MARKO 2

Yesu heé tiqtír sol'omit nguwa hungu/uús

(Mat 9:1-8; Luka 5:17-26)

1Alaá deelór niinawe Yesu iri male dáh baraá Kapernaumu, kari axaás adór ir dóí dirií'. 2Múk yaariír ina burumburiít, tam pa/aangw aa meetiiká dír afkú do'o. Inós axweesantá Mungú gari dir'íní alki/iít. 3Múk tsiyáhh heé tiqtír sol'omituú koóm kunguri dirósí huuw, kungwa himbeét. 4Inooín Yesu i tsewuwto kuwa harslaaqaát as boo/oó muu, daanduú do' kuri fooxiís afi qoomaadá' inós i dirii'i. Fooxisaro kuwa hhe'eés, tiqtusmoodá' kuri didár aweeriís ar hhaftuuwós. 5Yesu haratlintaaór mukdá ngiwa ár, tiqtusmoodá' guri báy, «Garmaaeé', tlakweemaawók kaa gurtláy.»

6Nee baraá tla/angw'ine intsaahhatuusér hara'ayár Mose bahh'alé i deer ar iwiwiit, ta baraá muner'ín i kaahi, 7«Asma milá mis adoorí kah? I Munguú /ooslislín. Heé tlakweema gurtleemuuwo gi aleesláw a heemá? A har Mungú kilóseéke?»

8Ala Yesu adoodá' i baraá muner'íní axweesiyá' gari adaá tsaáhh baraá qeeruuwose giri báy, «Asma milá adoosíng mas baraá munerhúngí aldakwtá'? 9Gár ák inslaahh a gaalá, a heé tiqtír sol'omituú koóm kuwa báya, ‹Tlakweemaawók kaa gurtláy›, laqaá kuwa bay, ‹Sihhiít, hhaftuuwók gagaareek, tláw.› 10Ala kuungá' xuaak adór Garmoó Hee aleesleemu ngur kón baraá yaamuwo oo tlakweema ngiwa gurtlay.» Tiqtusmoodá' guri báy, 11«Án a kah, sihhiít, hhaftuuwók gagaareek, waátl amór do'ók.»

12Siiwadár kilae heedaádá' iri sihhiít, hhaftuuwós guri gagaár, iri ti'iít geeraá muu sleémeero, muu sleémeero iri waa/oó/, Mungú kuri xirfayeemiís, tay káh, «Kureeriiwo gár adoorí aga baloó araaniiká.»

Yesu Laáwi nguwa ateét

(Mat 9:9-13; Luka 5:27-32)

13Yesu iri malé tláy ay amór afaá tlawi, nee boo/aay sleémeero iri amoorós i daqáy, inós guri intsaahhatimís. 14Qoomár iwa waaraahhi, Laáwuú Alfayo guna ár, aa iwiít baraá doó ohmér koódi. Guri báy, «Eeharáng.» Laáwi iri tláy, guri eehár.

15Qoomár Yesu iwa dír muruú /aymaárií iwiít, dír doó Laáwiwo, ohomuusér koódi ar yaariir nee tlakuuse tana al iwiít nee Yesu nee eeharuuseerose, asma múk gwa eehar ku yaariír. 16Intsaahhatuusér hara'ayár Mose nee múk Farisayo kuwa ár, inós iwa al/ayna' nee ohomuusér koódi nee tlakuuseero, eeharuuseerós kari báy, «Asma milá mis al /ayiná' nee ohomuusér koódi nee tlakuuseero?»

17Yesu adoodá' ngiwa axaás, giri báy, «Múk slaqoo hhó' i qwaslaarmoó leelehhiitiiká, aqo har tiqtuuse. Aníng naa hardihiiká as múk hota ganaá' nguwa ateetiim, ala nina hardáh as tlakuuse.»

Yaahasa daanduú gwaawito

(Mat 9:14-17; Luka 5:33-39)

18Qoomár eeharuusér Yohane nee múk Farisayo tawa gwaawín, muu iri hardáh dír Yesu, kuri báy, «Ahaá baré eeharuusér Yohane nee eeharuusér Farisayo i gwaawiwiín, eeharuuseerók gaálay i gwaawawiin.»

19Yesu giri báy, «War/aá garmoó duuxuxuúm mihar gwaawiná' qoomár barta dinkwa nee garmaadá' duuxuxuúm? Qoomaadá' sleémeero tawa dinkwár i dirii'i nee garmoó duuxuxuúm, gár tas gwaawin i káhh. 20Ala deelo i hardát ar garmoó duuxuxuúm kuwa hingeesi, nee deelaadá' an baalár tawa gwaawin.

21«Hee i kaahh oo warqamoó /abén gwa waraáq ar inqwaarír qaren. Ala burungwa hiriít, warqamoodá' /abén inqwaaridá' aa gwa' ga hhitín, nee didá' aa feehhit i ló'wa doogiín. 22Tam hee i kaahh oo difaáír /aben ga qamaamiím baraá tlakoó kaahari oo qarén. Biringa qaás, difaáidá' tlakw'iidaá kaahari gi tsú/, difaáí iri ku'út, nee tlakw'iidá' niri hhitiruutiyá'. Ala difaáír /aben dír ki qamaamin a baraá tlakw'aá /abén.»

Yaahasa daanduú deelór Sabaáto

(Mat 12:1-8; Luka 6:1-5)

23Yesu nee eeharuuseerós tawa waaraahhi ar baraá qamaá angaáno deelór Sabaátoro, eeharuuseerós angaáno guri giqeér guri pikimís guri /ák. 24Múk Farisayo Yesu kuri báy, «Ga/aaweek, eeharuuseerók baré adór hariimaaká gan tlehhít bál deelór Sabaátoro.»

25Giri báy, «Aga soomusi'iikáhe adoodá' Daudi aa tleéhh qoomár inós nee mukdá' ti alkoomá' tawa qwariimiít, 26tana dáh baraá Doó Mungú qoomár Abiatari tawa kaahamusmoó úr oo Mungú. Inós ina dáh baraá Doó Mungú, mikaáteedá' taa qaás as Mungú gari /aáy, tidá' hariimaaká /aymaaro, aqo har kaahamuusér Mungú kilós. Mikaáteedá' gari haniís sleeme dír mukdá' nee inós ti al koomá'.»

27Giri báy, «Deelór Sabaáto kana tleéhh as hee, ala hee kwa tleehhiiká as deelór Sabaáto. 28Gawaá adoorihe Garmoó Hee an Aakoó deelór Sabaáto sleeme.»

Currently Selected:

MARKO 2: IRQW

Highlight

Copy