Proverb 11
11
1 LESEGNER deteste bann ki fos zot balans;
me sa fer li plezir kan servi enn pwa ki zis.
2Lorgey atir dezoner;
me limilite atir lasazes.
3Enn bon dimounn mars touzour dan lonette;
me enn malonet mor ar so prop mesanste.
4Kan Bondie pou rann so zizman, to rises pa pou sov twa;
me lonette ek fidelite kapav prezerv to lavi.
5Enn dimounn onet pratik lazistis e so sime drwat;
me enn malonet fouy so prop tom.
6Lonette enn bon dimounn pou sap so lavi;
me enn malonet pou may dan so prop piez.
7Kan enn move dimounn mor, so lespwar osi anvole;
konfians ki li ti ena dan so rises, disparet kouma lafime.
8Enn dimounn ki drwat ek fidel, pa pou gagn problem;
me move dimounn atir traka lor limem.
9Parol move dimounn amenn larwinn lor so prosin;
me lexperyans enn saz tir li dan petrin.
10Kan bon dimounn prospere, lepep selebre;
e kan move dimounn mor, lepep dir: “granmersi.”
11Bann bon dirizan atir benediksion Bondie, ek pei progrese;
me mansonz bann move dirizan devir pei anba-lao.
12To bet, si to fer vantar ar to prosin;
bann dimounn ki ena disernman kone kan bizin res trankil.
13Enn dimounn palab pou devwal to sekre;
enn dimounn sinser merit to konfians.
14Enn nasion san direksion pou tonbe;
me kan ena boukou bon konseye, laviktwar asire.
15Pa dibout garan pou enn etranze, to pou regrete;
to lavi pou pli trankil si to refize.
16Enn zoli fam ki viv bien gagn loner;
enn zom debrouyar gagn rises.
17Bann bon dimounn pou gagn zot rekonpans;
bann malfeter atir zot prop maler.
18Bann move dimounn travay pou nanye;
dimounn ki fer dibien, zot ava dan bien.
19Seki res ferm dan sime lazistis pou viv;
me seki galoup deryer lemal pou mor.
20 LESEGNER deteste bann dimounn ki ena leker sal;
me bann ki viv drwat fer li plezir.
21Marke-garde, move dimounn pou gagn pinision;
me bon dimounn pa pou konn kondanasion.
22Enn zoli fam ki pena bonsans,
so bote kouma enn bag an-or lor nene koson.
23Enn bon dimounn dezir zis seki bon;
enn malfeter atir touzour lakoler lezot.
24Ena ki donn avek bon leker, e zot vinn pli ris;
ena ki peng#11:24 Peng vedir “pa kontan partaze” oubien “pa kontan depanse.” , me zot vinn pli pov.
25Dimounn ki zenere pou prospere;
seki donn lezot enn ver dilo, zame pa pou gagn swaf.
26Lepep modi bann komersan ki atann pri monte pou vande;
me zot onor marsan ki pa get zis profi.
27Dimounn ki fer dibien gagn faver;
me seki pratik lemal gagn maler.
28Seki met zot konfians dan zot rises, zot pou tonbe kouma fey sek;
me bann fidel pou prospere kouma enn pie ki so feyaz touzour ver.
29Seki fer so fami soufer, li pou gob ler.
Bann ti-lespri touletan pou esklav bann saz.
30Enn bon dimounn, li kouma enn pie ki donn lavi;
me laviolans, souvan amenn lamor.
31Si bon dimounn gagn rekonpans lor later,
bann malfeter ek bann peser osi pou rekolte seki zot seme.
Currently Selected:
Proverb 11: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
