Proverb 25
25
Ankor diferan proverb Salomon
1Ala ankor plizir proverb Salomon, ki ti kopie par bann skrib Ezekias, lerwa Zida.
2Nou glorifie LESEGNER parski so bann aksion res bann gran mister;
nou glorifie lerwa parski li desifre bann mister-la.
3Parey kouma nou pa konn oter lesiel ouswa profonder lamer,
zame nou pou konn profonder panse enn lerwa.
4Tir verdigri ki kouver larzan,
e bizoutie pou kapav fasonn bann obze presie.
5Met tou froder deor dan lantouraz lerwa,
lerla, li pou gouvern ar lazistis, e so pouvwar pou grandi.
6Pa fer vantar dan prezans lerwa;
pa sey pran plas seki pli gran ki twa.
7Parski li boukou pli bon kan gagn promosion,
ki kan perdi grad divan enn sef.
8Kan to finn trouv kiksoz,
pa prese pou met zafer lakour.
Si to adverser prouve ki to ena tor,
lerla, to latet pou bese ar laont.
9Sey regle problem an-prive ar to vwazin;
pa bizin devwal sekre personn.
10Dimounn pou akiz twa pou difamasion,
e sa pou touzour rwinn to repitasion.
11Enn parol bien kalkile,
li kouma enn desin an-or lor enn plato an-arzan.
12Enn bon konsey,
li kouma enn zano gran valer pou zorey ki ekoute.
13Enn serviter fidel ek onet soulaz langwas so met,
kouma dilo lasours, rafresi bann kouper kann anplin lete.
14Dimounn ki touletan promet kado, me zame pa done,
li kouma niaz ek divan ki zame donn lapli.
15Avek pasians, to kapav fer to sef sanz lide;
douser dan langaz fer baraz tonbe.
16Si to finn dekouver dimiel, pa fer gourman;
manz zis, pou ki to pa gagn maloker apre.
17Pa tro met nene kot to vwazin,
sinon, li pou plin ar twa e li pou koumans deteste twa.
18Si to akiz to prosin pou nanye,
koumadir to pe atak li ar baton, fles ek lepe.
19Si to fer konfians enn dimounn malonet dan to maler,
koumadir to pe manze ar enn ledan bouze, ouswa to pe marse ar enn lipie foule.
20Pa sant bann sante lazwa ar enn dimounn ki dan tristes,
li koumadir to pe tir to linz dan freser, ouswa to pe vid lalkol lor enn ple.
21Si to lennmi gagn fin, donn li manze;
si li swaf, donn li bwar.
22Sa pou rann li malalez. So latet pou sofe, koumadir ena labrez.
Lerla, LESEGNER pou rekonpans twa.
23Divan Lenor amenn lapli lete,
palab amenn lakoler.
24Prefer dormi deor dan kwin lakaz,
ki dan lakaz avek enn partner gran labous.
25Parey kouma dilo fre apez nou laswaf,
enn bon nouvel fer nou leker kontan.
26Kan enn bon dimounn kapitile divan enn malfeter,
li parey kouma labou dan dilo, ouswa pwazon dan lasours.
27Li pa bon manz tro boukou dimiel;
li pa bon osi, kan to rod tro boukou loner.
28Enn dimounn ki pa kontrol so koler,
li kouma enn lavil san defans divan lennmi.
Currently Selected:
Proverb 25: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
