Proverb 27
27
1Aret fer gran-nwar konsernan dime;
parski personn pa kone ki kapav arive zordi.
2Pa lev tomem anler, les enn lot flat twa;
mem enn etranze kapav felisit twa, me pa fer li tomem.
3Enn ros pez lour, disab osi;
me provokasion enn bet pli lour ankor.
4Laviolans fer per, lakoler danzere;
me zalouzi pli terib ki toule-de.
5Enn kritik fran ek onet li meyer
ki enn santiman ki res andan.
6Mem si enn kamarad repros twa kitsoz, to kapav fer li konfians;
me si enn lennmi vinn anbras twa, pran kont!
7Kan to vant plin, dimiel osi to pou refize;
me kan to afame, mem margoz to pou anvi manze.
8Enn dimounn ki lwin ar lakaz so fami,
li kouma enn zwazo ki lwin ar so nik.
9Parfin ek delwil esansiel met lazwa dan leker;
me nanye pa bat lamitie enn kamarad sinser.
10Pa rezet to kamarad, ni kamarad to papa.
Si to bizin led, pa al rode kot fami reste;
enn vwazin akote, pli sir ki enn fami ki res lwin.
11Mo zanfan, viv ar lasazes; to ava met mo leker dan lazwa.
Lerla, mo pou ena repons pou dimounn ki kritik mwa.
12Enn dimounn intelizan, li konn evit maler;
enn inioran, nek bes latet fonse. Lerla, li zwenn tase.
13Si kikenn ase bet pou garanti det enn etranze,
li merite kan pran so prop dibien pou ranbours det-la.
14Si gramatin boner to lev to vwazin pou dir li bonzour for-for,
koumadir to pe insilte li.
15Enn partner ki manz lavi touletan,
li kouma lapli ki pa aret tonbe;
16si to sey aret li, koumadir to pe sey aret divan soufle,
ouswa to pe rod trap delwil dan to lame.
17Feray fit feray;
dimounn transform dimounn.
18Si to okip to pie fri, to pou manz so fri;
si to okip lintere to patron, to pou gagn loner.
19Get dan laglas, to pou trouv to figir;
get dan to leker, to pou trouv to karakter.
20Lamor zame satisfe, pli li gagne li pran.
Bann imin osi parey, zame zot satisfe ar seki zot ena.
21Nou konn kalite lor ek larzan atraver dife;
nou konn valer enn dimounn atraver so repitasion.
22Ninport ki kantite bate to pou bat enn bet,
li pa pou aret fer betiz.
23Get bien lasante to zanimo;
pran bien kont to troupo.
24Parski larises, pa dir lontan,
kouma regn enn lerwa pa dir touletan.
25Kan to finn fini koup lerb, li repouse;
kan to al ramas lerb lor flan kolinn pou nouri to zanimo,
26to bann mouton pou abiy twa,
to bann troupo pou permet twa aste later.
27Pou ena ase dile pou nouri twa ek to fami;
anplis, to pou kapav nouri to bann serviter ek servant.
Currently Selected:
Proverb 27: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
