpämi nin

Exo 35.1-3

12Nilculmi Moisesta Tayta Dios nin: 13“Am quiquiqui Israel caśhtacunäta niycamuy: ‘Jamana muyuncäćhu manchacuywanmi jamaycälinqui. Caymi canꞌa japächaycuśhäta yaćhaycälinayquipä. Chayurá cay muyuncämari juc siñal caycunꞌa amcunawan milayniquicunawanpis wiña-wiñaypä. 14Cay jamana muyunca amcunapä japächaycuśhä muyun captinmi manchacuywan licaycälinayqui. Chay muyunta jalutacücunäñatacmi ichá bïdanwan mućhuycachisha canꞌa. Chaynütacmi chay muyun imallactapis lulaycücá malcapi wicapäśha canꞌa. 15Süta muyunmari imacta lulanayquipäpis cayan. Anćhish muyuncäñatacmi Tayta Diospa japächäśha jamana muyun cayan.#Exo 20.8-11; 23.12; 34.21; 35.2; Lev 23.3; Deut 5.12-14. Mayanpis chay muyunćhu luläcá wañunꞌam. 16Cay jamana muyunca limalicuśhä captinmi Israelpa lluy milaynincuna wiña-wiñaypä lulaycälinꞌa. 17Cay siñal caycunꞌa Israel caśhtacunäwan wiñaypämari’ nil. Yaꞌa Tayta Diosmi süta muyun janay pachätawan cay pachäta camalá. Anćhish muyuncäćhüñatacmi jamapayculá, tïpupayculá” nil.#Exo 20.11.

18Chay Sinai ulꞌüćhu Tayta Dios Moisesta limapayta camacalculmi lumipi ishcay tablachacta uycula. Chay tablachaman quiquin Tayta Dios maquinwan ćhunca camachicuyta isquirbiyculmi uycula.

Currently Selected:

Exodo 31: QVW

Highlight

Copy