Zakarii 5
5
Sii-nyaa sɔrɔbaa ǹ wɔ: Lɛn baraa bíi ǹ sɛ́wɔ
1Má n yii saa lon doo, má sɛ́wɔ munii goon yɛ piɛ̃ li. 2Lon a dia dí-a wole lɛ nɔ̀n da ma la: «N yii n wàa ganaa?» Má a lɛ si kɛnɛn: «Ma yii n sɛ́wɔ munii ganaa piɛ̃ li. A sasabaa n mɛtərə fù a kununbaa n mɛtərə sooro.» 3Lon a dia dí-a wole lɛ tɔn pɛ ma-n kɛnɛn: – Lɛn baraa mɛn bɛ́ re n bíi gána tumaa li, bɛ lɛ n ka kɛ nɛ. Sɛ́wɔ munii lɛ a yɔrɔ goon la, a n kiɛ̃ nɛ mà wurumu tumaa n die n lui ǹ nə n bɔ gána lɛ nɛ. A yɔrɔ goon kɛ dɔ la, a n kiɛ̃ nɛ mà min mɛnɛn bɛ́ n liɛ soɛ la, mà ǹ tá re bɛn dɔn lui ǹ nə ǹ bɔ gána lɛ nɛ. 4Dɛnaa Lawa Pàãyiidɛnaa a da ǹ boo á ke: «Man má bɛa lɛn baraa kɛ bíi máa a wɔ wurumunun kion ka min mɛn tumaa bɛ́ n liɛ soɛ la ka masɛ tɔ nɛ. A n die goɛ̃ a tan, a màn tumaa ziziɛ̃, haalɛ kion a mɛnɛn dinin ka a kɔlɔn nɛ.»
Sii-yɛ sɔbaabaa ǹ wɔ: Baraabaa
5Lon a dia dí-a wole mɛn lɛ bɛ́ boo diɛ ma nɛ, á n zɔ̃ á dɔ á pɛ ma nɛ: «Bǐɛ̃ kɔ, n nə n yii saa lon, n ga màn kɛ ganaa bii-a.» 6Má nɔ̀n da la kɛnɛn: «Wàa n ka kɛ nɛ?» Á ma lɛ si: «Kakaa gole ne, a n die.» Á wusoo á pɛ ma-n kɛnɛn doo: «Gána lɛ a sii baraan tumaa na a nɛ.» 7Bɛa waáraa kəni, lɛ pii ke fɔlɔ bù lɛa koe ne màn lɛ lɛ, bɛ nə n lɛ bũ. Ma yii n lɔ ganaa giã-n tán kakaa lɛ gɔ́ɔ̃ nɛ. 8Lon a dia dí-a wole lɛ pɛ ma nɛ: «Lɔ kɛ lɛ n yii tá a ganaa, baraabaa nɛ.» Bɛ kio, á nɔɔ á da kakaa lɛ gɔ́ɔ̃ nɛ, á pìi kɔ lɛ. 9Ma tɔ nə n yii saa lon, bɛ̀ lɔ màn paa á ke die. Ǹ nyàan manə ǹ tan ka gɔgɔrɔ wɔn bɛ́ lɔn, piɛ̃ nə́ ǹ noɛ̃. Ǹ nə́ kakaa lɛ saa, ǹ nə́ woo-n lon laanka tán bii n ni. 10Lon a dia dí-a wole mɛn lɛ bɛ́ boo diɛ ma nɛ, má nɔ̀n da bɛ la kɛnɛn: «Maǹ woe ka kakaa lɛ-n maa?» 11Á ma lɛ si: «Maǹ woe ne *Baabilonii. Walan, maǹ die kion doe a wɔ lɛa, ǹ doa tán walan yǎa duduu.»
Currently Selected:
Zakarii 5: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
