MATAYO 5

Axweesanoó Yesu aa gawaá tloomár wa káh

1Yesu boo/oó muu nguwa ár, iri tsa/án gawaá tlooma, qoomár iwa iwiít eeharuuseerós guri i daqeér. 2Giri iimu/ún intsaahhatimisuuwo, iri oó',

Amohhooár ló'

(Luka 6:20-23)

3«Múk amohhoó' a kudá' narkuú qeeremooín gu tsatsahhaám,

asma waawuti'iimár doori a tooín.

4Múk amohhoó' a kudá' gurhaamuút,

asma inooín gurkwa/asa ngi slayá'.

5Múk amohhoó' a kudá' tsaén,

asma inooín yaamu ngi aaliyá'.

6Múk amohhoó' a kudá' gan'amuú ak leelehhiít ta muruú hatlae,

asma inooín gan'amu ngu slayá'.

7Múk amohhoó' a kudá' gurtleemuú koóm,

asma inooín Mungú gi gurtláy.

8Múk amohhoó' a kudá' mune hhohhó',

asma inooín Mungú ngu ariyá'.

9Múk amohhoó' a kudá' wayduú tlehhiít,

asma inooín ki na/aá Mungú báy.

10Múk amohhoó' a kudá' ta slahh'eemisi as gan'amu,

asma waawuti'iimár doori a tooín.

11«Kuungaásingá' an múk amohhoó', burtundu niqimiis, nee burtundu gusiisín, nee burtundu tli/imis ar /ayseeno asma aníng. 12Qwalaala/é' nee baraa/é', asma bu'utuhúng ku úr gawaá dooriiwo. Asma adoosíng an adór aaruuseedár aáng kaa /imiís.»

Diwi nee gwa/aateema

(Marko 9:50; Luka 14:34-35)

13«Kuungá' a diwtá yaamu. Ala diwi bira hhiturút, gár ki qaasi a milá as iwa malé maamahh? I sangw gaa bu'uká, aqo kan kwaahh tsee/ií alé, kari adarah nee muu.

14«Kuungá' a gwa/aateemaá múk baraakaá yaamu. Gixsár gawaá tloomár i dirii', ti lu/uká. 15Slám bar muu tsaa'asi ngaa daá/, ga tuntuukiiká ar lakwaanti, ala gan qaas didá' kawa geehhoó', asma múk baraá dó' i dirií' sleémeero nguwa i gwa/at. 16Gawaá adoorihe gwa/aateemaahúng i gwa/aatiye' dír geeraá muko, as tlehhemi'iihúng awa hhohho' kiwa ari, nee Baabuúhúng kuduú gawaá doorí dirií' kuwa xirfayeesi.»

Intsaahhatimisuú Yesu daanduú hara'aya

17«Ma kaahaara', án nina hardáh as hara'ayár Mose nee gooír aaruuse ngiwa warqees. Aasla'áy, án naa hardihiiká ngiwa warqees, ala nina hardáh as ngiwa boo/ees. 18Án a kah, looeemaawo, ay dír doori nee yaamu i waarahhiya', ala gooír niina adór afkú laqwa laqaá tam ar ló'wa niina ta afkú laqwto ar baraá hara'ayaárií dirii' i baloó waarahhká ay dír sleémeero kay boo/eesi. 19Gawaá adoorihe, hee bar hara'ayár wák gaa iialooeesiiká baraá hara'ayadaá ninakwe, nee muu guri adoodár intsaahhatimís, inós a heé ló'wa niiná baraá waawuti'iimár dooriiwo. Ala heé hara'ayaarí gaa boo/ees, nee muu guri adoodár intsaahhatimis, inós a heé ló'wa úr baraá waawuti'iimár dooriiwo. 20Án a kah, slafingwhúng barnaxes ku hhohhoeeká ta slafíngw intsaahhatuusér hara'ayár Mosewo nee múk Farisayowo, kuungá' a baloó data'aaká baraá waawuti'iimár dooriiwo.»

Intsaahhatimisuú Yesu daanduú buhhta

21«Kuungá' aga axasé' bariisér bál geera adór kara báy, ‹Hee mu gaasaar. Hee bar hee ngwa gaás, gár kuwa hariím a kun sakwasleemuut.› 22Ala án kuungá' nu baw, ‹Umuúqo heewo oo hhiyaawós gwa i buuhh, gár kuwa hariím a kun sakwasleemuut.› Umuúqo heewo oo hhiyaawós /ooslisliím, gár kuwa hariím kun huuw dír doó sakwasleema. Nee umuúqo heewo oo hhiyaawós gu babáw, ‹Kuúng a daktani›, gár kuwa hariím asltá baloó gwaa'aaká gun /ák. 23Ala barnaxes kuúng ilahhooarók ngaa húp geeraá meésár Aako, didaádae naxés aga insleér adór hhiyaawók ir /aymuú kón daanduuwoge, 24ilahhooarók ala geexaweek dír geeraá meésár Aako, daqaní ta daqeér dír hhiyaawók, ti ala axweesani axase', daqaní ta kí/, ilahhooarók ka hanís.

25«Nee sakwasleemusmoowók ti axweesani axase' ar gaanslaay, qoomár tawa dinkwárií dir'a' baraá loohiro, sakwasleemusmoowók kuúng muwa huúw amór doó sakwasleema, doó sakwasleemaro kuúng turi malé haniís dír askaarmoó i alé, inós kuúng uri dahaas baraá doó tseegamo. 26Ar ló' án a kah, a baloó ti'itaká baraadae ay dír heelmooduú alhhe'eesaay kway bu'.»

Intsaahhatimisuú Yesu daanduú fuqi

27«Aga axasé' adór tara káh, ‹Fuqi ma awaar›. 28Ala án a kah, umuúqo heewo oo /ameeni gaa alqaytsiit ar ilatleeri aa fuquús nee /ameenidá' baraá muunaáwose. 29Bar iltók ar doó /iyáy kuúng u baraá tlakweemií dahamís, tu/eek, ka kwáhh amór saáw i alé. A tsiní dír wák ar slaqwtók iwa qwat, ta slaqwtók sleémeero kawa kwahhi baraá asltá baloó gwaa'aaká. 30Bar dakók oo doó /iyáy kuúng u baraá tlakweemií dahamiis, tsateek, ku kwáhh amór saáw i alé. Asma a tsiní dír wák ar slaqwtók iwa qwat, ta slaqwtók sleémeero kawa kwahhi baraá asltá baloó gwaa'aaká.»

Intsaahhatimisuú Yesu daanduú talaáka

(Mat 19:9; Marko 10:11-12; Luka 16:18)

31«Adoorí sleeme kaa oó', ‹Hee bar hareerós gaa guús, ngi talaákár i haniisi.› 32Ala án a kah, hee bar hareerós gaa guús, ala as tlehhemuú fuqtooká, /ameenidá' aa fuqús as hhawaatuudá'. Nee heé /ameenidá' taa guús gaa duux, heedaádá' sleeme aa fuquús.»

Intsaahhatimisuú Yesu daanduú lo'o

33«Slám aga axasé' adór bariisér bál geera kara báy, ‹Lo'o bara húp dír geeraá Munguhe, al'axweesani kawa boo/es, al'axweesantadá' ma mawaar boo/eesaro.› 34Ala án nu baw, lo'o ma baloó huwaara', laqaá tam ar doori, asma doori a kitángw aleesleemu oo Mungú. 35Laqaá lo'o ma huwaara' ar yaamu, asma yaamu a kitángw ya'aá Mungú. Laqaá lo'o ma huwaara' ar gixsár Yerusalemu, asma a gixsár Waawutmoó úr. 36Laqaá lo'o ma huwaar ar sagók, asma tam se'eemír wák kawa /awaakes laqaá kawa boo/es a aleesleeraaká. 37Ala axweesantahúng masók a ‹Ka hhoo',› laqaá ‹Aasla'áy›. Asma ar dír tihe aa harwaarahh, amór i dahh a amór kudá' tlaákw.»

Intsaahhatimisuú Yesu daanduú magoót

(Luka 6:29-30)

38«Aga axasé' adór tara káh ‹Heé iltá hee gaa gaas, aqo iltós kan gaas sleeme, nee heé sihhnoó hee gwa tuu/, aqo inós kun sihhno tuu/ sleeme.› 39Ala án kuungá' nu baw, miti tlaampa'aamisaara' nee heé tlaákw. Bar hee tlaaqarmoowók oo doó /iyáy gwa slaáhh, tlaaqarmoó bartá hatlá' warqeeseek as nguwa slahhi sleeme. 40Barnaxes hee kuúng ugwa sakwasleemuut nee shaátirók gari hayóh, inqwaarirók ti geexeer sleeme. 41Barnaxes hee kuúng uga harakeés kuwa haydoohis kilomiíta wake, haydoohiseek ay kilomiítár tsár. 42Heé kuúng u fiririím qaweek, nee heé kuúng u kirkiít mu /itaar.»

Wakuuse kawa slai

(Luka 6:27-28, 32-36)

43«Aga axasé' adór tara káh, ‹Inslaawmoowók slaeek, nee wakusmoowók na aahheek.› 44Ala án nu baw, wakuuserhúng sla'aak, nee kudá' kuungá' nu slahh'eemiisá' aleefiririimaak, 45as kahhó' kuungá' tawa na/aá Baabuúhúng kuduú gawaá doori tleehhita'. Asma inós tsee/amá gun gwa/atimis dír múk tlákw nee oo hhoe, slám tluwaay gun hanmiis dír múk gan'amuú koóm nee oo ngu kooma'aakahe. 46Asma bar kuungá' múk ta sla'a' a kudá' kuungá' nu slaá' gár kuungá' ta sleera' a umós? Tam mukduú ohmér ohahiím adoosíng ga tlehhaahhítiíke? 47Slám barnaxes kuungá' hhaeehúng kilooín in laaw'eemisá', gár kuungá' taa ak tlehhé' a milá ta múk hatlae? Tam múk xoordaá hatlá' sleeme adoosíng ga tlehhaahhítiíke? 48Gawaá adoorihe kuungá' masók a múk ganaá', adoodár Baabuúhúng kuduú gawaá doori ir ganaai.»

Currently Selected:

MATAYO 5: IRQW

Highlight

Copy