Proverb 3
3
Respe pou Bondie
1Mo zanfan, pa bliye mo lansegnman,
dan fon to leker, to ava gard mo bann komannman.
2Koumsa, to pou viv lontan
e to pou ere dan to lavi.
3Pa les sinserite ek fidelite kit twa;
Atas zot otour to likou; grav zot dan to leker.
4Alor, Bondie ek bann dimoun pou kontan twa,
e zot pou estim twa.
5Zame pa krwar ki to enn gran koneser;
me fer LESEGNER konfians ar tou to leker.
6Rekonet li dan tou to proze,
e li pou ekler to sime.
7Zame pa krwar ki to tro saz;
me respekte LESEGNER ek evit lemal.
8Sa pou geri to blesir;
sa pou fortifie to lekor.
9Glorifie LESEGNER ar tou seki to posede;
ofer li premie rekolt to karo.
10Lerla, to grenie pou garni ar manze;
to damzann pou ranpli ar divin.
11Mo zanfan, pa mepriz disiplinn LESEGNER;
pa vir ledo ar so repros;
12parski LESEGNER koriz sa enn ki li kontan-la;
parey kouma enn paran koriz zanfan ki li prefere.
Valer lasazes
13Li ere sa dimoun ki dekouver lasazes la;
e ki ena lintelizans pou konpran.
14Seki lasazes donn li, pli presie ki larzan,
e so valer pli for ki lor.
15Lasazes pli presie ki bann bizou gran valer,
li pli inportan ki tou seki enn dimoun kapav dezire dan so leker.
16Enn kote, li ed nou pou viv lontan;
lot kote, li donn nou larises ek loner.
17Li enn gran plezir pou mars lor sime lasazes,
so bann santie donn lazwa ek lape.
18Lasazes kouma enn pie ki donn lavi bann ki trap li;
bann ki konn gard lasazes, pou apel zot bienere.
Lasazes Bondie dan kreasion
19 LESEGNER, dan so sazes, finn kre later;
avek so konesans, li finn kre lesiel.
20Par so kapasite, li finn fer dilo souterin sourse,
e li finn fer niaz devers lapli.
Bondie protez bann ki saz
21Mo zanfan, atas twa ar lasazes ek lintelizans;
Pa les zot kit twa enn pous.
22Zot pou donn twa enn zoli lavi;
zot pou kouma enn kolie gran valer otour to likou.
23Lerla, to sime pou kler ek sir,
e to lipie pa pou kogn ar ros.
24Ler to pe alonze, to pa pou gagn per;
e lor to lili, to pou dormi trankil.
25Pa bizin per kan tanpet bate;
pa trakase kan siklonn kraz lor bann move dimoun.
26 LESEGNER pou protez twa;
li pou anpes to lipie rant dan piez.
Konn viv bien ar to prosin
27Zame pa refiz ed bann dimoun ki merite;
fer dibien tank to kapav.
28Pa dir to vwazin: “pase plitar,”
kan to bien kapav ed li asterlamem.
29Pa tir plan pou fer ditor to vwazin,
ki viv pre kot twa e ki fer twa konfians.
30Pa tir lay ar enn dimoun
ki zame finn fer twa ditor.
31Pa zalou enn dimoun violan,
e pa swiv so manier.
32 LESEGNER deteste pese bann dimoun move,
me li estim bann ki onet.
33 LESEGNER modi fami bann move dimoun;
me li beni fami bann ki viv dan drwatir.
34Li mepriz bann vantar ek bann arogan;
me li donn so faver bann ki mars dan limilite.
35Bann saz gagn loner ek bon repitasion;
Bann vantar fini dan laont.
Currently Selected:
Proverb 3: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
