Proverb 26
26
1Eski lanez tonbe dan lete? Eski lapli tonbe dan sezon sek?
Parey! Loner pa ale ar enn dimounn bet.
2Kouma mwano vir-vire dan lesiel, kouma zirondel tourn-tourne dan lezer,
malediksion san fondman pa pran lor personn.
3Enn kravas pou seval, enn baton pou bourik,
enn rotin pou ledo enn bet.
4Pa kas latet reponn enn bet;
sinon to pou abes twa net.
5Si to reponn enn bet, fer li kone li bet;
sinon, li pou pran li pou enn fwet.
6Si to swazir enn bet pou pas to mesaz,
koumadir to pe koup to prop lipie; to pe invit traka.
7Enn parol saz dan labous enn bet,
li feb kouma lipie enn paralize.
8Si to felisit enn bet,
li koumadir to pe met enn ros dan enn fles. Tansion blese!
9Enn proverb dan labous enn bet,
li kouma enn kouto dan lame soular.
10Si enn patron anplway enn bet ouswa enn soular,
koumadir li pe tir kout fles lor tou dimounn.
11Enn bet ki repet mem betiz,
wadir enn lisien ki remanz so vomi.
12Mil fwa to zwenn enn bet,
ki to zwenn enn dimounn ki deklar saz.
13Enn pares dir:
“Ena enn lion deor! Ena danze partou!”
14Enn laport vire-tourne lor so gon;
enn pares vire-tourne lor so lili.
15Enn pares met lame dan lasiet manze,
me li tro fatige pou met manze-la dan so labous.
16Enn pares krwar ki li pli malin
ki bann dimounn ki ena disernman.
17Si to met to nene dan bagar ki pa konsern twa,
koumadir to pe trap zorey enn move lisien.
18-19Kan kikenn trik so prosin, apre dir: “Mo ti pe badine,”
li parey kouma enn fou ankoler ki pe tir kout bal brit-brit.
20Kan nepli ena dibwa, dife tengn;
kan nepli ena palab, dispit arete.
21Parey kouma sarbon fer labrez ek dibwa nouri dife,
enn palabrer nouri laenn ek konfli.
22Parol palab, li kouma enn manze ki finn bien prepare;
li fondan dan labous e li fasil pou dizere.
23Lapintir kasiet defo lor dibwa,
me zoli parol kasiet mesanste ki dan leker.
24Enn ipokrit kasiet so laenn dan so bann parol dou;
me dan so leker, li pe mont enn move kou.
25Kan to lennmi flat twa ar zoli parol, pa krwar li;
parski so leker ranpli ar lafoli.
26Li kapav ase rize pou kasiet so laenn,
me enn zour, so mesanste pou paret anplin lizour.
27Si to fouy trou pou piez lezot, tomem ki pou tom ladan;
si to koumans roul enn gro ros, li pou retourn lor tomem.
28Lalang manter deteste so viktim;
kikenn ki met dan siro rwinn dimounn ki li flate la.
Currently Selected:
Proverb 26: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
