MATAYO 6

Intsaahhatimisuú Yesu daanduú alee/imisuú narkuute

1«Gimsé', hhooeemaahúng mi dír ilaá múk wa tlehhiitara' as inooín tlehhmi'iihúng ngiwa ariya'. Asma adoosíng bara tlehhé' bu'utuú ta sleera' i kaahh dír Baabuúhúng kuduú gawaá dooriiwo.

2«Kuúng bar gaa a heé i haniisár wa slá', ma dír múkwí kaahaar as muu ngiwa xui, adoodá' hhaahhafuuse i tlehhaahhit baraá maraá saaliingo nee baraá lohuuwo, inooín gár ta slai a masók kin xirfayeemiis nee muu. Án a kah, bu'utuuín ngwa qaroó slayé'. 3Ala bar kuúng hee u alee/isár wa slá', tam dakók oo doó basáy gár dakók oo doó /iyáy i tlehhiiti mingiwa xuú'. 4Alee/isaywók masók oo baraá naaqo. Nee Baabuúwók kudá' muruú naaqo gu xuú' kuúng u qáy.»

Intsaahhatimisuú Yesu daanduú firo

(Luka 11:2-4)

5«Slám bar kuungá' Munguú firiiriindá', masók a adór hhaahhafuuseerooká. Asma inooín tan firiirín tawa sihhimiiti baraá maraá saaliingo, nee baraá afaá lohuwo, as muu ngiwa ara'ari. Án a kah, bu'utuuín ngwa qaroó slayé'. 6Ala bar kuúng a firiiriín, dáh baraá kutuwirók; nee afkú do' ku tsék, daqaní ta firiín dír geeraá Baabuúwók kudá' geehhooeeká. Nee Baabuúwók kudá' muruú naaqo gu xuú', kuúng u qáy.

7«Kuungá' bar Munguú firiiriindá', /ayma'aá yaariir mir firiiriimaara' adór múk xoordaá hatlá'. Asma inooín ngi xuiya' ki iiárií qaas nee Mungú asma /aymi'ii'ín kudá' yaariir. 8Kuungá' ma adór inooín tleehhitaara', asma Baabuúhúng gár kuungá' ta sla'a' ga xuu' iimír kuungá' kuwa firiindi'iiká. 9Gawaá adoorihe kuungá' bar firiiriindá', ta oa',

‹Baabuúrén oo gawaá doorí dirií',

umuuwók i xirfuuti,

10waawuti'iimarók ni xeer,

adór kuúng ta sla' i tleehharut baraá yaamuwo,

adoodá' gawaá dooriiwo ira tleehharút.

11Muruú /aymaarén oo laarí haniisang.

12Tlakweemaarén gurtlaweek,

adór atén múk tis dakumaamiís kur gurtlaatlawaan.

13Atén miti baraá iiara'aduú uhisar,

ala atén ti ba/amis kudá' tlaakwe. [

Asma waawuti'iima a tók, nee aleesleemu,

nee xirif, ay alhhe'eesay wasle. Amin.]›

14«Asma bar kuungá' tlakweemaá muu i gurtlatleerá', daqaní Baabuúhúng oo gawaá doori sleeme tlakweemaahúng gi gurtláy. 15Ala bar kuungá' tlakweemaá muu i gurtlatleera'aaká, tam Baabuúhúng tlakweemaahúng ngi gurtlayká.»

Intsaahhatimisuú Yesu daanduú gwaawito

16«Slám bar kuungá' aga gwaawindé', gitsee/erhúng ma quy'uumisaara', adór múk hhaahhafuusér wa ale. Asma inooín adoorí kan tlehhiit as muu ngiwa ari adór tara gwaawín. Án a kah, inooín bu'utuuín kwaa qaro hhe'eés sleemuuwo. 17Ala kuúng bara gwaawiín, sagók slikeek di/ito, nee gitsee/aawók ki hamátl. 18Asma muu mingiwa tsaáhh adór kuúng tara gwaawiín. Ala heé ga tsaáhh masók a Baabuúwók kudá' geehhooeeká. Nee Baabuúwók kudá' muruú naaqo gu xuú', kuúng u qáy.»

Daqaari'iimár gawaá doori

(Luka 12:33-34)

19«Daqaari'iimarhúng ma baraá yaamií qamiimara', didár babi nee kútu ngiwa hhitina', nee didá' fisuuse ngiwa hara dat gari fís. 20Ala daqaari'iimarhúng gawaá doori ti qamiinde', didá' babi nee kútuwo ngiwa hhitiindaaká, slám fisuuse i datká gari fís. 21Asma didá' daqaari'iimarhúng i diri', an didá' munerhúng i diri' sleeme.»

Gwa/aateemaá slaqwa

(Luka 11:34-36)

22«Tsaa'astá slaqwa a ila. Ala bar iltók ka hhoohhoo', slaqwtók sleémeero i gwa/át. 23Ala bar iltók ka tlaakw, slaqwtók sleémeero i gíp. Ala gwa/aateemaadá' baraawók i diriiá' bir giwiyá', gaasíng a umuú giwtirooká.»

Mungú nee daqaari'iima

(Luka 16:13)

24«Heé daqaarér tsár sagadiyeede ga aleesláw i kaahh, asma kooko gun aahh, kuqá' gway slaa'. Laqaá nee kooko tin oohiyá', kuqá' gway waaqaa'. Mungú nee daqaari'iima tsaraawo kiwa sagadiyusa' i aleesleera'aaká.»

Ma daawimitaara'

(Luka 12:22-31)

25«Gawaá adoorihe, án a kah, ma daawimitaara' as slafingwhúng, tawa kata', ‹Ma /ayaán nee ma wahaán?› Laqaá slaqoohunge, tawa kata', ‹Ma tsiitaán?› Asma slafiingw a gár afhhamíteéke ta muruú /aymaaro? Nee slaqwa a gár afhhamíteéke ta tsitaywo? 26Tsir/o ga/aawaak, i dahaasiindaaká, i bu'uundaaká, tam muruú /aymár i burumburiin baraá kuuntáy i kaahh. Tam adoorihe Baabuúhúng oo gawaá doori gan /aymiis. Kuungá' a ak tsiníheéke ta tsir/ooro? 27Hee i deéro dirhunge oo slafiingós doogaro gu aleesláw oo har qoomár niina, tam ti daawiitimiisi?

28«Nee tlaba' gár ki har daawiimita'? /Ayo ga/aawaak, i gadiyuská, slám i hhutlitká. 29Án a kah, tam Solomon a ló'wa daqaarmoowo tlabaá hhohho' awa adór /ayoorí gaa tsiitiiká. 30Bar Mungú /ayór baraá qamu gan adooqár tsiitimiis, ar laarí dáw nee matlo kari kwaahh gawaá ufuú xwaansláy, xáy, kuungá' nu ak tsiitísiíke, kuungaásingá' haratlintaao niina. 31Gimsé', ma daawiimitaara' tawa kata', ‹Ma /ayaán?› laqaá ‹Ma wahaán?› laqaá ‹Ma tsiitaán?› 32Asma múk xoordaá hatlá' muruuwí sleémeero gun leelehhiit. Nee Baabuúhúng oo gawaá doori ga xuu' adór kuungá' muruuwí kur sla'á'. 33Ala waawuti'iimarós na geerií leelehhaak, nee gan'amuuwose, daqaní muruusuú hatlá' kungu dook. 34Gawaá adoorihe muruú matlo mu sadaawimitaara', asma ar matlo looarós ngisa tleér. Umuúqo baalaaro i daawiitimeerós koón ar bu'uut.»

Currently Selected:

MATAYO 6: IRQW

Highlight

Copy