MATAYO 28

Yesu niwa waasleé/

(Marko 16:1-10; Luka 24:1-12; Yoh 20:1-10)

1Tam deelór Sabaáto iwa fák, matlaatlér boo/ ar deelór Jumapiíliro, Maria Magdalene nee Maria tidár tsár tana /aantár qaytsuú áy. 2Kunseelír ur niri hardát. Asma malaykamoó Aako nina aweér gawaá doorí wa aleeró. Inós tlaa/adá' gari gwangwaraá' gawaá afkú /aantaaro, iri gawaadí iwiít. 3Gitsee/aá malaykamoodá' a adór mankari, nee inqwaruuwós ku ló'wa /awák adór tlaa/aá tluwaay. 4Askaáridá' /aantár xuum malaykamoodá' guri da'ayút, tari slar/amiít, tari adór múk aa qaatl.

5Malaykamo /ameenadá' gari báy, «Kuungá' ma da'ayumitaara'. Aníng a xuú' heé kuungá' ta leelehhita' a Yesu, kudá' taa kikií' gawaá msalaába. 6Diirihe i kaahh, asma aa qaroó waasleé/ adoodá' inós ngira oó'. Qwalaasé', dír kway qaatiís artá awaare'. 7Kuungá' tlawsé' ar gaanslaay, eeharuuseerós ka beera', ‹Aa waasleé/ baraá múk aa qaátl wa ale. Hamí inós aa geerií tláy Galilayár i alé. Amoodae u aandá'.› Hám daxta naa ádbáw.»

8Tari tláy ar gaanslaay dír /aantár wa ale, ar dae nee qwal/uú úr. Tari ta'aaín, eeharuuse kari ádbeemuú áy.

9Naxés Yesu nee inooín tiri doogiyé', iri oó', «Laawaay.» Tari dirósí tseewúy, kuri ya'a' óh, kuri i tumbarara'aát. 10Yesu iri oó', «Ma da'ayumitaara'. Tlawsé', hhaee'eé' ádbawaak, i Galiláyár i tlaye', amoodae aníng i ariyá'.»

Alki/ituú askaáridá' aa xuun

11Qoomár /ameenadá' iwa tleér, askaáridá' /aantár xuum bahh'alé tari hardáh baraá gixsa. Muruudá' sleémeero aa tleehharuut kuri xu'utís dír kaahamuusér uren ar Mungú. 12Tari burumburiít dinkwa nee bariise, tari al'axweés. Askaári kari peésár yaariír i haniís, 13kari báy, «Kuungá' ta oa', ‹Eeharuuseerós nina hardát xweeraawo, guri fís qoomár atén tawa guaán.› 14Ala kaangwí ga/aawusmo burngwa axaás, daqaní atén nee inós a axweesaán. Kuungá' ma da'ayumitaara' kangwsinge.»

15Askaáridá' peésar'ín gari ót, adoodá' kaa báy gari tléhh. Gawaá adoorihe axweesanaydá' iri tsiyaayaaxaát dír múk Yahudiro tam ay laarí.

Ya/abtór kudaá mibaá nee wak

(Marko 16:14-18; Luka 24:36-49; Yoh 20:19-23; Tlehh 1:6-8)

16Eeharuuseedá' mibaá nee wak iri tleér ay yaamaá Galilaya, ay dír tloomadá' Yesu aa dir'ín i hara'ayín. 17Inooín Yesu kuwa ár, kuri i tumbarara'aát. Ala bahh'alé baraaine nina xuruumitiyé'. 18Yesu giri i tseewúy, giri báy, «Aleesleemu sleémeero oo gawaá doori nee oo baraá yaamu kunga aníng i haniís. 19Gawaá adoorihe tlawsé', xoordu sleémeero eeharuuse tleehhaak, ki baatimisá' ar umuú Baabá nee oo Garma nee oo Qeeruú hhoohhoó' oo Mungú. 20Muruudá' sleémeero naa kuungií intsaahhatimís, dir'ínií intsaahhatisak ku oohi. Ga/aawaak aníng a dinkwa nee kuungá' deelo sleémeero ay alhhe'eesoó yaamu.»

Currently Selected:

MATAYO 28: IRQW

Highlight

Copy