Sofonii 1
1
1 #
KIIN2 22.1—23.30; KZS2 34.1—35.27. Dɛnaa Lawa bɛ́ boo kɛ diɛ Sofonii ni, bɛ̀ Amɔn a nɛgiĩ Zoziasi n Zudaa gána a kii lɛa. Sofonii n Kuusi a nɛgiĩ lɛa, Kuusi n Gedalia a nɛgiĩ lɛa, Gedalia n Amariya a nɛgiĩ lɛa, Amariya dɔn Ezekiasi a nɛgiĩ lɛa.
Dɛnaa Lawa n kiri kuri tán la
2Dɛnaa Lawa a da ǹ boo á ke:
Man die màn tumaa papaɛ̃
ma bɔ tán la.
3Man die minbuiin nɛn
laanka tɔɔn bɔ̀n biɛ.
Man die lon a bàanan
laanka mu li ǹ zɔ̀nɔn bɔ̀n biɛ,
man die min baraan bɔ̀n biɛ,
kɔnlɛ ka màn mɛn tumaa bɛ́
minin boe ǹ kiɛ.
Man n die minbuiin nɛn papaɛ̃
ma ǹ bɔ tán la.
Dɛnaa Lawa a da ǹ boo ne.
Dɛnaa Lawa n kiri kuri Zudaa laanka Zeruzalɛmu la
4Dɛnaa Lawa a da ǹ boo á ke:
Ma á re n gɔn siɛ Zudaa
laanka Zeruzalɛmu kiwi minin
kɛn li.
Ma á re ǹ dì *Baali
gialakun kɛ tumaa bɔ̀n biɛ,
ma á re a wúlu-bɔlen dinin tɔ papaɛ̃.
5Min mɛnɛn dɔn bɛ́, dii kalan
ǹ tá lon mànan#1.5 Maǹ nə́ goã wasa laanka leere ka mui guguru koe lɛlɛ. guguru koe
ma á re bɛn bɔ̀n biɛ.
Min mɛnɛn bɛ́ masɛ guguru koe
ǹ wusoo doo ǹ nə n liɛ ka
ǹ dì Molɛki#1.5 Molɛki n Amɔn tɔrɔn dì gole lɛa. ni
ma á re bɛn dɔn bɔ̀n biɛ.
6Min mɛnɛn bɛ́ n dɔ̀ɔ̃ we
masɛ Dɛnaa Lawa nɛ,
ǹ laadoo ná a ba ma-a wa
ǹ ba maa doreen li wa,
ma á re bɛn dɔn bɔ̀n biɛ.
7Ka n lɛ tã Dɛnaa Lawa yɔrɔ-a!
A giala, a lɛawaa lɛ diri.
Dɛnaa Lawa n die wúlu boe,
a tiin yɔrɔ bɔ maa nɛ.
8Dɛnaa Lawa pɛ:
Wúlu bɔ pinaa lɛ nɛ
ma á re dɔlɔ boe
nyɛɛnaandɛnaan ganaa,
kii nɛn nɛ,
ka min mɛnɛn bɛ́ gána
kɔsɔ mɔnaan we.
9Bɛa pinaa lɛ nɛ,
min mɛnɛn bɛ́ kion kiɛnlɛ
lɛ lanparɛ#1.9 Dìn kɔnɔn guguru kɔ ǹ gɔn nɛ.
ma á re yui bɛn gialaa.
Min mɛnɛn dɔn bɛ́ ǹ dɛnaa
a kion piɛ̃
ka kakaarɛbaa laanka wurumubaa ǹ mànan nɛ
ma á re dɔlɔ boe ǹ ganaa.
10Dɛnaa Lawa a da ǹ boo á ke:
Bɛa pinaa kɛ lɛ nɛ,
Zeruzalɛmu kiwi,
lɛ dɛ gole tá re boe
zɔ̀nɔn kiɛnlɛ-a.
Bubui á re boe dala dii kɛ nɛ,
ka màn wuu gole ne tentenen mìi ni.
11Ka n lɛ dɛ,
kasɛn mɛnɛn bɛ́ kiwi lɛa tán-a
a lɛ̀gɔn la,
a giala, pii-kɔle tumaa
n die giɛ̃.
Min mɛnɛn bɛ́ ǹ wɔrɔ zoɛ̃
bɛn man die giɛ̃.
12Bɛa biikoo li,
man die bolon diɛ
ma Zeruzalɛmu kiwi guusi.
Min mɛnɛn bɛ́ n dinin narɛ,
ma á re dɔlɔ boe bɛn ganaa.
Maǹ taasɛ ǹ gɔ́ɔ̃ nɛ:
«Dɛnaa Lawa a boe màn kɔn la
a zɛnaa wa,
sii bǐɛ̃ lɛa hinlaa sii baraa lɛa.»
13Sɛnɛ,
ǹ gɔn mànan tá re màn kokoo biɛ
ǹ kionən tá re yui.
Maǹ kionən doe,
sɛnɛ ǹ ba re giɛ̃ ǹ nɛ wa.
Maǹ *rezɛ̃ dan zumi,
sɛnɛ ǹ ba re a duvɛ̃ mii wa.
Dɛnaa Lawa a lɛawaa lɛ diri
14Dɛnaa a lɛawaa gole lɛ diri.
Á diri ka foɛɛ̃.
Bɛa pinaa kɛ lɛ nɛ,
lɛ dɛ gole á re boe,
footaãnaa din tá re gú diɛ.
15Foo-yoo lɛawaa nɛ,
bɔ̀n ka nyɛ́ɛ lɛawaa nɛ,
ziziɛ̃ nɛ, ka gɛ̀ nɛ,
tèlò ka wɔlɔ tì lɛawaa nɛ.
16Bɛn wuu lɛawaa nɛ ka zia lɛ-dɛ nɛ,
kiwi dadaraan kɛn ganaa,
tamaa nɛ,
kungɔn sɔsɔrɔn nə́ ǹ lɛnpɛnɛ.
17Dɛnaa Lawa pɛ:
Minbuiinin man nə́ sii baraa
zɛnaa masɛ nɛ.
Bɛ lɛ nɛ,
man die koe boe ǹ ganaa.
Maǹ die tɔ we ǹ nə́ tatalɛ ka
yii tere-an bɛ́ lɔn.
Maǹ die ǹ mà kiɛ tán bǎã tumaa
nɛ ka tii bɛ́ lɔn.
Ǹ gere á re boɛ̃ tán ka yisi bɛ́ lɔn.
18Dɛnaa Lawa a foo-yoo lɛawaa kɛa pinaa,
ǹ wɔrɔ hinlaa ǹ sana á re ǹ boe a-n wa.
A giala, Dɛnaa Lawa a foo-yoo baraa a tɛ
n die tán din tumaa kukuĩ.
Taãn nɛ,
minbuiin nɛ tumaa n die bɔ̀n
biɛ lenlen.
Currently Selected:
Sofonii 1: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
