Exodo 12
12
Tayta Dios Libraycuśhan Fistapämi nin
1Chay Egipto nasyunćhu cayalcaptinmi Moisestawan Aaronta Tayta Dios nin: 2“Cay watap allaycuynin quillamari amcunapä sumä puydïnin quilla canꞌa. 3Lluy Israel caśhtacunätam ninqui: Cay quillap ćhunca muyunninćhümi wasićhu-cama, ayllunpa-cama malta uwishta japächapäcunꞌa. 4Ñatac wasićhu ashllaylla capäcul puchunanta yaćhapäculꞌa, läduyquićhu yaćhäcäwan jucllay uwishllacta japächapäcuy. Chayta micapäcunan camayllacta lluy camachinaculcanqui. 5Chay canꞌa, juc watayu ulu uywa tuqui allinnin uywam; canmanmi uwishpis ütac capishpis. 6Chay uywacta cay quillap ćhunca tawayu muyunnincamalämi ćhulanqui. Chay muyunñam inti jiꞌalpüluptin lluy Israel caśhtacunaca wañuchipäcunqui. 7Yawarninwanñatacmi micapäcunayqui wasip puncunpa ishcaynin paradïrunman, chacacunmanpis llushinqui. 8Chay tutam aycha cañaycuśhayquitawan, mana libadürayu tantacta, ćhacćhä jaćhanpawan micapäcunqui.#12.8 ćhacćhä jaćhanpawan micapäcunqui nil Tayta Dios nila Egiptoćhu Israelcunaca ñacaśhanta yalpapäcunanpämi. Exo 1.14. 9Lluy umantinta, ćhaquintinta, allashquintinta ninaćhu ancäśhactam micapäcunqui. Ñatac ćhawa aychacta, nïtac yanüśhactapis amam micapäcunquichu. 10Amatacmi imallantapis wälapä ćhulapäcunquiñachu; puchücätá cañälälinquiñam. 11Chaynu listullaña yalapäcunayquipä apuray-apurayllam micapäcunqui: Müdanayquiwan müdacälälisha, llanquiquitapis ćhulacüśhallaña, garutiquitapis chalacüśhallaña. Cay canꞌa Tayta Dios Libraycuśhan Fistamari.#Lev 23.5; Num 9.1-5; 28.16; Deut 16.1-2; Mat 26.2-29; Mar 14.1-25; Luc 22.1-19; 1Cor 5.7. 12Chay tutam Egipto nasyunpa pasal lluy nunacunap, uywacunap wamä chulinta wañuchishä. Chaynütacmi jinantin Egiptoćhu taytachancunactapis mana caśhanman muyüchishä.
13“Ñatac chay mućhuchï śhamunäpä wasiquicunap puncunćhu yawar llushïsha cäcämi juc siñal caycunꞌa. Chay yawarcäta licälulmi Egipto läducunällaman pasacuśhä. Chaynüpam amcunacta ima mućhuchicuyllapis mana ćhäpäcuśhunquichu.
14“Chay muyunćha amcunapä sumä allin muyun Tayta Diosta yalpapäcunayqui fista canꞌa. Chay fistacta lluy milayniquicunapis wiñaypä lulaycälinanpä camachisham canꞌa. 15Chay anćhish muyunmi mana libadürayu tantacta micapäcunqui. Anćhish muyuncäñatacmi wasiquićhu lluy libadüracunacta chincachinqui. Mayanpis chay muyuncäćhu libadürayüta micücá Israel caśhtapi alüśham canꞌa. 16Chayurá allaycuynin muyunca, jinaman anćhish muyuncäpis jatun chuya muyunmi canꞌa. Chay muyunćhu manam ima lulaytapis lulapäcunquichu; micapäcunallayquipämi lulapäcunqui.
17“Canan caytam camachic: Egiptopi julupäcuśhäpïtam, Mana Libadürayu Tanta Fistacta#Exo 23.15; 34.18; Lev 23.6-8; Num 28.17-25; Deut 16.3-8. amcunapis, milayniquicunapis wiñaypä lluy lulapäcunꞌa. 18Chaymi allaycuynin quillaćhu ćhunca tawayu muyuncäpi aśhta ishcay ćhunca jucniyu (21) muyun tardicama mana libadürayu tantacta micapäcunqui. 19Chay anćhishnintin muyunca wasiquićhu libadüra manam talicunanchu. Mayanpis libadürayüta micücá masqui caśhtayquipi ütac juc caśhtapi calpis Israel caśhtapi alüśham canꞌa. 20Amam imactapis libadürayütá micapäcunquichu. May wasićhüpis mana libadürayu tantactam micapäcunqui” nin.
21Niptinmi Israelćhu lluy yaśhancunacta ayalcachimul Moises nin: “Juc uwishta ayllupi-cama ashipämü lipäcuy Tayta Dios Libraycuśhan Fistaćhu wañuchipäcunayquipä. 22Chay yawarninmi batyaćhu caycunꞌa. Chayman apti hisopo jaćhacta challpuycul wasip puncunćhu ishcaynin paradïruntawan chacananta llushiycunqui. Chay wasiquipi wälacama mayanniquipis amam yalapäcunquichu. 23Chayurá Tayta Dios Egiptocunäta mućhuycachï pasaptin wasiquićhu yawar caśhanta licälulmi pasacunꞌa. Chaynüpam wañuchicücäta wasiquiman manaña yaycachimunꞌañachu.
24“Chay camachicuyta ampis, chuliquicunapis imaycamapis wiñaypämi lulaycälinqui. 25Ñatac Tayta Dios limalicuśhan allpaman yaycapäculpis cayta jinallam lulaycälinqui. 26Chuliquicunañatacmi: ‘¿Imapätan cay lulayca?’ nipäcuśhunqui. 27Amcunañatacmi nipäcunqui: ‘Cay cayan Egiptopïta Tayta Dios Libraycuśhan Fistaćhu uycuśhanchiccämi. Paymi Egipto nunacunäta wañuyächilpis Israel caśhtacunäpa wasi janallanpa pasacula. Chaynüpam ayllunchiccunacta salbaycula’ nil nipäcunqui” nin. Niptinmi Israel caśhtacunaca unꞌulacuycul Tayta Diosta alawapäcula. 28Chaypïta Israel caśhtacunaca liculcalmi Moisestawan Aaronta Tayta Dios nishantanu lulaycälila.
Wamä chulincunactam camacaycun
29Chay nishannümi Tayta Dios Egiptoćhu lluy wamä chulicunacta ćhawpi tuta wañüchila.#Exo 4.22-31. Faraoncäpa palasyunćhu täcü wamä chulinpi aśhta carsilćhu wićhalacä-camam lluy wañüchila. Chaynütacmi lluy wamä uywacunactapis supayapächila. 30Jinaptinmi chay tuta śhalcacalcälil Faraoncäpis, yanapänincunapis, jinantin Egiptoćhu nunacunäpis sumä-sumä awćhuculcäla. Manamá jucllay wasillaćhüpis wamä chuli cawsayculachu.
31Chaymi chay tuta Faraonca Moisestawan Aaronta ayalcachimul: “Mañapämäśhayquinu amcunapis lluy Israel caśhtacunäpis Tayta Diosniquita alawä wayra pasaculcayñari. 32Nipämäśhayquinütac uwishniquicunactapis, wäcayquicunactapis aticulcul liculcay. Chayćha yaꞌapäpis mas allin caycunꞌa” nin.
33Lluy Egipto nunacunäñatacmi “lluypis camacäśhunćha” nil Israel caśhtacunaca liculcänanpä aluypaña-alupäcula. 34Chaymi Israel caśhtacunaca batyaćhu tantapä chapuśhantapis mana libadüracta jillpüśhallactaña chusincunaman ipichacalcälil ipiculcäla. 35Chaynütacmi Moises nishannu israelcunaca ürupi, illaypi aläjacunactawan müdanacunacta Egipto nunacunäpi mañaculcäla. 36Tayta Diosñatacmi Egipto nunacunäpa śhunꞌunta llampuchaycula lluy mañaculcäśhanta uycälinanpä. Chaynüpam Egiptocunäta calapatäla.#Exo 3.21-22.
Israel caśhtacunämi Egiptopïta yalapäcun
37Jinalculmi Israel caśhtacunaca Rameses lädupi yalapäcula Sucot läduman. Wayapanllanlämi süta paćhac walanga (600,000) cacula. 38Paycunawanmi imaymana achca-achca nuna lipäcula; canćha-canćham uwishcunapis, wäcacunapis yalupäcula. 39Ñatac Egiptopi mana-mana yalapäculmi micuytapis manaña yanuculcälachu. Chaymi mana libadürayu arina apapäcuśhancunapïta tantacunacta lulapäcula.
40Má, cay Israel caśhtacunämari Egiptoćhu tawa paćhac quimsa ćhunca (430) wata yaćhapäcula.#Gen 15.13; Gal 3.17. 41Chay tawa paćhac quimsa ćhunca (430) wata camacäluptin-pachallam Tayta Diospa lluy nunancuna Egiptopi yalapäcula. 42Ñatac chay tuta Egiptopi julunanpämi Tayta Dios walächi ñawillanćhu caycachila. Chay fistacta yalpayninwanmi Israelpa milaynincunapis chay tuta walächi lichcapäcunan cala.
Tayta Dios Libraycuśhan Fistaćhu imanuypa lulaycälinanpämi nin
43Chaypïtam Tayta Dios Moisestawan Aaronta nin: “Tayta Dios Libraycuśhan Fistapä caymi camachicuyca: Cay uycapäcuśhayqui aychapïta amam juc caśhtacuná micapäcunꞌachu. 44Ñatac illaywan lantisha uyway nuna siñalachicüśhacunämi ichá micapäcunꞌa. 45Watucülla, lulapacülla śhamü nunacunaca amam micapäcunꞌachu. 46Ñatac chay fistaćhu aychacta wasillayquićhümi micapäcunqui. Amam waśhaman julacalcälilꞌa micapäcunquichu nïtac jucllay tullullantapis paquiycapäcunquipischu.#Num 9.12; Juan 19.36. 47Lluy Israel caśhtacunämari caynu lulaycälinqui. 48Ñatac Tayta Dios Libraycuśhan Fistaćhu juc caśhta amwan cayta munaptinꞌa, umri cayninćhu siñalachicuchun. Chayurá caśhta-masiquinüñam canꞌa. Mana siñalachicüśhacá amam pipis micunꞌachu. 49Caynu camachicuyllam caśhta-masiquicunapäpis, juc caśhta amcunawan yaćhäcunapäpis canꞌa” nil.#Num 9.14.
50Chaynu Moisestawan Aaronta Tayta Diospa camachishantanüllam lluy Israel caśhtacunaca lulaycälila. 51Chay muyuncällatacmi Tayta Dios Israel caśhtacunäta fïla-camallacta Egiptopi juluchila.
Currently Selected:
Exodo 12: QVW
Highlight
Share
Copy
Want to have your highlights saved across all your devices? Sign up or sign in
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
