MARKO 1

Alki/ituú Yohanedá' Baatimaamiís

(Mat 3:1-12; Luka 3:1-18; Yoh 1:19-28)

1Gaarí a iimu/úngw Ya/abtór hho' daanduú Yesu Kristo, Garmoó Mungú. 2Adoodá' baraá kitaábuú aarusmo Isayuwo kara gooín,

«Ga/aaweek, ya/abusmooeé' u geeraawók wa ya/aáw,

oo loohirók ga amohhe'eés.

3Afór hee iiárií qaasaak

ar baraá darmuú wa tseeamiim, ar kah,

‹Loohír Aako amohhe'eesaak,

nee waarahhmaawós gan'aasaak.› »

4Ala Yohanedá' Baatimaamiís niri hardáh, iri baraá darmuú wa baatimiís. Iri alki/iít iwa kaahi, «Hhu'u'umé' tundu baatimiisi as Mungú tlakweemaahúng ngiwa gurtlay.» 5Xoorór yaamaá Yudea sleémeero nee múk Yerusalemu sleémeero kuri i daqáy, kiri baraá yaaér Yordanír wa baatimiís, as tlakweemaaín kiwa hhu'u'ún.

6Tsitoó Yohane kuna tleéhh ar se'éngw angamía, nee afeetloowós a himú kaahari, nee muruú /aymaarós a ingigi nee danú sla/a. 7Inós iri alki/iít, iri káh, «Heé aleesleemuú koóm oo án i baá/ ni aluueé' wa hardah. Tam aníng a hariimaaká niwa xupuu' him'ér ya/ataawós ngiwa slakwekwe'ees. 8Aníng nuna baatimiís ar ma'aay, ala inós nu baatimiis ar Qeeruú hhoohhoó' oo Mungú.»

Yesu kuwa baatiís

(Mat 3:13-17; Luka 3:21-22)

9Deeloodae Yesu iri hardáh, i amór gixsár Nasaretír daahh, ar baraá Galilaya, nee Yohane guri baraá yaaér Yordanír wa baatiís. 10Siiwadár kilá' iwa baraá ma'áy wa ti'iít, doori gina ár naa gweeritiyé', nee Qeeruú hhoohhoó' oo Mungú i gawaawósí awdiit adór hhooki. 11Afo nay gawaá doorí wa ilawáts, i kat, «Kuúng a Garmaaeé', sla'aarusmooeé', oo aníng iga qwal/atis.»

Yesu kuwa iiaraa'ár

(Mat 4:1-11; Luka 4:1-13)

12Siiwadár kilae Yesu kuri huúw nee Qeeruú hhoohhoó' oo Mungú baraá darma. 13Ina baraá darmuú wa hoót deelo mibeeri tsiyáhh, kuna iiara'ár nee Neetlaangw. Yesu i dinkwa nee makaá sla/a, nee malayke guna sagadiyús.

Yesu múk tsiyáhh oo siyoó ohiím nguwa ateet

(Mat 4:12-22; Luka 4:14-15; 5:1-11)

14Tam alaá Yohane kuwa tseék, Yesu iri Galilayár káy, Ya/abtór hho' ar Mungú gari alki/iít, 15iri káh, «Qooma aa bó/, nee waawuti'iimár Mungú naa tseewuúr. Hhu'uu'umé', nee Ya/abtór hho' haratlintiaagáy.»

16Qoomár Yesu iwa waaraahhi dír afaá tlawtá Galilayaro, Simon guna ár, nee hhiyaawós Andrea, ta baratsufoó kwakwaahh baraá tlawi, asma inooín i siyoó ohaahiná'. 17Yesu giri báy, «Qwalaasé', án eehararé', án kuungá' nu intsaahhatís adór muu ngur amor'eé' huwaahuba'.» 18Siiwadár kilae baratsufay'ín kuri geexáy, Yesu kuri eehár.

19Yesu gár niinawe iwa geerií kumiít, Yakoboó Sebedayo nee hhiyaawós Yohane giri ár. Inooín sleeme ta baraá miringamo, ta baratsufay'ín amohhe'eemiis. 20Siiwadár kilae giri ateét, baabuúín Sebedayo kuri geexáy baraá miringamo dinkwa nee mukdá' ta bu'un, tari daqáy, Yesu kuri eehár.

Heé neetlaame aa eér

(Luka 4:31-37)

21Tari tláy ay Kapernaumu, siiwadár kilae bál deelór Sabaátoro Yesu iri dáh baraá doó saaliingw, iri intsaahhatimís. 22Intsaahhatimisuuwós kuri waa/oó', asma Yesu inooín gina intsaahhatimís adór heé hara'ayár koóm, aa intsaahhatimisiiká adór intsaahhatuusér hara'ayár Mose.

23Qoomaadae baraá doó saalingw'ine heeko i deer oo neetlaame aa eér, iri tseé', 24Yesu guri báy, «Atén nee kuúng a milá, Yesú Nasareti? Ahaá, nina hardáti as atén tiwa qwaares? Án kuúng u xuú' adór tar heemá, Kudá' Hhoohhoó' oo Mungú.»

25Yesu neetlaameedá' gari iigahhaát, gari báy, «Xasliité', ti'iité'.»

26Neetlaameedá' hee guri pungaahhamuúr, iri tsé' ar afór ur, guri geemeér. 27Tari ló'wa waa/oó/ sleémeero, tam tiri yaahamisiyé' tari káh, «Gár adoorí a milá? A intsaahhasár /abéne? Ahaá baré ar aleesleemuwo tam neetlaame gan hara'ayiyín, inós gway ilaiwaawá/.»

28Siiwadár kilae kangós iri tsiyaayaaxaát umuúqo diiro baraá yaamu sleémeero awa bihhér Galilaya.

Yesu múk yaariír nguwa hungu/uumiís

(Mat 8:14-17; Luka 4:38-41)

29Tindiwa baraá doó saalíngw wa ti'iít, tari hardáh dír doó Simon nee Andrea, dinkwa nee Yakobo nee Yohane. 30Aayór harér Simon i qatií dirí', ga/atani gaa ót, kangós kwihe Yesu kuri ádbáy. 31Yesu gari harasuruúk, gari dawa óh, gari tleés, ga/atani gari geemeér. Aayoorí inooín giri sagadiyús.

32Qoomár tsiindo looa iwa dát, kuna múk yaariír i huwahuúw oo tiqtuuse nee oo neetlaame aa aeér. 33Nee múk gixsa sleémeero ina burumburiít afkú doó i ale. 34Múk yaariír oo tiqtír dimbadimbé ga koóm guri hungu/umiís, neetlaamér yaariir gari hingeemiís, sleeme neetlaame gaa mayká iwa axwes, asma gwaa xú'.

Yesu ii Ya/abtór hho' alki/ituú áy

(Luka 4:42-44)

35Nee matlaatlér boo/e iri tláy iri ti'iít ay dír muu iwa kahhi, iri firín didaádá' wa ale. 36Simon nee kudá' ti al koomá' kway leelehhiít. 37Inooín kuwa sláy kuri báy, «Muu sleémeero i kuúng leelehhiit.»

38Inós giri báy, «Qwalaasé' amór hatlá', amór gixsadaá tsewen, as Ya/abtór hho' ngiwa alki/iit amorqane sleeme, asma gaarí an gár aníng nisa hardáh.»

39Iri daqáy baraá ayaá Galilaya sleémeero, iri alki/iít baraá maray'ín awa saaliingo, nee neetlaame gari hingeemiís.

Yesu heé tiqtír tsatimit nguwa hungu/uús

(Mat 8:1-4; Luka 5:12-16)

40Heé tiqtír tsatmit ina hardáh dirós, guri i tumbarara'aát, guri firiirín iri oó', «Kuúng bar slá', án i aleesleér iwa hheehhe'es.»

41Guruuwós iri tláy, guri dakós i gan'aás, guri kwatiít, guri báy, «Án a slaá', hhoohhooúw.» 42Nee hamtidá' tiqtirós tidár tsatmit iri qútl, inós iri hunguú/. 43Guri hara'ayín kángw kilá' wa ale, guri quutliís hamtidár kilá', 44guri báy, «Ga/aaweek, hee mu /aymuú bawaar, ala tláw ti laqaan dír kaahamusmoó Mungú. Muruudá' Mose aa hara'ayín haniiseek asma hungu/umaawók, as tí iwa lamabu'uungw tleehhit dir'ine.»

45Ala heedá' iri ti'iít, kangwdá' guri alki/iít ar axweesanoó yaariír, nee guri tsiyaayaaxán, tam Yesu pa/aangw gwa slayká oo iwa dahi baraá gixsa ar geehhooeema. Ala iri tsee/aá wa iwiwiít dír muu iwa kahhi, nee umuúqo diiro kuri i daqaaqáy.

Currently Selected:

MARKO 1: IRQW

Highlight

Copy