Proverb 24
24
19
1Pa rod fer kouma bann move dimounn;
pa ni frekant zot.
2An-efe, dan zot panse ena zis violans;
zis mesanste ki sorti dan zot labous.
20
3Ar lasazes nou aranz enn lakaz;
ar disernman nou fer li vinn pli solid.
4Avek lexperyans nou ranpli bann lasam
ar bann zoli obze valer.
21
5Enn dimounn saz, li pli siperyer ki enn dimounn for;
enn gran servo pli inportan ki zis lafors fizik.
6Si to konn servi to lespri, sa pou ed twa kont to lennmi;
kan to ena boukou bon konseye, laviktwar asire.
22
7Lasazes tro difisil pou enn bet;
kan dimounn saz zwenn ansam, bann bet pena nanye pou dir.
23
8Si touletan to tir plan pou fer lemal,
dimounn pou apel twa malfeter.
9Enn malfeter, so program nek fer pese;
personn pa kontan enn vantar arogan.
24
10Si to bes lebra dan letan difisil,
savedir to feb.
25
11Pa ezite pou al sekour enn inosan ki finn kondane amor;
sap lavi dimounn ki pe kabose pou al divan bouro.
12Kapav to pou dir: “Mo pa ti kone.”
Me, pa bliye, Bondie konn to leker.
Li konn tou seki to fer;
li pou rekonpans twa dapre to bann aksion.
26
13Mo zanfan, dimiel bon pou manze;
li dou dan labous.
14Konpran mo zanfan, lasazes kouma dimiel pou to nam;
kan to ena li, to lavenir asire,
e to lespwar pa pou tom dan dilo.
27
15Pa fer kouma bann malfeter ki vey lokazion pou atak fami bon dimounn;
pa devaliz lakaz dimounn drwat.
16Ninport komie fwa bon dimounn tonbe, li pou releve;
me bann malfeter fini dan maler.
28
17Pa bizin zibile kan to lennmi tonbe;
pa sote-pile kan li kogne.
18 LESEGNER pa pou kontan kan li trouv sa;
e li pa pou pini li.
29
19Pa kas to latet ar bann move dimounn;
pa rod vinn kouma zot;
20parski move dimounn pena lavenir;
zot lavi pou tengn vit, kouma lalanp san petrol.
30
21Mo zanfan, respekte LESEGNER e respekte lerwa;
pa rant kamarad ar lennmi LESEGNER, ni ar lennmi lerwa.
22Parski toule-de ena pouvwar pou rwinn twa.
Personn pa kone ki maler zot kapav avoye.
Ankor inpe parol lasazes
23Ala proverb dimounn saz:
Enn ziz pa gagn drwa get ar de lizie.
24Si enn ziz dir enn koupab: “To inosan,”
dimounn pou modi li, lepep pou deteste li.
25Me si ziz-la pini bann koupab,
li pou gagn loner ek boukou benediksion.
26Enn repons onet,
li enn prev lamitie.
27Okip to lakour, prepar to terin avan;
apre to kapav aranz to lakaz.
28Pa akiz to vwazin san rezon;
pa bizin koz manti.
29Zame pa dir: “Mo pou tret li kouma li finn tret mwa;
bate rande pa fer dimal.”
Pa fer pares
30Mo ti pas kot karo enn pares;
kot plantasion enn bet.
31Move lerb ti pe nate partou;
pie pikan ti pe fer lalwa;
ek miray ti finn grene dan boukou landrwa.
32Mo ti arete, gete, reflesi;
leson la ti bien kler:
33Kan kas poz fer somey,
kan krwaz lebra repoze,
34lamizer atak twa kouma enn voler,
lafin ek laswaf tom lor twa kouma enn bandi.
Currently Selected:
Proverb 24: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
