Proverb 10
10
Bann proverb Salomon lor lavi moral
1Bann zanfan saz fer leker zot paran kontan;
zanfan bet fer leker zot paran fermal.
2Rises mal-gagne fer lavi amer;
me enn lavi onet tir twa dan piez lamor.
3 LESEGNER pa pou les bon dimounn mordefin;
me li pou anpes bann malfeter akonpli zot move dezir.
4Lame enn dimounn pares amenn lamizer;
me lame enn bon travayer amenn larises.
5Li enn loner pou dimounn ki rekolte dan bon sezon;
me li enn laont pou dimounn ki dormi dan sezon rekolt.
6Benediksion pou lor latet bann bon dimounn;
me laviolans sort dan labous bann malfeter.
7Souvenir enn bon dimounn rann nou ere.
Me kan enn malfeter mor, bien vit nou bliye so nom.
8Dimounn saz ek rezonab ekout bon konsey;
me enn bet ki koz ninport fini dan presipis.
9Dimounn onet viv an-sekirite;
me bann malonet zwenn tase.
10Dimounn ki pez lizie pou anbet lezot, amenn problem;
bann ki pa per pou korize, amenn lape.
11Parol bon dimounn kouma enn lasours ki donn lavi;
me parol enn malfeter kasiet boukou violans.
12Laenn amenn lager;
lamour pardonn erer.
13Lasazes, li lor lalev bann dimounn intelizan;
me bann ki pena bonsans ava gagn kout baton.
14Dimounn ki saz gard konesans kouma enn trezor;
me kan ti-lespri koze, larwinn zame lwin.
15Dibien enn ris protez li kouma enn fortres;
lamizer enn pov ronz li kouma karya.
16Lapey enn dimounn onet amenn nouvo lavi;
lapey enn dimounn malonet servi pou fer pese.
17Seki ekoute kan koriz li, li progrese lor sime lavi;
seki zame aksepte so erer, li perdi so sime.
18Seki kasiet laenn dan so leker, li enn manter;
e seki fann fos rimer, li enn palabrer.
19Plis to koz boukou, plis to ena risk fer pese;
enn saz konn kontrol so lalang.
20Parol enn bon dimounn, li kouma metal presie;
lespri dimounn malsin, li kouma enn drom vid.
21Parol bann zis, nouri boukou dimounn;
me bann bet mor par zot prop betiz.
22Benediksion LESEGNER amenn larises;
me pa latristes#10:22 Me pa latristes: Ena tradiksion dir: “Zis travay dir pa fer twa vinn pli ris.” .
23Dimounn ti-lespri gagn plezir dan pratik lemal;
dimounn ki ena rezonnman gagn plezir dan pratik lasazes.
24Dimounn drwat gagn seki zot dezire;
move dimounn gagn seki zot plis per.
25Tanpet vini, move dimounn anvole;
me bon dimounn touletan reziste.
26Dimounn pares minn zot anplwayer,
parey kouma lafime bril lizie, e vineg fer ledan grinse.
27Dimounn ki respekte LESEGNER pou viv pli lontan;
me bann malfeter pou mor avan ler.
28Lespwar bon dimounn donn zot lazwa;
move dimounn pena lavenir ditou.
29 LESEGNER protez bann bon dimounn ar pwisans;
me li detrir bann dimounn ki fer lemal.
30Dimounn drwat pou viv an-sekirite;
dimounn traver pou zwenn tase.
31Bann dimounn drwat koz langaz lasazes;
me bann ki ena lalang manter pou gagn pinision.
32Parol bann bon dimounn fer plezir;
mansonz bann move dimounn fer soufer.
Currently Selected:
Proverb 10: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
