Proverb 4
4
Konsey enn paran
1Mo zanfan, ekout konsey to paran;
fer atansion, e to pou gagn disernman.
2Mo pe donn twa bon konsey;
pa les li glise ale kouma dilo lor bredsonz.
3Mwa osi mo ti enn ti-garson pou mo papa;
Mo mama ti gat mwa kouma enn zanfan inik.
4Mo papa ti ansegn mwa, e ti dir mwa: “Grav mo bann parol dan to leker;
rapel bien mo konsey e to pou viv bien.
5Rod touzour lasazes ek disernman;
pa vir ledo ar mo bann parol.
6Pa abandonn lasazes e li pou protez twa;
kontan li e li pou vey lor twa.
7Pou to vinn saz, devlop lasazes dan twa;
rod disernman, parski li pli inportan ki tou seki to posede.
8Kontan lasazes e to pou vinn inportan.
Ser li for, napa large, e to pou gagn loner.
9Lasazes pou kouma enn girland zoli fler lor to fron;
li pou kouma enn zoli kouronn lor to latet.”
Lasazes donn lavi ek proteksion
10Mo zanfan, ekout mwa;
pran kont mo parol, e to pou viv lontan.
11Mo finn ansegn twa sime lasazes;
mo finn gid twa lor larout ladrwatir.
12Ler to fer demars pou fer kitsoz, laport pou ouver pou twa;
ler to fer to proze, pa pou ena baryer lor to sime.#4:12 Konpar sa verse la avek Zob 18:7.
13Gard dan to memwar lansegnman ki to finn gagne; napa les li sape.
Vey li bien, kouma to vey to prop lavi.
14Pa imit bann move dimoun;
pa azir kouma bann malfeter.
15Mo piti! Pa frekant zot sime;
pran lot direksion, e kontign to larout.
16Bann move dimoun pa kapav dormi tanki zot pa fer lemal;
zot pa gagn somey tanki zot pa fer enn dimoun ditor.
17Zot viv ar mesanste kouma zot dipin;
zot pran laviolans kouma zot divin.
18-19Bann move dimoun mars dan sime marenwar;
zot kogne, e zot pa kone ar ki.
Me sime bann zis, li kouma lalimier gramatin;
so klarte kontign ogmante ziska soley anler.
Swazir sime lavi
20Zanfan, pran kont mo parol;
ekout bien mo bann konsey;
21gard to lizie fixe lor zot;
grav zot dan fon to leker.
22Tou seki met mo bann parol ek mo bann konsey an-pratik, zot pou viv enn bon lavi;
zot pa pou met malad dan zot lekor.
23Vey bien bann panse ki sorti dan to leker;
samem lasours lavi.
24Pa les mansonz sorti dan to labous;
pa les to lalang bate pou koz ninport.
25Fixe to lizie drwat divan twa;
pa les to regar fann de kote.
26Get bien kot to met to lipie;
lerla, to sir to pa pou kogne.
27Pa devie ni adrwat ni agos;
pa koste ar sime lemal.
Currently Selected:
Proverb 4: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
