Proverb 28
28
1Bann move dimounn sove mem kan pena danze;
me bann bon dimounn res brav kouma enn lion.
2Kan enn pei revolte, boukou sef rod pran pouvwar;
me avek enn dirizan intelizan ek saz, lape dire.
3Kan enn diktater leve ek fer dominer ar bann pov,
li kouma gro lapli ki detrir tou rekolt.
4Bann ki rezet lalwa, donn rezon bann malfeter;
bann ki respekte lalwa, konbat bann malfeter.
5Move dimounn pa konpran nanye lor lazistis;
me bann ki respekte LESEGNER konpran tou.
6Preferab pov, me onet
ki ris, me malonet.
7Bann zenes ki ena disernman, zot obzerv lalwa;
me seki ena move frekantasion fer so paran onte.
8Bann kaser ki vinn ris lor ledo lezot, pa pou kapav profit zot larzan;
enn zour, dimounn ki ed bann pov ki pou erit zot rises.
9Si kikenn pa ouver so zorey pou ekout lalwa,
Bondie osi pa pou ekout so lapriyer.
10Tou seki antrenn bon dimounn dan sime lemal,
pou tom dan zot prop piez.
Me bann dimounn onet pou konn enn lavenir ere.
11Dimounn ris fer sanblan zot saz;
me enn pov ki ena disernman, kapav demaske zot.
12Kan bon dimounn gagn laviktwar, lepep selebre;
kan move dimounn pran pouvwar, lepep prefer kasiet.
13Seki kasiet so pese, zame pou progrese;
me seki rekonet so fot e desid pou sanze, so pese pou pardone.
14Bienere dimounn ki gagn per pou fer lemal;
me bann leker dir ki pa oule sanze, pou rwine.
15Enn move dirizan ki fer dominer ar lepep malere,
li kouma enn zanimo feros anraze.
16Enn lider bet fer dominer pou li vinn ris lor ledo bann pov;
me dirizan ki deteste larzan mal-gagne, pou viv lontan.
17Enn dimounn ki ena disan lor so lame,
li bizin pey pou so krim ziska li mor.
18Dimounn onet pena pou per nanye;
me bann malonet pou tom dan trou.
19Seki travay so later, pa pou mank manze;
me seki perdi letan kas poz, pou touzour malere.
20Dimounn onet pou gagn boukou benediksion;
me bann ki rod vinn ris tro vit, pou gagn zot pinision.
21Get ar de lizie#28:21 Get ar de lizie: Fer preferans ant dimounn., li enn move zafer;
malerezman, ena fer linzistis pou enn bout dipin.
22Enn dimounn peng galoup deryer larzan;
me li pa kone ki maler deryer laport.
23Avek letan, nou pou prefer enn dimounn ki kritike;
ki enn dimounn ki pas diber.
24Zanfan ki kokin so paran e ki dir: “pa enn pese sa,”
li pa pli bon ki enn bandi.
25Enn dimounn ki nek rod plin so pos, li kree zizani;
me seki met so konfians danLESEGNER pou gagn benediksion.
26Dimounn bet krwar li enn terib;
me dimounn saz konn sorti dan danze.
27Seki ed bann pov zame mank nanye;
me seki ferm lizie divan lamizer lezot, pou gagn malediksion.
28Kan diktater pran pouvwar, dimounn al kasiet;
me kan li mor, boukou bon lider leve.
Currently Selected:
Proverb 28: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
