Misee 7
7
Misee a foo busu ǹ boo
1E, masɛ wɔ n ka bɔ̀n nɛ!
A giala,
man kɔnboe ka da nɛ-nali ni.
Man woe giɛ rezɛ̃ da nɛ
laanka gɔ́rɔ da nɛ lɛ binaa li.
Kɔɔ̃n ma-a taãn-taãnɛ,
sɛnɛ, ma màn kɔn yɛ wa.
2Min sonboren nə́ nya ǹ nə́ n bɔ gána lɛ nɛ,
min pepere din ba minbuiinin bii doo wa,
ǹ ba taasiɛ kɔsɔ we wa,
yǎa gɛ̀-dɛ.
Didie n kuu koe ǹ miã-a,
mà asɛ gɔn dɔ-a.
3Ǹ gɔn bɛ́ yui sii mɛn a zɛnaa li,
baraa nɛ.
Goledɛnaa a bǐɛ̃ zɛnɛɛ kooro wa,
yǎa màn.
Sii yɔrɔ-bɔle a sii yɔrɔ boe kooro wa,
yǎa là.
Min gole a boo diɛ kooro wa,
yǎa a din dùũ sii.
Maǹ nə́ n lɛ kiɛ kun
ǹ sii baraa zɛnaa.
4Min mɛn din bɛ́ soɛ ǹ bii,
bɛ n ka koronkoron bɛ́ lɔn,
ǹ min sonbore á baraa á la zama nyan nɛ.
N wɔlɔ-lɛduə̃lin nə lɛawaa mɛn boo da,
ǹ dɔlɔ bɔ ǹ lɛawaa mɛn boo da,
bɛ á ke á dɔ.
Sisia, ǹ gɔ́ɔ̃ woɛ̃maa nɛ.
5Ka nyan nə n foo doa
kaa tá-kun wolen ganaa doo wa,
ka nyan nə n kaa kaa giaáran nɛ doo wa.
Haalɛ n din gòã li ǹ lɔ ke,
bɛ̀ n tá a yɔrɔ-a,
toa n yiri yɛ n da ǹ boo li.
6 #
MAT 10.35-36; LUK 12.53. A giala,
nɛgiĩ n die dii puusə koe,
nɛlɔ n die yui ǹ dan gialaa,
manaa n die yui ǹ zuũ dan gialaa,
didie a zɔ́ɔn man die goɛ̃
ka a din a kion minin ni.
7Sɛnɛ, masɛ,
ma nə n yii diɛ Dɛnaa Lawa la.
Man Lawa din duĩ, maa kirisibaali,
maa Lawa á die maa lɛ-dia miɛ.
Foo-doa laanka Lawa nyankɔ
8Wɔa zɔ́ɔn lɛn,
ka nyan yaa wɔ wɔ ganaa wa koe!
A giala, ta wɔ́ mɛnaa,
wɔ á re wusii wɔ yoo.
Ta wɔ n giã-n wɔlɔ tì li,
Dɛnaa Lawa din nə wɔa tɛ fúlu lɛa.
9Wɔ bɛ́ n wɔ́ sii la Dɛnaa Lawa la,
bɛ lɛ n ke, a foo yoo wɔ li.
Wɔ doamaa-n wɔ bɛ lɛ a dɔlɔ si wɔ ganaa.
Sɛnɛ, a pinaa á die,
á die n mìi koɛ wɔa sii li,
á die sonbore koe wɔ la.
Á die wɔ wɛɛ a wɔ kaa wɔlɔ fúlu li,
wɔ á die giɛ a peperebaa ǹ dí kɛ ganaa.
10Wɔa zɔ́ɔn lɛn dɔn dinin tá re yii,
sìi á die ǹ kuĩ.
A giala,
ǹ dinin lɛn man nə́ goã pii wɔ-n kɛnɛn:
«Dɛnaa Lawa, kaa Lawa lɛ á maa?»
Bɛ̀ ǹ tá tɔtɔrɛ kɛn la tán
ǹ gòãn giulun ǹ mɛn waáraa,
ka zii gialaa ǹ bɛrɛɛ bɛ́ lɔn,
wɔ bɛ́ re giɛ ǹ ganaa mɛnɛn!
11Kaa kiwi lɛ a kungɔnɔn lɛn bɛ́ re wusii
ǹ nə n dɔ ǹ mɛn waáraa,
bɛa pinaa kɛ lɛ nɛ,
kaa gána lɛ giala á die n boe li.
12Bɛa pinaa kɛ lɛ nɛ,
kaa minin tá re wusii ǹ da ka li.
A saa Asiirii ganaa a wo Ezipti yaa,
ǹ tɛn tá re boe walan.
A saa Ezipti ganaa a wo Efrati tà kɛ yaa,
ǹ gialakunun tá re boe walan.
Ǹ tɛn tá re boe kɔ̀ mun lɛ-a
ǹ tɛn dɔ á re boe kele yiin ni.
13Sɛnɛ, kanaa lɛ gɔ́ɔ̃ kooro á die goɛ̃,
kanaa minin lɛn dinin zɛnaa ǹ sii taman yii,
ǹ nya ǹ dín lɛn saraa nɛ.
14Dɛnaa Lawa,
mɛ n zaman nyɛɛnɛ,
n nə ǹ lɛduə̃ ka n din a bàlà kɛ nɛ.
Bɛa zaman kɛ lɛ,
n din wɔn manɛ.
Ǹ bɛ́ ke ǹ gɔrɔn daã nɛ,
ǹ nə́ giã-n da yii ni,
wusoo n mɛ ǹ nyɛɛn doo
ka lɛlɛ ǹ bɛ́ lɔn,
n wo ǹ ne Basan a nyankɔrɔ basa kɛ nɛ,
n wo ǹ ne Galaati gána nɛ.
15N bɛ́ soe wɔ nɛ Ezipti gána nɛ ǹ mɛn pinaa,
n kaãbaa ǹ siin mɛnɛn zɛnaa bɛa pinaa,
wusoo n bɛn lɛn miãn zɛnaa,
n nyaa wɔ nɛ.
16Tɔrɔ kɔsɔn lɛn dɔn dinin tá re yii,
sìi á die ǹ kuĩ,
ǹ laanka ǹ pàãdɛnaabaa kɛ lɛ din tumaa nɛ.
Ǹ tá re n kaãbiɛ,
boo din ná a re n diɛ ǹ la wa.
Ǹ tá re goɛ̃ ka too tere-an bɛ́ lɔn.
17Ǹ tá re tii piɛ̃ ka miɛ̃ wɔ bɛ́ lɔn,
màn nɔ̀ giɛɛraa tán wolen kɛn wɔbaa nɛ.
Nyɛ́ɛ á die ǹ kuĩ,
ǹ tá re nyɛ́ɛ biɛ n nɛ.
Dɛnaa Lawa, wɔa Lawa,
ǹ tá re soe ǹ duru ǹ bǎãn nɛ,
bɛ̀ ǹ da n li, ǹ gɔ̀nɔn nə́ bìn diɛ.
18N kɔnboe n ka wàa nɛ Lawa?
N din nə minbuiinin sii baraa siɛ boe ǹ mìi ni.
N din nə ǹ bɔlɔ-tii siin kɛn toɛ ǹ nɛ.
N minin lɛn mɛnɛn yii goã koo,
n din wɔn lɛn,
n foo a die goɛ̃ yoo-n bɛn li miɛ̃ yǎa duduu wa.
A giala, min makara doɛ̃ lɛ n kɔɔ̃nɛ n ganaa.
19Á die wusii a makara bɔ wɔ-a doo.
Á die wɔa sii baraan toɛ wɔ nɛ,
á ǹ tuturu a ǹ bɔ wɔ-a lenlen.
20N tá re n sonborebaa nyɛɛ Zakɔba tɔrɔn kɛn manɛ,
n tá re n giaárabaa nyɛɛ Abrahamu tɔrɔn kɛn manɛ.
N lɛ kɔ wɔ digolon la ka sii mɛn nɛ haalɛ bibi,
a din lɛ n ka bɛ nɛ.
Currently Selected:
Misee 7: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
