Proverb 12
12
1Bann dimounn ki anvi aprann, zot aksepte disiplinn;
me bann bet pa aksepte repros.
2 LESEGNER donn so faver bann bon dimounn;
me li kondann bann ki tir plan pou fer lemal.
3Pratik lemal pa garanti sekirite;
me dimounn drwat ena stabilite.
4Enn bon fam, li kouma enn kouronn lor latet so mari;
enn fam infidel, li kouma enn kanser dan lezo so mari.
5Dimounn onet ena touzour bon lintansion;
konsey enn malfeter met dimounn dan perdision.
6Parol bann move dimounn kouma bann piez mortel;
me parol dimounn drwat amenn delivrans.
7Move dimounn fini mal, li pa les okenn tras;
me fami dimounn drwat res bien solid.
8Enn dimounn intelizan gagn ladmirasion;
dimounn leker sal zame pou ena rezon.
9Preferab res sinp e travay pou roul lakouzinn;
olie met dan zar, me vant pe kriy lafaminn.
10Bon dimounn okip bien zot zanimo;
me move dimounn maltret seki pou zot.
11Enn planter ki travay dir, so grenie ranpli;
enn inbesil perdi letan ar tou seki initil.
12Move dimounn rod rises mal-gagne;
me bon dimounn zame mank manze.
13Move dimounn pieze ar zot prop mansonz;
dimounn onet konn evit maler.
14Kan travay bien, gagn bon lapey;
kan koz bon parol, gagn sikse.
15Dimounn vantar touletan krwar zot ena rezon;
me dimounn saz touletan ekout bon konsey.
16Bann inbesil ankoler vit;
me bann saz kontrol zot lemosion.
17Enn temwin ki koz laverite amenn lazistis;
mansonz enn move temwin nouri linzistis.
18Parol anler fer dimal kouma lepe;
me parol reflesi amenn gerizon ek lape.
19Enn parol laverite res pou touzour;
me enn parol mansonz res zis pou enn zour.
20Ena mesanste dan leker bann dimounn ki fer lemal;
me ena lazwa dan leker bann dimounn ki fer lape.
21Bann dimounn ki drwat viv dan leboner;
me bann malfeter antoure ar maler.
22 LESEGNER deteste dimounn manter;
me li apresie dimounn sinser.
23Dimounn intelizan pa fer palab;
me bann bet etal zot betiz lor latab.
24Dimounn ki travay dir pou gagn pouvwar;
me bann pares pou vinn esklav.
25Traka dan leker fer twa dekouraze;
me enn bon parol fer twa soulaze.
26Enn dimounn drwat donn bon konsey so prosin;
me sime enn move dimounn amenn li dan petrin.
27Bann dimounn pares pena nanye pou roti;
me dimounn ki travay dir, touletan ena kitsoz pou kwi.
28Lor sime lazistis, to pou viv lontan;
si to swiv li, to pa pou mor kouma perdan.
Currently Selected:
Proverb 12: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
