Exodo 26

Chuya carpacta lulananpämi nin

Exo 36.8-38

1“Ñatac aśhuycamunayqui chuya carpap atacuntam lïnu cawpüśhapi ćhunca tïlacunacta lulanqui. Chay canꞌa asulpïta, murädupïta, pucapïtam. Chay tïlanmanmi querubin anjilcunäta sumä tuquicta burdanqui. 2Cay atacu tïlacunaca chay midïdayüllam capäcunꞌa: Largunꞌa ćhunca ishcayniyu ćhawpi (12.5) mitrum canꞌa, anchunñatacmi ishcay mitru. 3Chay picha atacu tïlactam japä-cama tinquinacächishacta jilanqui. Chaynüllatacmi juc picha cäcunätapis jilanqui. 4Chay pichantin atacu tïlap manyanćhümi murädu cawpupi linlichancunacta lulanqui. Chay juc picha cäcunäpa manyanćhüpis chaynüllactatacmi lulanqui. 5Chay picha-picha cä tïlacuna caśhanćhu picha ćhunca (50) cawpupi luläśha linlichancunam walcalapäcunꞌa. Chaymi atacu curtïnacunaca chimpa-chimpa watanacunanpä canꞌa. 6Chaynütac ürupïta picha ćhunca (50) argüllacunacta lulanqui. Chaywanmi picha ćhunca-cama (50) linlichancunapi atacu tïlacunäta jucllachanqui. Chaynüpam chuya carpap atacun juc-yupayllaña canꞌa.

7“Chaynütacmi ćhunca jucniyu (11) atacu tïlacunacta capishpa ächanpi lulanqui. Cay atacu chaycusca midïdallam canꞌa. 8Largunmanmi ćhunca quimsayu ćhawpi (13.5) mitru canꞌa, anchunmanñatac ishcay mitru. 9Chay picha atacu tïlactam pärish-pärishta tinquilcachil jilanqui. Chay jucllay tïla chuya carpap punta läduman pasaläcätañatacmi patïlunqui. 10Chaynütacmi chay tïlap manyanpa patanćhu picha ćhunca (50) linlichancunacta cawpunqui. Chaynütacmi chay juc lädunćhüpis picha ćhuncacta (50) cawpunqui. 11Jinaman brunsipïta picha ćhunca (50) argüllacunactapis lulanquim. Chaycunawanmi linlicunapi chalachinqui. Chaymi chuya carpa jucllayllaman tinquïsha canꞌa. 12Chuya carpap tïlancuna mas largu-cama calmi pasalanꞌa, ćhawpipi walcalayal carpap ipan lädućhu. 13Chaymi chuya carpap jucnin lädunmanꞌa tawa ćhunca pichayu (45) cintimitru pasalanꞌa. Jucnin lädunpïpis chaynülla walcalayalmi ñaćhaña carpap ishcaynin lädunta täpanꞌa.

14“Chay chuya carpap tïlanpa janäninpäpis juc atacunta ulu uwishpa utanta pucawan tiñïshapïmi lulanqui. Chaypa jananpapis fïnunnin utacunapïtalämi lulanqui.

15“Chaynütacmi acacia ilupïta chuya carpap paradïrunta lulalcul dirichullacta śhaycachinqui. 16Chay paradïruncunam largunpi tawa mitru ćhawpincama capäcunꞌa. Anchunpïñatacmi süta ćhunca picha (65) cintimitru-cama canꞌa. 17Paradïruca śhaycachisha cananpämi ishcay pasalayä puntachayü-cama capäcunꞌa. Chaynütam lulaycunqui lluy paradïrunćhu-cama. 18Chay ishcay ćhunca (20) paradïrucunactam chuya carpap sur läduman śhaycachinqui. 19Chaynütacmi simintunpäpis illaypi lulanqui tawa ćhunca (40) simintucunacta. Juc paradïrumanmi ishcay simintucta ćhulanqui. Chay pasalayä ishcay puntachancunactamari jucninman-cama śhaycachinqui.

20“Chaynütacmi chuya carpap ichünin lädunpäpis ishcay ćhunca (20) paradïructatac lulanqui. 21Chaynu ishcay-cama calmi tawa ćhunca (40) illaypïta simintuncuna paradïrunćhu canꞌa. 22Chuya carpap ipan lädupäñatacmi süta paradïructa lulanqui. 23Chay ipan lädu isquinanpäpis ishcay paradïructatacmi lulanqui. 24Chay ishcaynin paradïrum pampäpïta altucama juc paradïrucunäwan camay-camaylla canꞌa. Chaynu calmi altu isquinanćhu paradïrucunätawan tacyachinanpä uchuy tablachawan chalachisha canꞌa. Chaynüllam ishcaynin isquinanćhu paradïrupäpis canꞌa. 25Chayurá tawan isquinanćhu pusä paradïrucunam canꞌa; ćhunca sütayu (16) illaypi simintucunam canꞌapis. Juc paradïrum ishcay simintuyü canꞌa.

26“Chaynütacmi paradïrucunäta tacyachinanpä picha titasca bäracta lulanqui. Chaypis acacia ilupïta luläśham canꞌa. 27Juc lädunta chalalänanpäpis chaynu picha titasca bäram canꞌa. Ipan lädupäpis chaynu pichatacmi canꞌa. 28Ćhawpinpa pasäcäñatacmi lluy paradïrucunap śhunꞌunpa pasanꞌa. 29Chay paradïrucunäta, titasca bäracunätapis üruwanmi laꞌalunqui. Chay titasca bäracunaca pasananpä linlichancunactañatacmi ichá ürupi lulanqui. 30Chay ulꞌućhu licachishätanüllamari carpäta lulaycunqui.

31“Chaynütacmi juc curtïnacta lulanqui asulpi, murädupi, pucapi, jinaman cawpüśha fïnu lïnupïpis. Chaycunaćhu querubin nishan anjilcunam tuqui-tuqui burdäśha canꞌa. 32Chaypïtam acacia ilupi üruwan laꞌäśha tawa paradïructa, tawa simintuyü-camacta śhalcachinqui. Chaymanmi ürupi luläśha illaypi cä argüllacunäta walcanqui. 33Chay ganchucunämanmi curtïnäta walcanqui cuartucta ishcayman laquinanpä. Jinamanmi chay curtïnap ipan läduman limalicuśhan babulcäta apaycunqui.#Heb 6.19; 9.3-5. Chayurá chay curtïna canꞌa Chuya Sityupi mas Sumä Chuya Sityucta laquinanpämi. 34Chay limalicuśhan babulpa janäninmanmi täpacta ćhulaycunqui. Chayta ćhulanqui Sumä Chuya Sityumanmari. 35Waśha lädu cuartućhu ichü lädunmanñatacmi mïsacta ćhulanqui. Jatun michïrütañatacmi mïsap chimpan allï lädunman ćhulanqui.

36“Chaynütacmi chuya carpap puncunpä tuqui-tuqui burdäśha curtïnacta lulanqui. Chay canꞌa asulpïta, murädupïta, pucapïta, fïnunnin lïnupïta cawpüśham. 37Chay curtïnaca walcalänanpä ürupïta linlichancunactam lulanqui. Jinaman acacia ilupi üruwan laꞌäśha picha paradïructam lulanqui, brunsipïta picha simintuyü-camacta. Chay paradïrucunämanmi curtïnacta walcälunqui.

Currently Selected:

Exodo 26: QVW

Highlight

Copy