Misee 6
6
Lawa n kiri we a zaman ganaa
1Dɛnaa Lawa bɛ́ màn mɛn pii,
ka bǐɛ̃ kɔ ka n too kɔ bɛ li:
«Yoo n nə n bɔ tán,
n boo da maa lɛa.
Golee kelen kɛn yɔrɔ-a,
n boo da,
boo da tentenen kɛn nə n lɛ ma.
2Kelen lɛn, ka n too kɔ
Dɛnaa Lawa a foo busu ǹ boo li,
kasɛn dɔn,
tán giala wɔ ǹ bǎã kakan kɛn,
ka n too kɔ.
A giala, Dɛnaa Lawa na
a foo busu ǹ boo diɛ a zaman nɛ,
a laanka Izirayeli minin lɛn man kɔn.
3Maa minin,
man má wàa la ka la?
Fuu mɛn tɔrɔ n má da ka mìi ni?
Ka bɛ pɛ masɛ nɛ.
4 #
BBN 4.10-16; 12.50-51; 15.20. Maa ka waa a bɔ Ezipti gána-n lɛ sɛ a lɛa nɛ?
Maa ka si bɛ̀rɛbaa la lɛ a lɛa nɛ?
Hinlaa Muizu dia ka la kɛa lɛa nɛ,
ka Aarɔn laanka Miriyamu ni?
5 #
MNS 22.2—24.25; ZOZ 3.1—4.19. Moabun kii Balaaki bɛ́ á goã
mà a n die sii mɛn zɛnɛɛ ka nɛ,
Pewɔɔrɔ a nɛgiĩ Balaamu
na a lɛ si ka boo mɛn nɛ,
kaa toa Sitimu a da Gilgaali ke,
maa minin,
ka toa ka n taasɛ ka bɛn nɛ.
Ka á re doɛ̃ kəni,
mà Dɛnaa Lawa sii sonboren zɛnaa ka nɛ.»
6Wɔ n die woe golee Dɛnaa Lawa yɔrɔ-a
ka wàa nɛ?
Wɔ n die woe lon a Lawa guguru koe
ka wàa nɛ?
Wɔ n die woe ka lɛ̀ goon diin nɛn nɛ,
wɔ bɛn baa *wúlu màn tiɛ̃ lɛa kəni?
7Dɛnaa Lawa n giɛ sère gɔ̀lɔ̀
duu damata li wúlu màn lɛa?
Hinlaa a n giɛ nyɔɔ gigiã li?
Ma doamaa-n ma maa nɛgiĩ bibinaa kɔ,
maa bɔlɔ-tii kɛa lɛa?
Ma doamaa-n ma maa yɛ ǹ nɛ kɔ,
maa sii baraan kɛn lɛa?
8E minbuiinin!
Sii mɛn bɛ́ siĩni,
a bɛ́ á bɛ pɛ ka nɛ.
Dɛnaa Lawa bɛ́ giɛ li mà ka sii mɛn zɛnaa,
a bɛ́ á bɛ pɛ ka nɛ:
a n mà ka lɛ kɔ sii pepere zɛnaa ganaa,
ka toa sii bǐɛ̃ zɛnaa kɔɔ̃n kɔ ka ganaa,
ka Lawa a zii tɔ wɔ ka din-gisiĩ ni.
Dɔlɔ mɛn bɛ́ re n boe Zeruzalɛmu ganaa
9Dɛnaa Lawa lɛ á boe kiwi lɛ gialaa.
Min mɛnɛn bɛ́ nyɛ́ɛ biɛ nɛ,
á die bɛn kirisibiɛ.
Dɔlɔ mɛn nə n da ka mìi ni,
ka n yii da bɛ la.
Min mɛn dɔ da ka mìi ni,
ka n too kɔ bɛ lon.
10Kaa baraabaa ke ka á zɛnɛɛ,
kaa wurumubaa ǹ mànan kɛn kaa kion,
kaa *belee zɔɔ̃ ǹ màn ke ká màn bɔ lɛ,
sii bɔbɔnɛɛ n ká zɛnaa.
Ma á boe la ma bɛ si ma ganaa sonbore?
11Màn mɛn bɛ́ a màn zɔɔ̃ ǹ màn taãn lɛa wa,
ka bɛ saa ka màn zɔɔ̃ nɛ!
Màn zɔɔ̃ ǹ mànan kɔsɔn man
ka á ǹ kiɛ ka lon.
Ma á boe la ma bɛ lɛ si ma-a sonbore?
12A giala,
kiwi lɛ a pàãman kakaarɛbaa la yii ni,
a minin kɛn man soɛn boboe,
màn kɔn ba ǹ lɛ-n wa,
yǎa kɔn bebelee.
13Bɛ lɛ n ke, man die ka dii,
yǎa ma busu diɛ ka ganaa.
Man die basaã koe ka nɛ,
kaa sii baraan lɛn taman yii.
14Kasɛn kɛn, ka á re màn bii,
ka n ka a kiɛ̃ wa.
Ka nàn tá re pipi bòo gɔn.
Ka bɛ́ re màn mɛn koɛ ka gɔn li,
bɛa re goɛ̃ wa.
Ka bɛ́ re màn mɛn tamaɛ,
ma á re toɛ zia bɛ bii.
15Kasɛn kɛn,
ka á re màn diɛ kaa wuru-n,
sɛnɛ, ka n ka a re kuri wa.
Kasɛn kɛn, ka á re *olivie nyɔɔ boe,
sɛnɛ, ka n ka a re loe ka ganaa wa.
Ka á re rezɛ̃ mu boe,
sɛnɛ, ka n ka a re a duvɛ̃ mii wa.
16 #
KIIN1 16.23-34; 21.25-26. Ɔmuri a landa sii kɔrɔn kɛn,
a nɛ Akaabu a kion minin
zɛnaa ǹ sii gɛsɛn kɛn tumaa,
ka gɔn nə paraa-n bɛn lɛn ganaa.
Bɛ lɛ a lɛa nɛ,
ma á die kaa gána lɛ yui.
Kaa kiwi minin kɛn,
ǹ tá re bɛn diɛ yaa lɛa.
Sìi sii mɛn bɛ́ re maa zaman lɛ yii,
a guĩ á re doe ka ganaa.
Currently Selected:
Misee 6: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
