MARKO 3

Yesu heé aa dawa sol'oot nguwa hungu/uús

(Mat 12:9-14; Luka 6:6-11)

1Aluuwo Yesu iri malé dáh baraá doó saaliingw, nee baraadane heeko i deer oo dakós aa sol'oot. 2Kuri gigidín as kuwa ari, áx heedaádá' gu hungu/uúsi deelór Sabaátoro, as kahhó' kuwa sakwasleemuuti. 3Yesu heedaádá' dakós aa sol'oot guri báy, «Baraá tla/aangw i sihhiiteek.» 4Muu guri yaahaás, «Gár hariim tleehhamoro deelór Sabaátoro a milá? Gár hhoóe laqaá gár tlaakw? Hee kuwa hungu/uúsi, laqaá kuwa gaasi»

Tari xasliít. 5Iri gurhaamuút asma gawdeemaá muner'ín, giri ilií duxún bihhe sleémeero ar buhhta, heedaádá' guri báy, «Dakók gan'aaseek.» Heedaádá' dakós guri gan'aás, dakós iri hunguú/. 6Siiwadár kilae múk Farisayo nee múk Herodewo tari ti'iít, tari kwasleemuút daanduú Yesuwo, as adór kur gaasi kawa slay.

Boo/oó afaá tlawi

7Yesu tiri paraátl, inós nee eeharuuseerós, iri tláy amór tlawi, kuri eehár nee boo/oó yaariír. Mukwí sleémeero amór i dahhi a amór yaamaá Galilaya nee yaamaá Yudea, 8nee gixsár Yerusalemu nee yaamaá Idumea nee gayuú Yordani nee bihhér Tiro nee Sidoni. Mukwí Yesu guri i daqáy asma kángw muruudá' sleémeero aa tlehhiít, kwaa axaás. 9Eeharuuseerós gari báy, «Miringamo dir'eénií tseweesare', boo/aay miwa tliíq.» 10Asma múk yaariír guna hungu/uumiís, awa slahh'amuú dimbadimbé ngu koomá' sleémeero kuri i tseewúy ar tliqa as kuwa kwatitár wa slai. 11Nee mukduú neetlaame aa eér umuúqo siiwaro Yesu burkwa ár, tan dír geeraawosí tumbarara'aamiit, tan tseeamín ta kaahi, «Kuúng an Garmoó Mungú.»

12Giri ló'wa i axwees gina báy, «Án mi xu'utisara'.»

Yesu eeharuusér mibaá nee tsár ngiwa tsawaár

(Mat 10:1-4; Luka 6:12-16)

13Yesu iri tsa/án gawaá tlooma, kudá' inós aa slaá' giri ateét, kuri i daqáy. 14Múk mibaá nee tsár guri tsawaár as tawa ya/abuuse as kahhó' tawa dinkwa nee inós, nee nguwa ya/aawi as axweesantá Mungú ngiwa alki/itiyá', 15slám /uuru nguwa kona' oo neetlaame duxuungw.

16Eeharuuseedá' mibaá nee tsár gana qaás. Inooín a kuká': Simon, kudá' aa umuú hatlá' i tsaát a báy Petro, 17nee Yakobo garmoó Sebedayo, nee hhiyaawós Yohane, giri umuú hatlá' i tsaát, a Boanerge, gídaabárós a daaqoó tsimaahhuuse, 18nee Andrea, nee Filipo, nee Bartolomayo, nee Matayo, nee Tomas, nee Yakoboó Alfayo, nee Tadayo, nee Simonudá' yaamuuwós aleeslaáqw,#3:18 Simonudá' yaamuuwós aleeslaáqw: Gídaabá, inós a heé wák oo yaamuuwós aleeslaáqw dír múk Romár wa ale, kudá' yaamuuín ngi sawaawuti'ii'imá'. 19nee Yuda Iskarioti, kudá' Yesu gwaa sakii/.

Yesu nee Be'elsebuli

(Mat 12:22-32; Luka 11:14-23; 12:10)

20Aluudae Yesu iri waátl amór do'. Boo/aay iri malé burumburiít, tam inooín pa/ángw muruú /ayma kur /ayi kwaa slayká. 21Múk dooín kaangw nguwa axaás tari tláy as kuwa oohi, asma ta kaahi, «Sagós aa hhitiruút.»

22Slám intsaahhatuusér hara'ayár Mose, tidá' amór Yerusalemúr daahh ina kát, «Yesu kwaa i dáh nee neetlangwdá' úr ta bay Be'elsebuli, nee i neetlaamér duxún ar /uuruú neetlangwdá'.»

23Yesu muu guri ateét, guri i axweés ar slaqsi'i, giri báy, «Neetlaangw kilós duxuungo ti aleesláya? 24Nee waawuti'iima birti kilós tlaampa'aamís, waawuti'iimadá' sihhiita ga aleesleeraaká. 25Nee múk doó wák birti kilooín tlaampa'aamiisiyá', do'dá' sihhiita ga aleeslayká. 26Nee bar Neetlaangw ti kilós i slaaqw, tiri paraatliít, sihhiita ga aleeslayká, ala alhhe'eesaywós naa hardáh.

27«Heé dahamu gu aleesláw baraá doó heé /uuruú koóm i kaahh, xoosla gay hayoh, barnaxes heedaádá' /uuruú koóm gwa geerií tseegiiká, daqaní do'dá' gway sangw /awa/awín.

28«Án a kah, tlakweema sleémeero awa muu ki gurtláy, nee /ooslislingw'ine, 29ala heé Qeeruú hhoohhoó' oo Mungú gwa /ooslin, tlakweemaawós ki baloó gurtlayká, inós tlakweemaá ta baloó gurtlayká ay alhhe'eesay wasle gaa tleéhh.» 30Inós adoorí gana oó' asma adoodá' inooín tawa kaahi, «Neetlaame gwa eér.»

Hha'aá Yesu nee aayír'ín

(Mat 12:46-50; Luka 8:19-21)

31Aayoorós nee hhaeewós awa daaqaay tari hardáh, tari tsee/áy sihhiít, hee kuri ya/aáw Yesu nguwa ateeti. 32Qoomaadae boo/aay aa iwiít, inós kwa harweér, kuri báy, «Ga/aaweek, aayoorók nee hhaeewók ta tsee/áy dirii', kuúng tun slaa'.»

33Giri báy, «Aayor'eé' nee hhaee'eene' a ín heemá?» 34Mukdá' aa iwiit guri i qaytsiít, kudá' gwa harweer bihhe sleémeero, iri oó', «Ga/aawaak, aayor'eé' nee hhaee'eé' a kuká'. 35Asma umuúqo heewo oo sla'aarír Mungú ga tleéhh, kwí an hhiyaaeé' nee hho'or'eé' nee aayor'eé'.»

Currently Selected:

MARKO 3: IRQW

Highlight

Copy