Zakarii 6
6
Sii-yɛ kiwisibaa ǹ wɔ: Ziabaa ǹ wotoro sii
1Má n yii saa lon doo, ma yii n ziabaa ǹ wotoro sii ganaa. Maǹ kiɛ̃ kele màn paa bii n ni. Bɛa kelen lɛn man zan lɛa. 2#SNS 6.4-5. Sùi tãtãn man wotoro bibinaa kɛ ganaa, sùi tìtìn man a paabaa ǹ wɔ kɛ ganaa, 3#SNS 6.2. sùi fufun man a sɔɔbaa ǹ wɔ ganaa, sùi tã bababan man a siibaa ǹ wɔ kɛ ganaa. 4Lon a dia dí-a wole mɛn lɛ bɛ́ boo diɛ ma nɛ, ma nɔ̀n da bɛ la kɛnɛn: «Maǹ wàa giala pii, maa Dɛnaa?» 5#SNS 7.1. Á ma lɛ si kɛnɛn: «Lon a piɛ̃ sii kɛ nɛ. Maǹ nə́ goã kunu tán tumaa a Dɛnaa li, kanna, maǹ woe.» 6Sùi tìtìn bɛ́ ziabaa ǹ wotoro mɛn baɛ̃, bɛ n woe gɔsɛ a lɛ̀gɔn la gána kɛ nɛ, sùi fufun nə́ ǹ kio. Sùi tã bababan man woe gusin a lɛ̀gɔn la gána kɛ nɛ. 7Sùi tãtãn kɛn man die, zoɛ̃ li ǹ nə kɔ tán tumaa lɛ ǹ ga a ganaa. Dɛnaa Lawa pɛ ǹ nɛ: «Ka wo kɔ tán lɛ ka ga a ganaa.» Maǹ nə́ zɛnaa miɛ̃ dɔn. 8Dɛnaa Lawa tɔn ma bii kəni á pɛ ma-n kɛnɛn: «Ga! Ǹ mɛnɛn bɛ́ woe gɔsɛ a lɛ̀gɔn la, maǹ woe ma yiri gisin walan.»
Dɛnaa Lawa a lɛ-kɔ Yesuwa a paǹ li
9Dɛnaa Lawa na á boo kɛ da ma nɛ á pɛ: 10«Wo bɛ̀rɛbaa ǹ bǎã wolen nə bǐɛ̃baa ǹ mànan mɛnɛn kɔ Ɛldayii laanka Tobia ka Yedayaa la, lɛ kɔ bɛn ganaa. Maǹ boe *Baabilonii ǹ nə́ daa. Pelo dinin, n tá re woe Sefania a nɛgiĩ Zozia li, ǹ dɔn nə goã ǹ nə́ woo maa lɛn. 11Sana laanka wɔrɔ bɔ, n kii bafolo zɛnaa nɛ, n wɔ Zozadaaki a nɛgiĩ Lawa a wúlu-bɔle gole Yesuwa mìi ganaa. 12#ZER 23.5; 33.15; ZAK 3.8. N pɛ-n kɛnɛn mà Dɛnaa Lawa Pàãyiidɛnaa n kɛ pii: Giĩ goon tan kanaa a tɔ n "Da ten".
Á re gole koe.
A din nə die wusii a maa kion lɛ dɔ.
13Sonbore,
a din nə die Dɛnaa Lawa a kion lɛ doe.
Á re kii dɔnkɛn we,
a giã kii dankan la,
a nyɛɛnaan bɔ.
Lawa a wúlu-bɔle goon tá re giɛ̃ a genli,
kii dankan la,
ǹ tá re kɔn miɛ̃ parsiini.
14«Kii bafolo lɛ n die goɛ̃ Dɛnaa Lawa a kion lɛ nɛ a minin yiri gisĩ Ɛldayii ni, Tobia ni ka Yedayaa nɛ ka Sefania a nɛgiĩ a bǐɛ̃ kɛ nɛ.» 15Min mɛnɛn wɔlɔ bɛ́ sɔsɔɔ, bɛn tá re die n doe Dɛnaa Lawa a kion lɛ a dɔlen lɛ. Ka bɛ-n kəni, ka á re doɛ̃ mà Dɛnaa Lawa Pàãyiidɛnaa na á masɛ Zakarii dia ka li Lawa a boo gii-dali lɛa. Bɛ n die yɔrɔ yii bɛ̀ kaa Dɛnaa Lawa ka Lawa bɔlɔ sii sonbore.
Currently Selected:
Zakarii 6: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
