Misee 5
5
Kii mɛn bɛ́ re Izirayeli kirisibiɛ
1Dɛnaa Lawa pɛ:
Kasɛn Bɛtlehɛmu Efrataa minin lɛn,
Zudaa tɔrɔn kiwi damata kɛ bii,
ka dinin kiwi lɛ n kiɛɛrɛ sɛn.
Sɛnɛ, min nə die boe bɛ lɛ nɛ maa wɔ lɛa,
a giã Izirayeli minin kɛn mìi la.
A boo tá bii-a, á belebɔ,
haalɛ bibi sii ni.
2 #
MAT 2.6; ZAÃ 7.42. Bɛ lɛ na á toa,
Lawa á re n gɔn boe a zaman ganaa,
yǎa nɔnaa kɛ nɛ yii.
Bɛa biikoo li, ǹ dɔɔ̃nɔn lɛn
mɛnɛn bɛ́ re n sɔlɛɛ a nɛ,
bɛn tá re die kiɛ kun
ka Izirayeli minin gialakunun kɛn nɛ.
3A din lɛ n die n doɛ,
a na a minin lɛn nyɛɛnaan bɔ,
ka Dɛnaa Lawa pàã nɛ,
ka a Dɛnaa Lawa kɛa kiibaa nɛ.
A minin lɛn tá re goɛ̃ là nyantoro la.
A giala, a kũ sisia ganaa,
a tɔ á re gole koe,
yǎa kanaa paǹ tumaa nɛ.
4A din lɛ n die die
ka là nyantoro ne.
Bɛ̀ Asiirii minin nə́ daa kɔ
wɔa gána kɛ lɛ ǹ mɛn pinaa,
bɛ̀ ǹ gòã mɛ wɔa pàãman
kɛn kion ǹ mɛn pinaa,
wɔ á die zia-baali damata kiɛ ǹ ganaa.
5Ǹ tá re Asiirii gána kɛ lɛduĩ
ka ziabaa ǹ gɔya nɛ,
Nimɔrɔdi a gána kɛ lɛ,
ǹ tá re a minin lui ka sɛmiɛ̃ nɛ,
bɛ̀ ǹ wo ǹ koa ǹ kiɛnlɛ-a.
Bɛ̀ Asiirii minin lɛn nə́ wɔ wɔa wɔ lɛ nɛ,
bɛ̀ ǹ nə́ wɔ wɔa gána nɛ,
a din lɛ á re wɔ sii ǹ la.
Izirayeli minin man tɔrɔ kɔsɔn bii
6 #
SGK 10.8-11. Zakɔba tɔrɔn mɛnɛn yii goã koo,
bɛn tá re giɛ̃ tɔrɔ gigiã kɔsɔn bii.
Ǹ tá re ǹ biɛ ka pele bɛ́ lɔn
boe Dɛnaa Lawa li,
ka la mu bɛ́ lɔn buu ganaa.
Bɛn ba giɛ minbuiin nɛ a màn kɔn li wa,
ǹ ba n foo doɛ minbuiinin ganaa
ka sii kɔn nɛ wa.
7Zakɔba tɔrɔn mɛnɛn yii goã koo,
ǹ tá re giɛ̃ gána kɔsɔn minin bii,
ǹ tá re giɛ̃ tɔrɔ gigiã kɔsɔn bii,
kaka ka yàra bɛ́ lɔn don mànan bii,
ka yàra ten bɛ́ lɔn sèren bii.
Bɛ̀ á bɔ bǎã mɛn nɛ,
a n màn kuĩ a wɔwoɛ̃ kɔn,
min dɔ a boe la á sii la wa.
8N gɔn saa n baa zɔ́ɔbaa wolen lɛn li miɛ̃,
toa n zɔ́ɔn lɛn tumaa papaã.
9Dɛnaa Lawa a da ǹ boo á ke:
«Bɛa pinaa kɛ lɛ nɛ,
ma á die kaa sùin kɛn wɛɛ
ma ǹ bɔ ka bii,
ma á die kaa wotoron kɛn papaɛ̃
ma ǹ bɔ ka bii.
10Ma á die kaa gána lɛ a kiwin yui,
kungɔnɔn mɛnɛn bɛ́ ǹ lɛnpɛnɛ,
ma á die bɛn tumaa wurii.
11Ma á die kɔnkoãbaa kɛ niɛ̃
ma bɔ ka gɔn lɛ-a,
wɔ-kũli á die goɛ̃ ka bii doo wa.
12Kaa dìn laanka kaa tíĩn kɛn,
ma á die bɛn wurii ma ǹ bɔ ka bii.
Ka dinin nə mànan mɛnɛn zɛnaa
ka ka gɔn nɛ,
ka a die kiɛ tán bɛn giulun doo wa.
13Kaa bìbìn kɛn,
ka á wúlu boe ǹ ganaa,
ma á re bɛn wɔwoɛ̃,
ma á die kaa kiwin kɛn yui.
14Tɔrɔn mɛnɛn bɛ́ ǹ maa boo si wa,
ma foo á die yui bɛn li parsiini,
ma á die dɔlɔ boe ǹ ganaa.»
Currently Selected:
Misee 5: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
