Exodo 27

Uycuna patacta lulananpämi nin

Exo 38.1-7

1“Chaynütacmi acacia ilupïta uycuna patacta lulanqui. Tawan lädu canꞌa ishcay mitru ćhawpincamam (2.5); altunñatacmi juc mitru ćhawpin (1.5) canꞌa. 2Chay uycuna pataccällapïtam tawan isquinanćhu-cama lulanqui śhäcuya wälactanu. Chaycuna juc ilullapïta luläśham canꞌa. Brunsiwantacmi lluy uycuna pataccäta laꞌalunqui. 3Chaynütacmi chay uycuna pataccäpa ućhpa ćhulacunta, pälanta, tasunninta, tinidurninta, śhanśha ćhulacunta lulanqui. Lluy chaycunactam brunsipïta lulanqui. 4Jinaman mällactanümi brunsipïta lulanqui. Chaypa tawan isquinanćhümi brunsipïta tawa linlicunactapis lulanqui. 5Chay mällanu cayäcätam uycuna patacpa śhunꞌunman ćhulanqui. Chaymi uycuna pataccäpa ćhawpinćhu canꞌa. 6Chaynütacmi acacia ilupïta brunsiwan laꞌaśha ishcay bärantapis lulanqui. 7Chay bärancunacta linlin cäcunäpam pasachinqui. Chaycunam uycuna patacta wicpi caypi apanapä canꞌa. 8Uycuna patacpa lulïninꞌa jäcuyämi canꞌa. Wätancunañatacmi ilupïta canꞌa. Cay ulꞌüćhu licaśhayquitanümari lulaycunqui.

Chuya carpap patyunta lulananpämi nin

Exo 38.9-20

9“Chaynütacmi chuya carpap patyuntapis lulanqui. Chay sur lädu patyunpa curtïnancunam fïnu lïnupi cawpüśha canꞌa. Largunꞌa tawa ćhunca pichayu (45) mitrum canꞌa. 10Chay paradïruncunawan brunsipi simintuncunäñatacmi ishcay ćhunca-cama (20) canꞌa. Argüllanwan linlincunañatacmi illaypïta canꞌa. 11-12Inti jiꞌalpunan lädu ipa patyunꞌa tawa ćhunca pichayu (45) mitrum canꞌa. Curtïnancunapis chaynu midïdallatacmi canꞌa. Paradïruncunawan simintuncunapis ishcay ćhunca ishcayniyu ćhawpi (22.5) mitrum canꞌa. Argüllancunawan, linlincunawan, bärancunañatacmi illaypïta canꞌa. 13Chaynütacmi inti ishpimunan lädu patyunpis ishcay ćhunca ishcayniyu mitru ćhawpin (22.5) canꞌa. 14Chayćhümi anćhish mitru ćhawpin curtïna ćhuläśha canꞌa. Quimsan paradïruntacmi simintuyü-cama canꞌa. 15Puncup juc lädunćhu curtïnapis anćhish mitru ćhawpinmi canꞌa. Chayćhu quimsatacmi paradïruncunapis simintuyü-cama canꞌa. 16Patyuman yaycunaćhümi curtïna asulpi, murädupi, pucapi, lïnu cawpüśhapïpis, jinaman tuqui-tuqui burdäśhatacmi canꞌa. Chay isun mitrupïmari canꞌa. Tawa paradïruncunapis simintuyü-camam canꞌa. 17Chay patyućhu lluy paradïrucuna illaywan laꞌaśham canꞌa; simintuncunäñatacmi brunsipi; argüllancunañatacmi illaypïta canꞌa. 18Chayurá chay patyup largunmi tawa ćhunca pichayu (45) mitru canꞌa. Anchunñatacmi ishcay ćhunca ishcayniyu mitru ćhawpin (22.5) canꞌa. Wichayninmanñatacmi ishcay mitru ćhawpin canꞌa. Curtïnacunäñatacmi lïnu cawpüśhapi, simintuncunañatac brunsipïta canꞌa. 19Chay chuya carpaćhu lluy sirbichicunancunapis, chuya carpap ishtacancunapis, patyup ishtacancunapis brunsipïmi canꞌa.

Michïrup asaytinta lulananpämi nin

Lev 24.1-4

20“Ñatac Israel caśhtacunäta nimuy, michïrucunaca imaypis walayalcänanpä allinnin ulïbus asayticta apamunanpä. Chay ulïbusmi mućhcaćhu aꞌaśha canꞌa. 21Aaronñatacmi Tayta Diospa ñawpäninćhu michïruca walächi acchinanpä chulincunawan allichapäcunꞌa. Chay limalicuśhan babulpa puntanćhu curtïnap waśha lädunćhu cä michïrucunätamari allichapäcunꞌa. Cay camachicuytam milayniquicuna wiña-wiñaypä lulapäcunꞌa.

Currently Selected:

Exodo 27: QVW

Highlight

Copy