Proverb 29
29
1Seki touletan rezinbe kan gagn repros,
maler pou tom lor li antret. Okenn remed pa pou sap so lavi.
2Kan bann dimounn drwat opouvwar, lepep ena lazwa dan leker;
me kan enn diktater gouverne, lepep pas mizer.
3Zenes ki rod lasazes, fer so paran kontan;
me zenes ki frekant prostitie, gaspiy tou so larzan.
4Lerwa ki gouvern ar lazistis, fer so pei prospere;
me dirizan ki tom dan koripsion, fer so pei rekile.
5Dimounn ki nek met so vwazin dan siro,
pe rod met vwazin-la dan leto.
6Si to viv dan lemal, to pou may dan to prop piez;
me si to viv onet, to pena traka e to kapav selebre dan lazwa.
7Bann bon dimounn rekonet drwa bann pov;
bann move dimounn tro bet pou konpran sa.
8Bann konploter, fasil zot soulev enn emet dan pei;
me bann saz fer tou pou kalme lakoler lepep.
9Twa ki saz, pa gagn zafer avek enn bet;
li pou kriye, zoure ek rikane, e to pa pou trouv okenn solision.
10Bann asasin deteste dimounn onet;
me bann zis protez zot.
11Enn dimounn bet sap lor kal brit;
enn dimounn saz konn kontrol so lemosion.
12Si enn dirizan ekout palab,
tou so lantouraz pou vinn malonet.
13Pov ek opreser ena enn kiksoz an-komin:
LESEGNER finn fer toule-de trouv soley.
14Enn dirizan ki pa kraz bann pov,
li pou regn lontan.
15Disiplinn ek koreksion bien inportan pou edik zanfan;
enn zanfan malelve fer so mama onte.
16Kan move dimounn pran pouvwar, krim ogmante;
me enn zour zot pou tonbe, e bann bon dimounn pou trouve.
17Disiplinn to zanfan bien, to pou konn lape;
zot pou met lazwa dan to leker.
18Kan dirizan pena vizion, lepep pena kontrol;
me bienere dimounn ki respekte lalwa Bondie.
19Zis parol pa ase pou koriz enn ti-lespri;
li kapav tande, me li pa pou sanze.
20Milfwa to gagn zafer ek enn inioran,
ki to gagn zafer ek enn dimounn ki koze san reflesi.
21Si touletan to donn to travayer tou seki li dimande,
enn zour li pou fer gran-nwar ar twa.
22Dimounn ki sap lor kal vit, li amenn dezord;
e dimounn ki sofe vit, li sem diskord.
23Kan to viv ek lorgey, enn zour to pou abese;
me si to viv ek limilite, enn zour to pou onore.
24Si to konplis enn voler, to lavi bien amer;
to kone Bondie pou pini twa, me to pa kapav devwale#29:24 Levitik 5:1, kapav ed nou konpran sa verse-la pli bien..
25Si nou per lezot, nou lavi pieze;
me si nou fer LESEGNER konfians, nou an-sekirite.
26Dimounn rod faver bann ki dan pouvwar;
me zis LESEGNER ki donn li seki li merite.
27Bann dimounn onet ay linzistis;
me bann malfeter ay dimounn onet.
Currently Selected:
Proverb 29: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
