MARKO Alki/ituú niiná daanduú kitaábuuwihe
Alki/ituú niiná daanduú kitaábuuwihe
Marko, goousmoó kitaábuuwí, a yaamuloousmoó gixsár Yerusalemu. Umuú aayoorós a Maria (Tlehh 12:12). Umuú baabuúwós i xu'utitiiká. Baraá kitaábuuwihe umuú Marko kwa gooinká. Ala baraá tlehhma'aá Ya/abuuseero un slaslaawaán qoomár inós nee maamáywós Barnaba nee Paulo tiwa alkoné' baraá ya/abtór hho' alki/it, tari hardáh ay Perga. Baraá kitaábuú Tlehhma'aá Ya/abuuseero umuuwós a Yohane Marko. Inós ina kií/ ayaawós baraá Pergár wa ale (Tlehh 13:13). Aa'aá ki/maá tsare Paulo guri sií' tiwa alkona', ala inós nee maamáywós Barnaba tiri alkoné' baraá aaiwo ay Kipro (Tlehh 15:38-40). Paulo baraá barwaduuwose Marko guna alki/iít tawa adór heewós oo tseéw oo gu alee/iís (Kol. 4:10; 1 Tim 4:11; Filem 1:24). Tam Ya/abusmo Petro Marko guna adór garmaawósár ateét.
Marko kitaábuuwí nguwa gooín guna iimu/ún ar /ayma'aá kaahá': Gaarí an iimu/úngw Ya/abtór hho' daanduú Yesu Kristo, Garmoó Mungú.
Inós Yesu guna alki/iít tawa adór heé tlehhmi'i nee heé aleesleemuú koóm. Aleesleemuú Yesu ku geehhoó' baraá intsaahhatisarose, nee aleesleemuuwós daanduú neetlaame hingeemisuwo nee daanduú tlakweemaá muu ngiwa gurtlatlay. Slám Yesu daanduuwose ina axweés tawa Garmoó Hee, kudá' naa hardah as slafiingós nguwa haniisi as múk yaariír nguwa gweeri baraá tlakweemaawo.
Marko muruú Yesu aa tleéhh guna gooín ta axweesantá aa kaahi, nee intsaahhatisarose. Alaá gadiyér Yohanedá' baatimaamisa, nee alaá baatiísmoó Yesuwo nee iiaraa'aduuwose goousmoó kitaábuuwí kángw muruú Yesu aa tleéhh guna adaá iimu/ún alki/ituwo. Afér tsár ar amór alhhe'eesoó kitaábuwo gár taa gooín a kángw tlehhma'aá Yesu baraá wiíkidár alhhe'eesayhe, dír kura slahh'eemisiiká, kángw inós kuwa slahh'eemiís, kuri kikií' gawaá Msalaába, iri gwaá', nee kángw niwa waasleé/ baraá gwa'araaro.
Digir wakeetíngw kitaábuuwí:
Iimu/úngw kitaábu 1:1-13
Yesu gadiyeé ngiwa tleéhh ar geehhoeema baraá Galilayár wa ale 1:14—9:50
Iimír Galilayár wa tleemu ay Yerusalemu 10:1-52
Gadiyér aa tleéhh wiíkidár alhhe'eesaywo, baraá Yerusalemuwo nee inslaawaydae 11:1—15:47
Yesu niwa waasleé/ 16:1-8
Aako Yesu tiwa geehhooeés nee iwa tsa/án gawaá doori 16:9-20.
Currently Selected:
MARKO Alki/ituú niiná daanduú kitaábuuwihe: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.