Exodo 13

Wamä näsimücunaca Tayta Diospä japächäśha cananpämi nin

1Chaypïtam Moisesta Tayta Dios nin: 2“Israel caśhtaćhu lluy wamä näsimücunaca yaꞌapämi japächaycuśha canꞌa, nunacunäćhüpis uywacunäćhüpis” nil.#Num 3.13; Luc 2.23.

3Chaymi Moises jinantin malcäta nin: “Cay Egiptoćhu uyway capäcuśhayquipi Tayta Dios jatun munayninwan canan muyun juluśhuśhayquita yalpapäcunquim. Chaymi libadürayu punquïshacta ama micapäcunquichu. 4Canan yaluyalcanqui Abib quillaćhümi. 5Tayta Diosmari Canaan, Jebus, Het, Amhor, Hev läducunäpa allpanman yaycachishunqui. Chay awquilluyquicunaman imaypis tuqui-tuquicta wayuycachï allpa limalicuśhancäćhu cayalpis, cay Abib quilläćhu jatun fistacta jinallam lulapäcunqui. 6Anćhish muyunmari mana libadürayu tantacta micapäcunqui. Camacaynin muyuncäñatacmi Tayta Diosta alawana muyun canꞌa. 7Chay anćhishnintin muyuncämi mana libadürayu tantacta micapäcunqui. Amatacmari jinantin malcayquićhüpis imallactapis libadürawan punquïshactá ćhulapäcunquichu. 8Chay muyunmi chuliquicunactapis: ‘Cayta lulanchic Tayta Dios Egiptopi julaycamaśhanchicpïmi’ nil tantiachipäcunqui. 9Tayta Dios jatun munayninwan Egiptopi juluycuśhayquita mana unꞌanayquipämi maquiquićhu juc siñalnu canꞌa; ñawillayquićhüñatacmi yalpanayquipä caycunꞌa. Chayćha Tayta Diospa camachicuynin shimillayquićhu caycunꞌa. 10Chaymari watan-watan lulaycunqui unanchaśhan muyuncällaćhu.

11“Ñatac Tayta Dios anmanpis awquilluyquicunamanpis limalicuśhanmannümi Canaan läducunäpa allpanman yaycaycachil maquiquiman uycuśhunqui. 12Tayta Diospa lluy captinmi wamä walaśh chuliquita ütac wamä ulu uywayquita Tayta Diospa japächaycunqui.#Luc 2.23. 13Ñatac aśhnucunäćhu wamä näsimücätam uwishwan śhaycachinqui. Mana śhaycachilꞌa cuncantatacmi iwïlunqui. Chaynütacmi walaśh chuliquicunapäpis śhaycachinqui.

14“Ñatac wala śhalun chuliquim tapupäcuśhunqui: ‘¿Imapämi cayta lulanchic?’ nil. Niptinmi nipäcunqui: ‘Tayta Diosmi jatun munayninwan Egiptoćhu sirbipacuśhanchicpi julaycamälanchic. 15Chay Faraonca śhunꞌunta lumiyacalcachilmi caćhaycuyta mana munapämälachu. Chaymi Tayta Dios Egiptoćhu lluy nunacunäpïta allacuycul aśhta uywacunap wamä näsïnincunacta wañüchila. Chay-laycumari lluy uywap wamäninta wañuycachipunchic; chulicunactañatacmi jucwan śhaycaycachinchic’ nil. 16Chaymi Egiptopi Tayta Dios jatun munayninwan julaycamäśhanchicta mana unꞌanayquipä maquiquićhu juc siñalnu caycunꞌa; ñawillayquićhüñatacmi yalpanayquipä caycunꞌa” nil.

Tayta Diosmi pucutaywan nina waläwan puśhaycun

17Ñatac Faraonca Israel caśhtacunäta liculcänanpä caćhaycüluptinmi, Tayta Dios nin: “Yanꞌalmi Filisteo läducuna gïrranacuśhanta manchälul Egiptoman caśhan cuticulcanman” nil. Chaymi Filisteo läducuna caśhanpa sircalla cayaptinpis juc lädunpa puśhala. 18Jinalmi Puca Lamarpa chunyäninpa muyuchimula. Israel caśhtacunäñatacmi trüpa-trüpa yalupäcula.

19Ñatac Josepa tulluncunactapis Moises apalatacmi. Josemi manaläpis wañucul Israel caśhtacunäta: “Tayta Dios watucamuśhuśhayqui muyunmi tullücunacta caypïta apapäcunqui” nil limalicachila.#Gen 50.25; Jos 24.32.

20Chay Sucot lädupïta pasapäculmi chunyä ulꞌuman yaycunan Etamćhu jamapäcula. 21Ñatac quiquin Tayta Diosmi tutay walächi lipäcunanpä puśhala. Chaymi muyunpa paycunap puntanta suytunpäśha pucutaycäćhu ñawpala. Tutapañatacmi suytunpäśha nina waläyäwan achquinanpä puśhala. 22Manam imaypis muyunpa chay pucutayca chincalachu; nïtac nina waläcäpis tutanpa chincalachu.#Exo 40.34-38; Num 9.15-23.

Currently Selected:

Exodo 13: QVW

Highlight

Copy